Dinner @ 定食 Doraya

尋晚我地又落左去銅鑼灣食飯，今次揀左呢間專門食吞拿魚定食試下....好好彩，去到仲有兩個位，唔駛等~~

呢間店主打食吞拿魚，全店sell嘅九成都係吞拿魚食物，有好多款吞拿魚定食揀，價錢由八、九十到二百幾蚊都有，另外仲有壽司，就咁睇menu淨係定食都有d眼花撩亂.....我好想揀最貴嗰個極上吞拿魚腩定食，不過老爺話都未黎食過唔知質數點樣所以只準揀d中間價錢試下先，見我嘟晒嘴佢就話留返下個月去北海道食仲好啦，咁佢咁樣講都有道理嘅~

老爺點左個火燒藍鰭吞拿赤身飯定食....

成日聽見人話藍鰭係正野，老實講真係唔識點分，不過呢個微燒過嘅吞拿魚，幾好味，唔錯喎~

我嘅藍鰭吞拿魚定食

一碗有成八、九片吞拿魚，魚生片幾新鮮，切得都算厚，未至於話超好味，不過已比一般市面嗰d好，百幾蚊真係算好抵食~~

兩件玉子幾厚，唔錯~~

個湯都ok，有好多蜆肉嫁~

本來我地仲叫多個燒吞拿魚面珠"燈"，不過後尾話無晒，唯有改左要鹽燒雞翼~

呢間野d食物整體都唔錯，不過我地都覺得個定食嘅前菜d味道好怪，好似有d"宿宿"地咁味，所以唔敢食.....同埋呢度地方好細，基本上兩個人一張細枱，手袋只可以放響膝頭上面，咁啱我又係shopping完，一袋二袋只好放晒響腳邊，咁都唔緊要，最唔舒服係佢地將兩張枱set埋一齊，一條空隙位都無，好似同隔離d人搭枱咁.....

同場加映︰食完飯老爺竟然話唔係好夠飽，於是走左去附近嘅人和食豆腐花....

豆腐花唔會太甜，依然好滑~

當然唔小得魚肉煎豆腐啦，外脆內滑，好好味呀~

食到飽一飽，跟住我地就走喇~~