DAY 1
PART 1 (香港...東京羽田...新千歲...南千歲...)
今次嘅旅程，開始得比較冒險，身邊每一個人聽到我地揀嘅出發日期，都不約而同表示「有無攪錯???」
於是，呢一晚我就滿腦子都充塞住D北海道嘅蟹呀、雪糕呀、海膽呀咁如常去考試，老爺放左工就返屋企沖完涼，攞埋兩件行李去試場等我......考完試兩條友就即刻衝去機場，正式開始今次呢個北海道之旅喇~~~
我地嘅旅程係由機埸入面嘅味千拉麵開始嫁......
老爺嘅吉列豬扒拉麵 + 餃子，$66~
我嘅叉燒拉麵 + 炸雞，$64~
其實平時都唔係咁鍾意食味千拉麵，覺得佢地D味道太濃，但係今次啱啱相反，無味嘅，好難食
食飽無事做就周圍行下.....平時響機場，硬係覺得唔夠時間行佢D shop，次次都行到last minute，然後就趕頭趕命咁入閘，今次好早去到，有大把時間慢慢行，D shops同免稅店好多都收十二點，夜晚又唔係咁多人行，逛得好舒服好自在.....人一開心D購物慾就不斷咁湧出黎，未上機已經出血啦~~~~
呢個Godiva 朱古力豆俾市面平D嫁，係咁意入DD貨啦~~
買完野有$50 coupon，為左唔好嘥左佢，於是就繼續買野啦......
Longchamp D手袋有折呀，屋企嗰個只可以手抽咋，我想買個大D同可以肩揹嘅size好耐喇，搵到有紫色呀.....
不過呢個size無discount喎.....唔緊要啦，最緊要買呢剎那高興，千祈唔好一開始就俾自己掃興!!! 同埋老爺都唔係咁鍾意我攞緊嗰個Agnes B，佢話好大個好論盡......為左佢老人家可以響成個旅程睇得順眼D就拿拿聲買黎即刻換左佢啦.....
點知俾錢時個sales話張coupon只可以用黎買香水用，見我一副好失望咁樣，個sales就話俾過另外一張$80嘅coupon我地用呀.....嘻嘻，本來只係預算減$50，而家減$80，賺左呀!!!!!!
逛到十二點，D shops開始close，咁我地就響Starbucks坐低嘆返杯咖啡先啦~~~
我地搭JAL 1:35嘅班次，兩個人傾下計嗡下D無聊野
上機就開始瞓教，不過好快就俾老爺推醒，食早餐呀
今晚呢班機唔full，我地隔離無人坐，於是老爺就索性坐去側邊位，俾左兩個連位我攤響度瞓.....有得攤響度瞓，雖然都要屈小小腳，但都真係容易瞓著D嫁
起身個天已經光晒喇......飛機下面係大板呀~~~
真係死蠢!!! 原來張凳近頭頂位有得調教坐響度可以瞓得舒服D嫁，可憐老爺朝早先發現到，成晚個頭fing黎fing去，無教好瞓.......
當地時間6:45就到左東京羽田嘅國際航廈，唔駛半個鐘就過左關同攞埋D行李，之後就搭無料shuttle bus去Terminal 1，好快就攪埋轉機嘅check in同寄艙行李手續喇~
攪掂晒都只係七點十五分咋，呢個時候梗係走去toilet梳洗一下啦....
執返掂晒D眼耳口鼻
Terminal 1 呢個shopping mall都幾大嫁，雖然咁早好多舖都未開，但單係睇賣野食嘅店已經好開心.....
逛左一陣就過關喇，因為係內陸機，所以手續好簡單，連水都可以帶去上機，只要攞出黎俾D職員響部機掃一掃無問題就可以.....
原定8:15飛嘅機，攪左好耐差唔多8:40先響羽田起飛，十點鐘就到新千歲，個幾鐘頭無電視睇無飛機餐食都幾悶，不過睇下雜誌都好快就到........
早晨呀，北海道，我地又見面喇~~~
落左機攞返晒D行李，我地就搭10:34 嘅JR去南千歲，一個站只係三分鐘嘅車程，都要300 yen.....
本來機場有免費接駁巴士去Rera Outlet Mall，一個鐘有兩班車，不過時間唔係咁啱，而且車程要成10分鐘，對於我呢D購物狂黎講，預左出外玩，金錢唔係最重要，時間先係最最最緊要嘛~~~~
話咁快就到左南千歲，即刻搵locker放低兩個大喼先.......最大嘅locker可以放得落兩件行李呀，只係500 yen咋......
呢度嘅locker唔係獨立入錢嫁，係用電子system，有齊中英日語說明，好簡單方便....
有埋收據俾你~
攪掂就即刻衝去outlet啦~~~
上次黎呢個outlet係落住大雪，今次可以見到路邊嘅野花呀~~
朝早靜俏俏，而且天色好陰暗.....不過都無損購物嘅興緻
響outlet逗留左兩粒鐘，我買左唔係好多野咋，反而老爺就買左幾件衫
下一篇︰札幌，我地又黎探你啦~~~
piggybread : 呢種深夜轉機式 , 我都未試過 , 成日 "形" 住會冇覺好 , 到訂後殘晒 , 有街都唔想去 , 返酒店覺 , 得不償失 .
