2017年12月7日星期四

2016年3月北國極地18日 - Day 1 (奧斯陸)



2016 年 3月 12日,籌備咗幾個月嘅北歐之旅終於要開始啦......好多年未試過自己一個人出國咁多日,仲要係去咁偏遠嘅地方,我個心情真係大上大落,由最初嘅期待、興奮,到中段開始緊張、不安,日子愈接近就愈忐忑,臨出發前一星期直情淆晒底,好後悔自己咁鬼任性係都要一個人去,擔心呢樣又擔心嗰樣,甚至試過同老爺講想放棄唔去,真係好樣衰.......不過最後都硬住頭皮上,死就死啦,都無得後悔咁多,至多客死異鄉,心想如果可以死喺極光下都未嘗唔係一件樂事

今次搭 Finnair,凌晨 0:45 出發,首站係挪威首都 Oslo 奧斯陸,需要響芬蘭 Helsinki 轉機~

第一次搭 Finnair,餐飲都算 OK 啦.....


由香港去 Helsinki 要十一個鐘,瞓咗幾個鐘食下餐睇咗三套電影,時間都唔算太難過~


機艙內都有好多小食供應~


抵達 Helsinki 係當地時間 5:45,落機後先過關入境,搞掂晒 d shops 已經開咗.....

有兩個半鐘時間轉機,可以慢慢逛~


經過免稅店,見到好多 on sale items,好平呀,真係好想買,不過第一站都未去到就 shop 會唔會有 d 過份? 得自己一個人拖行李,要拖 18 日啊! 有大部份日子仲係要響厚厚雪地上行,諗諗都覺得好艱巨......而且 Finnair 個行李限額只有 23 kg,出發時已經有17 kg! 所以只好忍忍忍!!


Moomins 係芬蘭童話小說,周圍都見到佢 d products,好可愛呀! 一定要買呀.....不過忍忍忍,而家唔買住,留返尾程返嚟 Helsinki 先買~


由 Helsinki 去 Oslo 要個半鐘~

起飛無耐望落去已經係連綿嘅雪地,本來十下十下好眼瞓嘅我忽然變得好興奮~



當地時間九點到達挪威 Oslo Gardermoen,之前響 Helsinki 已經做咗入境手續,嚟到 Oslo 只係攞返件行李......今日係響 Oslo 市內遊,因為第二日一早就要搭九點多機去 Stockholm,所以 book 咗響機場旁邊嘅 Radisson Blu Airport Hotel 住一晚,費事出市區要將行李搬來搬去~


由機場行過去酒店只係五分鐘,好方便......先放低行李,然後就返去機場搭國鐵 NSB 去 Oslo Central~


由機場出市區除咗搭 NSB,仲可以搭 Flytoget,Flytoget 係 airport express train,不過票價要 NOK 180,比 NSB 貴一倍! 其實兩者嘅車程都差不多 (Flytoget 只係快一分鐘!),只係 Flytoget 班密 d,如果唔趕時間當然揀搭 NSB 啦~


買票時剛剛走咗班車,下一班要等半個鐘.....

同瑞士一樣,月台上嘅電子屏幕有顯示列車將會停靠嘅位置,好方便~

由機場去 Oslo Central Station 只係 23 分鐘......

首先去車站嘅 Visitor Centre 買張 Oslo Pass~


車站旁邊嘅 Ruter's Customer Service Centre 都一樣可以買 pass 或車票~


呢張 Oslo Pass 係可以響指定時間內於 Zones 1 & 2 任搭各種公共交通工具 (除往返機場),同埋有超過三十多間 museums 係 free admission,基本上遊客所必去探訪嗰幾間都一定 on list,所以係好抵買,詳情可以去官網 check 下.....我只係停留一日所以買咗張 24 小時~


買完 pass 就先行去附近嘅 Oslo Cathedral 參觀下.......



位於市中心嘅奧斯陸大教堂已經有三百多年嘅歷史,皇室婚禮同國家重要慶典都係響呢度舉行~




天花板壁畫嘅構圖好特別~



大門外旁邊嘅 "The Devil of Oslo"


參觀完大教堂就去搭 tram.....

