Dinner @ S Melange

近排好似成日都食日本野，今次轉下口味.....有朋友介紹呢間S Melange，地點比較隱蔽，響銅鑼灣百樂中心，即係Times Square後面~

我地去到未夠八點，但係無咩客人，可以安排window seat俾我地，坐得都幾舒服，望出去有少少跑馬地view~

呢度嘅menu係得一張紙咋，基本上係食set dinner，可以揀5個或3個course，相差幾十元，我地兩個都揀左要5道course~

呢間餐廳嘅裝潢幾優雅，不過d枱布就好似縐左d.....環境好清靜，情調幾好，因為燈光好暗，可以話係幾浪漫，不過要影相就一定要用閃燈~

麵包籃附有成個garlic bulb，塗麵包好好味，感覺上好過用牛油，反而另外有個有herbs嘅橄欖油我就覺得麻麻地....

頭盤有八款咁多俾人揀，不過我地都係要foie gras，未至於好軟滑，但煎得幾香，兩片桃都好好味~

龍蝦湯就差左d，唔夠濃郁~

Main course 老爺要rib eye，我食左一口，好juicy!! 幾好味....不過老爺話一般，因為佢話全塊扒最好味嗰part已經第一時間揀左俾我食喎....

我要左個spaghetti with pama ham，味道ok，不過食完個鵝肝已經有d膩，最後又要老爺好努力咁幫我攪掂埋佢~

食飽後又係coffee & tea 嘅時間~~

兩個dessert等左好耐，差唔多十五分鐘!!.....老爺點左tiramisu，味道只係一般，無咩特別驚喜~

我本來只要雪糕，不過個waiter suggest話不如要心太軟，結果個朱古力真係好好味，唔膩同唔會太甜，好啱我口味~~

好鍾意佢地響每張枱中間放左張黑色紗簾，俾人一種privacy嘅感覺，不過至於service我覺得只係一般，當然你唔可以話佢差，但就一定唔夠貼心，其實呢一晚唔係好多人，但係d waiters 只係得兩個，想落order時等左好耐先有人黎招呼，到食緊時就反而成日響條走廊行黎行去，或者係因為愈夜就開始多左d人啦....不過食物質數整體唔錯，地方又有情調，絕對係傾計談心嘅好地方~~