回覆刪除上次我都諗住去Outlet , 不過時間唔許可 , 果度多唔多野賣架 ?
Bye Bye !
[版主回覆08/31/2009 23:06:00]凌晨機其實真係幾累，不過你D後生細女應該唔怕啦，搵次試下啦，慳返好多時間嫁......南千歲呢個outlet都有百幾間店，未至於好大，但都OK啦，D店都幾啱行，因為有我最鍾意嘅Coach，同埋有幾間老爺鍾意嘅Sport shops，不過就無Nike囉.....最主要係近，唔駛山長水遠搭好耐車就去到~
熊仔 : 無紫BEAR份我唔睇喇,亞不你睇啦!!
回覆刪除唔係呀都有隻紫BEAR呀!!
熊仔 : 我鐘意個隻唔係哩隻呀!! 我唔鐘意 D BEAR 唔梳頭架!!
唔係吖都幾型吖!!
嘩,未出發已經殺過片甲不留,今次一定大豐收啦!!
[版主回覆08/31/2009 23:20:00]熊仔，你好!! 我唔係無梳頭呀，呢D叫自然美，你唔覺得有一種好free嘅感覺咩?! 我係一隻Lavender bear，有香味嫁，我係由阿姨響法國買返黎送俾piggybread嫁....anway，你點都試下欣賞我啦，我而家係佢最首席得寵嘅pet呀~~
使唔使咁興呀 唔知仲意為妳第1次去旅行 只睇呢篇blog我估妳17歲 不過真係感染到嗰份喜悅
回覆刪除[版主回覆08/31/2009 23:25:00]Hehe....我其實都係比17歲多DD啫 .....
無論第幾次去旅行，只要有得出去玩，我嘅心境都係保持響17歲嫁~~
對腳都未離開香港就已經血拚, 可想而知你今次一定收獲不少, 但見你買得如此興奮, 做觀眾的我也跟著高興起來 , 快快寫下一篇, 太想知道去到札幌可以有幾瘋狂
回覆刪除[版主回覆08/31/2009 23:30:00]呢D咪叫喪拚囉 ......其實去到札幌都無咩買野，今次有D失策，無預好多時間行札幌.....
Outlet 入面有冇locker架?
回覆刪除[版主回覆08/31/2009 23:32:00]有嫁，連大locker都有，如果唔夠擺，亦可以寄存響服務台，都係500yen~
嘩! 係香港未上機都掃件先, 你真係餓左好耐咁
回覆刪除一到步第一個行程又係outlet掃貨, 買得好興奮呢
唔怪得知你話東北餓買野, 引至北海道沿途要發威呀
[版主回覆08/31/2009 23:40:00]上次東北真係無咩買，所以留左好多本今次買呀 ....不過睇返今次嘅戰績，其實都係一般，早兩年先恐怖，試過total十一件行李返港.....但其實都係D無謂野囉，所以而家都開始收歛緊 .......
真係實至名歸, 未出發都買咗咁多嘢! 其實咁樣飛眼唔眼瞓嫁? 第一日仲去 outlet 添! 這一篇, 令我好掛住北海道.
回覆刪除[版主回覆08/31/2009 23:44:00]老實講，真係幾累，到左傍晚真係好想返酒店瞓.....
掛住北海道就快D開始plan行程啦 ~~~
佩服 佩服 ,未上機己出擊 SHOPPING , 難以想像之後旅程景況 ~
回覆刪除[版主回覆08/31/2009 23:52:00]呢D係假象黎嫁，今次嘅戰績都無預期咁多，只係一般咋，比上次東北好少少咁囉 ......
唉....每次睇你0既BLOG就係到諗....幾時到我去!!!你寫得太精彩啦!!!
回覆刪除我十二月都會坐零晨1點40分機去，不過就係ANA，之後接8點機，都有少少驚趕唔切，不過睇你噤寫應該足夠有餘，因我諗住租ANA0既手機，所以要係轉機0既中途時去取機!!!!
嘻嘻...我都諗住一落機就去南千歲個個OUTLET，唔理有無野買，去左先算!!!!!!不過都希望訓到，如果唔係咩都無興趣!!!!!
[版主回覆09/01/2009 00:08:00]ANA都幾好呀，我都鍾意坐ANA，不過今次ANA個package比JAL貴D，所以揀JAL.....咁你同我嘅時間差唔多，應該無問題趕得切，因為我響Terminal 1 個toilet帶con同執眼耳口鼻都攪左十分鐘，你先去攞左部機先，至多唔逛 D shop住，返香港先行囉，ANA響Terminal 2轉機，Terminal 2都好多野行嫁!!!
Outlet係一定要去嫁，去日本唔去outlet好唔舒服嫁....希望你一去到就買倒野啦，如果唔係，失望加一晚無好瞓就會好down，我就係人辦喇......