無論 tram or train, 必須要事先買票或 pass,車上係無得即場俾 cash 購買......同大部份先進國家一樣,只需要上落車時響車上嘅 reader 掃掃張 pass 就可以,完全係靠自律,我一整日都只係遇過一次有車務員上車驗票~

今日第二個景點係我十分期待嘅 Vigeland Park,所以呢一 part 會寫得比較詳細.......響 Central 可以乘搭 bus 20 or tram 12,車程只係十多分鐘.....

Vigeland Park 係一個以雕塑為主題嘅公園,園內總共有二百多個大大小小嘅雕像,全部都係由挪威最著名嘅雕塑家 Gustav Vigeland 所創作,佢係 Rodin 嘅學生,但我覺得兩人作品嘅風格截然不同,Vigeland 嘅人像都較粗獷同圓渾... .....整個公園分四個區域,以一條長達 850 米嘅中軸線貫穿,由入口到最遠處嘅「生命之輪」,每個區都遍佈各種姿態嘅雕像,每一座都好似在訴說著人生,慢慢走過,似看盡人生百態,所以呢個公園又被稱為人生雕刻公園~

由入口大約直行六、七分鐘就會去到第一個區域「生命之橋」,橋兩邊佈滿數不清嘅青銅雕像.....由男至女、由老至少,每一組都在表達人與人之間嘅各種關係~

出生嘅喜悅


孩童嘅天真爛漫~~


年少嘅青春活力


戀人間嘅甜蜜



但最令我感動嘅係親子關係......

曾幾何時,我地都一樣跟父母手牽手.......

心連心.....


無憂無慮嘅童年,只因永遠有父母嘅疼愛~

(呢個動作有 d 危,咁樣抽起個 B 搖.....喺香港會被告虐兒吧?!)



望住呢一個個美麗而又溫馨嘅親子雕像,響冷冷嘅異國,不禁懷念起以往同老爸昔時相處嘅點滴......忽然想起原來佢已經離開咗我地快要七年了.......


美好嘅親子時光~~



橋上最著名嘅 "Angry Boy",睇下佢隻小手都俾人摸到變晒色就知有幾出名......呢個雕像姿態生動,表情細膩,佢真係好嬲啊,完全係發爛渣嘅模樣,不過據講佢出名嘅原因係因為佢曾經被人鋸掉偷走過~


走過橋之後就去到「生命之泉」.......


「生命之泉」顧名思義其實應該係一個噴水池,不過唔知係咪冬天天氣太冷緣故所以無放水......呢個噴泉其實滿有意思,盆子象徵家庭,下面六個猛男合力抬住,寓意人生各階段都有不同嘅責任同負擔~


噴泉四周係多組人樹交纏嘅雕塑,平台四壁則係浮雕,主題仍然係描繪人由出生經歷各種喜怒哀樂最後走向死亡整個過程.......


人樹嘅組合代表人類跟大自然嘅息息相關,人會死亡,樹會枯萎,但無論人或樹,仍然會不斷孕育新嘅生命,大自然嘅循環係生生不息~






離開「生命之泉」,穿過精緻嘅鐵門就係整個公園我最期待嘅部份.......

先來欣賞一下呢幾道美麗而又富有藝術感嘅鐵門~~



公園嘅地標「生命之柱」........


呢個「生命之柱」係由一整塊花崗岩耗時十四年雕刻而成,柱上一共 121 個人像,每一個嘅表情同肢體動作都栩栩如生,令人驚嘆~~ 塔頂嘅嬰孩同骸骨象徵生命嘅起點同終點.......由生至死、由始至終,即回到原點吧?.......自此而下各種唔同姿態、唔同表情嘅人物雕塑,每一個都好似絕望地要奮力向上攀爬,渴望從困苦嘅人間走到天堂,層層疊疊,互相糾纏......我想,Vigeland 想要表達嘅係凡人不論係幾咁富足,又或幾咁困苦,對天國都總係有一份嚮往吧?



