2008年2月北海道8日遊 - Day 2 (漫遊函館)

2月22日  星期五

第二日啦，今日嘅行程係落函館。因為打後連續四晚都唔係住札幌，所以就預先pack好D行李，喺酒店食過早餐，check out 後將兩個大喼寄存喺京王到，拎住個旅行袋就起程啦！

我地搭嘅係Super-Hokuto 6，就係呢架啦....

班車8:43開，11:53就到啦，一路無話，全程都係瞓下醒下咁啦。不過沿路見到好大雪呢...

一到埗我地就將個旅行袋放喺locker到，喺觀光案內所攞左D資料同買定明天用嘅市電1 day pass後，就拿拿林去朝市逛囉！

嘩~~好大隻雪場蟹呀~~~

行左一陣，我地就急不及待去食午餐啦，黎朝市其實都係想食新鮮魚生之嘛！於是就走入去橫丁市場囉！

呢個就係我揀嘅set啦

果D海膽真係好鮮甜、好好味呀，喺香港係食唔到架！

食飽後番去locker攞返D行李後，就繼續下午嘅行程，去五陵郭呀！上次去係五月，落住雨，今次再去多一次，想睇下雪中嘅五陵郭有幾靚。我地搭往湯之川方向嘅市電，單程車資200yen，因為今日只係會搭兩程市電，所以就無用one day pass囉。

函館市電內嘅車資顯示屏呀~~

到左五陵郭前站落車，車站隔離有間丸井今井，想話睇下有無locker放低D行李先，點知咁大間百貨公司竟然一個locker都無呀 唯有拎住D野行啦，好彩行左一陣又比我地見到喺某間店無端端有棟locker呀，yeah！

行緊去五陵郭公園時，中途就已經見到個五陵郭塔喇，呢個塔係新起架，上次我地04年黎都重未見到，新起嘅呢個塔高90米架！

好快就去到，上塔就梗係要比錢啦，840yen一位。

呢個係電梯頂個天花板裝飾，係函館地圖黎架，綠色粒星就係五陵閣位置啦~~

由塔上面影出去嘅雪景呀~~

同澳門個旅遊塔一樣，不過澳門果個範圍大好多，得人驚D囉~~

影完相，行左個圈就落番去地下，原來有個花展呀，咁咪順便睇埋、影張相咁囉。

想影張大寫，點知老爺話我影花嘅手勢唔啱，唔識影喎，一手就搶左個相機去話影比我睇...左面果張係我影嘅，右面就係佢影架，都唔知有乜分別，咪又係一朵花

跟住我地就走出去個公園到逛下....個雪景都幾靚....

夕陽下嘅五陵郭塔，我老爺影架！

瞓下個雪地先~~

玩左一陣，都差不多四點，咁就走番去攞番D行李然後搭市電去酒店啦。

搭湯之川方向嘅2號車呀~~

我地今次又係住渚亭呀，因為上次個行程太趕，去到渚亭已經係七點，天都黑晒，第二朝又趕早車去小樽，連早餐都無食呀，所以今次點都要喺酒店到住番夠本補番數

去到酒店，原來係有專人拎住部note book同我地響大堂到check in架，重有welcome drink比我地揀，check in 後咁我地就喺大堂攤抖下，飲埋杯welcome drink就上酒店房，拿拿聲浸下溫泉先啦，我地間房係向海架，不過掛住浸唔記得影個私家風呂呀...浸完就等食晚飯喇，今次我地係響自己房入面食架，貴小小唔緊要啦。

日文餐單~~

英文翻譯~~

食飽後D亞姐就黎幫我地鋪 tatami，鋪完後見都未夠八點，於是就走落去大堂到行下同埋緊係做一D指定動作，shopping呀~~~~

有收獲呀

逛左一陣就返番上房又浸下溫泉，浸完睇下電視又再浸多次，咁嘅生活真係好寫意呀.....浸左幾次然後就瞓教啦，而今日嘅行程就喺好滿足嘅心情下完結啦~~~~~

-----> Day 3 (Part 1) 靈異事件部.....