你老爺對你真係好好呀 我也喜歡godiva，duty free shop賣幾多錢呢? 見你shopping真係令人都覺得同你一齊興奮呀 加油加油, 快點寫下篇!
回覆刪除[版主回覆09/01/2009 23:40:00]$46一盒，響市面好似要$50!....買三盒就賺左十幾蚊，你話係咪唔買都對唔住自己啦~
我下年新年去東北啊! (睇到你啲東北行程和相咁靚) plan 咗行程嫁喇, 而家冧緊爸爸批准. (因為佢話唔去. 佢好衰嫁, 成日撥我冷水)
回覆刪除[版主回覆09/01/2009 23:46:00]佢玩你啫?? 一家大細一年去一次旅行都好應該啦，東北好正嫁，你響佢面前日哦夜哦就得嫁喇，我都係用呢招咋!!
已習慣坐零晨機, 我家傅小孩也得到我兩遺存, 一上機就訓, 連飛機餐都唔食....哈哈, 連外星人都知道你鍾意買野, 有咩可能只買左少少, 完全不可信, outlet當然要去, 但去得多就覺得個個差不多
回覆刪除[版主回覆09/01/2009 23:57:00]連傅小孩都習慣坐夜機，你真係訓練有素......不過幾眼瞓都好我都要食佢個餐嫁，天生愛貪小便宜無辦法
係呀，D outlet都大同小異，去得密真係熟口熟面，所以今次去都無咩買到，但係唔去又覺得好似爭咁D野，點都要花一兩鐘先覺得對得住自己~
你真係明白我同爸爸, 係呀, 我而家用緊呢招 - 日哦夜哦.
回覆刪除[版主回覆09/03/2009 23:50:00]祝你成功啦，不過我相信佢最後一定會應承嘅 ....唔怕話你知，我D日遊症又發作(其實都無點停過)，剛剛去完返黎又成日響度哦出年~
你考完試即刻上機，真係「搏」！
回覆刪除[版主回覆09/03/2009 23:52:00]係呀，個個都係咁講，有得出去玩我真係咩都做得出嫁~
我諗我差不多成功喇, 佢開始軟化. 我有時都係度諗我係咪有病, 成日諗住啲行程. 原來唔係得我一個係咁. 咁你新年去邊呀?
回覆刪除[版主回覆09/05/2009 11:45:00]我好想去白川鄉呀，不過仲係妄想階段，只係同佢提左一句佢已經話我係咪痴左線，啱啱返黎咁快又諗下一次，不過我會努力嫁喇 .....
我諗好多女性網友都同我地一樣，成日掛住出去玩，但係另一半就費事睬我地囉，我有時癲到得閒會plan定幾條路線以備不時之需，雖然都係發夢多，但plan 下都覺得好開心....咁你個行程出左未呀? 幾時post 出黎睇下啦~~~
講得好啱, 真係 plan 吓都開心. 我都係係年頭, 啱啱去完北海道那時, 都plan 咗下年新年去東北10天, 行程都寫埋, 但見電占&豆豆的白川鄉 (同你一樣) 咁靚, 所以我現在改為 : 東京 -> 名古屋 -> 高山 -> 白川鄉 -> 大阪 -> 大宮 -> 輕井沢 -> 山寺 -> 銀山 -> 藏王 -> 鶴の湯 -> 仙台 -> 東京
回覆刪除(2010年2月13 & 14 號白川鄉有點燈, 真係唔好錯過)
所以現在我又要重新整理我啲 schedule, 我都知我有啲貪心, 去咁多地方, 希望唔使改啦!
我諗我已經得米喇, 今日同爸爸吃壽司時佢話下次去日本又要勁吃壽司, 又問我 book 咗酒店味, 我個二女講咁啫係同意去日本啦, 但佢又笑而不答. 但返到屋企又找吓佢對手套, 話下次去日本帶一對滑雪手套就得同埋唔好帶咁多衫, 又話係咪又帶番嗰大喼. 我諗佢都係默許咗囉. 你的正策 - 日哦夜哦好 work 嫁, 你都應該得嫁喇.
[版主回覆09/06/2009 22:48:00]你老公好可愛，明明已經應承去，仲要響度慢慢漏口風!! D男人有時好似D細路仔咁嫁，成日特登玩我地，不過你成功左都好替你開心呀~~
你出年都橫跨好多地方喎....你就好啦，可以去十日咁耐，我一定唔得，因為老爺公司好忙，每次唔可以請太耐假~
不過現在啲 yen 仲係好貴, 8幾, 真係痴線, 希望佢年尾回落啲. 同埋機票都貴咗好多, 我今年係 3780 東京 (nwa), 但今年話要 4780, 仲係 waiting list.
回覆刪除[版主回覆09/06/2009 22:53:00]唔好嚇我，咁快已經要waiting .....你係咪搭農曆假期去先咁爆咋??
D yen真係升到痴晒線，我地都係唔好抱咁大期望，到年尾睇怕都係咁上下 ......