天國嘅路看似遙遠,但我地仍然可以自由意志去選擇我地點樣去行呢條路,記得有位神父講過,如果我地每日都只係喺罪惡當中打滾,我地嘅一生就只係掙扎,但係如果我地係向住成聖嘅路努力,咁我地嘅一生就係奮鬥.......營營役役,走過半生或大半生嘅日子,究竟我地每日係掙扎定奮鬥? 回想一下,我地到底選擇咗一個點樣嘅人生?


係咪同我地嘅國殤之柱有 d 相似?

巨柱四周亦有多組石像,男女老幼,各種姿態,各種感情,各種人生......




溫馨嘅天倫之樂......

父母嘅溺愛


對未來嘅憧憬


戀人相依相偎




即使跌倒仍然有你扶持? (呢個有太多想像空間啦,大家請自由發揮)


垂垂老去,有太多嘅無奈.......



但如果身邊仍然有你相伴,縱使走到人生盡頭,也必不會感到孤單~~


欣賞完精彩嘅「人生之柱」,終於去到最後一個區域.....

公園最盡處就係「生命之輪」,整個「人生」嘅總結.........


小孩、女人同男人彼此牽絆著,象徵三者永恆地相互依存~~


雕刻家 Gustav Vigeland 花咗半生嘅歲月,為世人留下偉大嘅藝術作品,佢對生命、對藝術嘅執著同熱誠,徹底地表現喺每一件雕塑之中......偌大嘅一個公園,處處展現人間百態,每一個角落都係藝術、都係對生命嘅讚嘆,走在其中,深深地被這人生縮影所感動.......

帶住感恩嘅心踏上歸途.......我諗,喺人生嘅旅途上,我地每一個人都會經歷悲喜、苦樂、愛惡、欲望,我地都會有失望或沮喪嘅時候,但同樣地希望總係伴隨,每一個人嘅路都不盡相同,最重要嘅係我地如何選擇? 我地有無珍惜所有,活在當下?

令人深深敬佩嘅 Gustav Vigeland~~




離開 Vigeland Park,先乘搭 20 號巴士再中途轉 30 號巴士去 Bygdoy 比格迪島,Bygdoy 有好多個博物館,所以又叫博物館島,每個博物館都有唔同嘅特色,但時間有限,我只係揀咗兩個去.......首先去 Norsk Folkemuseum....

入場費 125 NOK,持 Oslo pass 可以 free admission~


 挪威民族博物館係一個佔地相當廣嘅 open air museum,收集咗來自挪威各地超過一百五十多棟七至十九世紀嘅傳統建築物,有農舍、穀倉、馬房等.....

呢 d 木建築個造型好有趣~


好似係 storehouse




呢個好明顯係 theater 啦~
 

最特別應該係呢座外形相當獨特嘅木教堂


 

呢個角度似泰國 d 廟宇囉~


可以入內上樓參觀~




Sami 人住嘅帳篷,Sami 族係冰河時期後就生活響極圈嘅原住民~

另外仲有 exhibition room 展示好多民族物品~





參觀完就過去附近嘅 Viking Ship Museum,由 Norsk Folkemuseum 過去只係一個巴士站,步行亦只係五分鐘路程~
 


Admission fee 要 80 NOK,持 Oslo Pass 免費~



呢個博物館好簡單,只係去睇三艘維京船.....

1904年挖掘嘅 Osberg 號,據知係大約公元 800 年時嘅女王座船,個女王死後就索性做埋墓葬船~


好特別嘅船頭船尾蛇狀設計~

第二艘係 1880 年出土嘅 Gokstad 號,大約係公元 900 年左右下水,估計作為貿易同海盜船之用~


我覺得 d 維京人好利害囉,千幾年前已經做到咁宏偉嘅船~


第三艘 Tune 號出土後無再修復過,所以好殘破~


參觀完兩個博物館就搭返 30號巴士返市區......首先去 City Hall 逛逛.......




