2008年10月東京長野川越6日 - Day 5 (小江戶川越)

10月5日   星期日

去到第五日喇，今日約左雲妮妹一齊去川越玩一日。起身望出窗外天色都幾好，有陽光呀~~     

響酒店食完早餐就起程喇。我地約左雲妮妹8:15響京王等，因為佢地住響華盛頓，所以就揀左個大約中間位置而大家又熟悉嘅地點囉~~

去到京王已經見到佢地，我諗佢地一定有D壓力，因為雲妮妹話佢地平時去旅行好悠閒架，多數8點零9點先去食早餐，唔同我地成日趕頭趕命咁...今次約咁早真係唔係幾好意思....

集合後就行去JR車站搭8:44開嘅快速819，車程大約45分鐘。無見幾日，公司是非已經一籮籮，我地兩個八婆響車上雞啄唔斷，最初兩位男士都會聽下搭兩句嘴，不過好快就瞓著左啦....是非呢樣野就梗係愈講愈興奮，愈講愈大聲.....終於坐響雲妮妹老爺隔離果條友頂唔順出聲叫佢請我地兩個細聲D喎....真係尷尬.....

去到川越只係九點半，響觀光案外所攞左D資料，就出發去喜多院。行走川越市內有兩種觀光巴士，我地揀左搭小江戶景點周遊巴士，一日周遊券300 yen，同巴士司機購買就得喇....

黎到川越梗係要企響個JR站影張相留念先啦~~

好快就去到喜多院，呢個寺院係八百幾年前由唔知乜乜大師創建架，不過中間曾經有過多次戰亂，所以都有做過復修~~

入廟前梗係要洗洗手潔淨下個心靈啦....

呢個喜多院都係同一般日本寺院差唔多，都係以木搭建，寺內環境好幽靜，不過個人覺得始終都係京都嘅寺院印象深刻D囉~~

喜多院入面有500羅漢，要收 400 yen入場費。據旅遊書講D羅漢嘅表情好豐富....不過我實在無細心欣賞，因為D羅漢好殘舊架，爛容容咁....雖然話係歷史遺留落黎嘅古蹟，但都唔使舊成咁架，一塊塊咁剝落....仲要一個個露天咁係咁意放晒響個地下度....有無攪錯，收左入場費都唔做下復修....

中間果尊佛像就係釋迦牟尼佛喇....

呢張相係老爺影架，佢老人家最鍾意影埋呢D好似好有構圖嘅相，懶 pro 咁...

逛完喜多院，順手行埋仙波東照宮~~

好快就行晒個東照宮，繼續向住一番街嘅方向行，沿路都見到好多寺廟...

忽然見到有條shopping street，拿拿聲走入去，不過D店舖全部都未開...果時都已經12點幾啦，川越D人好似唔使做咁？！

唔好意思，對川越嘅歷史真係唔係咁大興趣喎...門外到此一遊算啦...

行行下見到有個唔知係咩嘅寺院，近入口有個好似用作腳底按摩嘅地方....兩個男士唔知係咪行寺院行得悶得滯，即刻走入去除鞋做返個massage醒下神...應該真係幾醒神，因為兩條友一路行一路喊救命....

行到咁上下，終於去到一番街，我地就決定搵野食抖下先~~

遇啱午飯時間，好多食店都好多人排晒隊，我地最後搵左間食蕎麥麵嘅...呢間野D麵係用幾隻碗一層疊一層咁盛住架，一層就叫一段，配唔同嘅配菜同調味架...

我同雲妮妹各叫左兩個三段，1100 yen，兩個老爺就都係要五段，1400 yen~~      

仲有川越名物，番薯，600 yen~

食飽後就繼續逛一番街，街道兩邊都係江戶時期保留落黎嘅古舊建築物，而家大部分都改做商店或者食店，有D真係幾古色古香架~~

呢棟建築物係川越嘅地標，時之鐘，有400年嘅歷史架喇~~

跟住我地去左藏造資料館，呢間野係由以前專賣煙草嘅古老藏屋改建而成嘅，展出嘅資料都幾豐富同有趣....最主要係入場費只係100yen咋，唔入去都好對唔住自己啦....不過又係好似入去D古廟咁，成日要除鞋，又除又著，仲要行埋D好鬼窄嘅木樓梯，真係頭都暈...

行完一番街就轉入去果子屋橫丁，都係一D糖果、小食、番薯饅頭等土產食品嘅店舖，每間都細細間，都幾有風味，不過就勁多遊人~~

無端端有間屋出面有個水池養左好多錦鯉....

狗仔想食錦狸.....

行晒個果子屋橫丁，我地走左去一間叫Mio Casalo嘅店舖，專賣由黑豚肉製成嘅香腸、火腿等野食...我地試左香腸，味道OK啦~~

食完香腸我地就去搭觀光巴士返JR站，不過個一番街巴士站搵左好耐先搵到，原來俾棟大柱遮住左。

去到JR車站先差唔多五點，我地諗住搭18:15開嘅JR快速1810返新宿，仲有成個鐘，見個車站一帶係D商場，咁就梗係shopping下先啦，於是就決定俾大家自由購物時間，六點鐘再集合囉~~       

我同老爺好快速咁行晒車站同附近兩個商場....無咩收獲，行埋車站下面果個supermarket都未夠鐘喎，咁就走出去車站外面諗住hea下啦，點知出到去見到好大群雀仔響天上飛黎飛去，D雀仔勁多呀，遇啱個天將近黑，見成群雀仔響個頭上面飛，都幾嚇人....

同雲妮妹佢地會合後，就搭JR返新宿喇。可能行左成日，大家響車上面吹左一陣水就各自去搵周公傾計喇.....

返到新宿都係七點鬆D咋，我地就去東方見聞錄食晚餐喇，貪果度D食物多元化同埋可以坐好耐都唔會俾人趕嘛....我同雲妮妹兩個人吹起水黎可以連講幾粒鐘都唔使抖架，早幾年試過同佢兩個人去旅行，我地可以由夜晚11點傾到四、五點....癲架...

呢間食店係用電腦落order架，研究左一輪，又問下個識講普通話嘅侍應，原來好易點菜架....就係太易，所以我地點完一樣又一樣，好似唔使錢咁....

難得響異地碰頭，所以我地四個人呢一餐晚餐都好盡興，淨係啤酒都飲左10樽，由七點幾食到十一點半先捨得走...

飲飽食醉，離開食店先發覺原來外面落緊好大雨....懷住不捨之心情同雲妮妹佢地講bye bye後，我地就返去酒店做我地最唔鍾意做嘅野喇...就係執行李！因為聽日就係行程嘅最後一日啦~~~~~

----> Day 6 新宿血拚!!!!