奧斯陸市政廳有兩個吸引我地嘅地方,第一、呢度係每年頒發諾貝爾和平獎嘅地方,第二就係佢有一個 show room 擺放咗孟克 Edvard Munch 嘅畫作~



一入去就見到好大嘅 hall,諾貝爾和平獎就係響度頒啦~~


和平獎呢一世就無機會攞啦,坐響度感受一下吧,話時話呢行長凳都幾舒服,坐到唔係好想走~~


呢個 hall 唔係金碧輝煌,但四面都係大型嘅油畫、壁畫,記錄住當地人民嘅文化同歷史~





有照片紀錄歷屆和平獎頒獎盛況,一邊睇相一邊可以想像當時氣氛,下面呢張就係 2009 年奧巴馬得獎~


和平鐘


二樓有好幾間展覽室~


其中有一間房係放咗 Edvard Munch 嘅 "Life",不過入到去成間房好多人好似有 d 咩 function 咁,我都未睇真幅畫 d staff 就已經要清場,有 d 失望囉~


議會廳


參觀完 City Hall 就離開出發去 National Gallery.......


沿途經過 National Theater,外型好古典~

National Gallery admission fee 係 100 NOK,不過持 Oslo Pass 又係免費~


叫得國家美術館,佢嘅收藏質量當然唔簡單,時間所限,我當然只係集中欣賞我最喜愛嘅印象派作品,基本 Renoir, Cezanne, Monet, Gauguin 等等一定走唔甩.......



連 Picasso, Matisse 都有~~




不過當然最重要係睇 Edvard Munch......之前 plan 行程時曾經考慮過要去 Edvard Munch Museum,但時間上唔係好夠,而個 location 響另一邊唔係咁就腳,當知道 City Hall 附近嘅National Gallery 原來都有佢嘅「吶喊」,一於疊埋心水只係去 National Gallery 就算~

最期待嘅「吶喊」!! 大家睇下佢個筆觸同色調! 完全係一種極度不安嘅感覺!


仲有 "Dance of Life"~~



欣賞完名畫,帶住十分滿足嘅心情離開,行返去位於海邊 City Hall 旁嘅諾貝爾和平中心......

呢個 Nobel Peace Centre 上世紀係火車站,所以外型好古典~


入場費 100 NOK,持 Oslo Pass 當然又係免費.......中心介紹諾貝爾和平獎嘅歷史,以及展示歷代和平獎得獎者嘅資料.....


2010 年嘅得獎者,特別巨大嘅照片,當日去嘅時候佢仲未逝世呢......諗返起佢嘅「我沒有敵人.....」,何等嘅胸襟啊~~



參觀完諾貝爾和平中心,終於向住呢一日最後一個景點 Oslo Opera House 進發.....


歌劇院響 Central Station 附近,因為面對住港灣,景觀一流~~

佢外形嘅設計跟悉尼歌劇院完全唔同 feel,雖然好似無悉尼歌劇院咁出名,但我就好鍾意佢簡約嘅風格.......


最特別係遊人可以沿住 building 旁邊嘅斜坡行上屋頂.......

一場嚟到,當然要走上去逛逛~





呢個響海中咁型嘅建築物唔知係乜東東?

 

再入去室內參觀一下.......

內部設計都十分型格~~




終於完成晒第一日行程,想去嘅景點都順利去到,亦無迷路,好開心,哈哈.......之前 plan 行程時打算夜晚響車站附近嘅 Karl Johans Gate 購物大道逛逛同 dinner,不過逛咗成日,之前又坐咗十幾個鐘頭機,年紀大實在有 d 攰,於是決定結束行程搭國鐵早 d 返酒店~




今晚入住機場旁邊嘅 Radisson Blu Airport Hotel,一向都知道北歐物價好高,不過事實上今個 trip 嘅酒店又無想像中咁貴喎,至少就無瑞士嗰  d 咁貴囉~

房間都好闊落,設備亦齊全,好 OK 呀!!





順利完成第一日行程,好 happy 呀,第二日就要暫時離開挪威飛去瑞典先啦~~

(...待續)






3 則留言: