2009年12月台北是是但但咁就玩完4日 - DAY 3 (PART 1)

12月27日 (星期日)
烏來

話咁快去到第三日喇，朝早起身又落去酒店餐廳食早餐先........

今日我地諗住去郊區逛下，不過直到食早餐呢一刻都仲未決定去邊處，淡水同九份以前已經去過，比較有興趣就係貓空同烏來，但係我地又唔打算浸溫泉，去烏來好似無咩意思，至於貓空，睇落又好似無咩野睇咁，再睇埋北投同陽明山都唔係咁大興趣.......

幾丁友響餐廳磨左好耐都唔知去邊度，終於攪到十點鐘早餐時段都要close，最後我地就決定去烏來啦，雖然唔浸溫泉，但睇旅遊書都算係比較有DD野逛咁囉~~

烏來係響台北最南面嘅一個鄉鎮，由台北市出發先要搭捷運去新店站，然後再轉新店客運巴士.......去到新店站見到有幾條巴士線，但就唔見去烏來，於是就走入去遊客中心問左巴士站位置，原來響捷運站外邊右手面......

去到已經有好多人響度排隊，等左一陣有巴士到站，但太多人已經塞滿晒成架車，個感覺好似去左大陸咁，有D恐怖.......呢個時候有好多的士佬走黎兜搭，話每位100台幣，夠四個人即開車，又猛咁話搭下一班巴士有排等，車程要成九個字，的士只需要20分鐘......咁我地見為起港紙都係一舊水啫，二話不說上車即走啦!!!

的士大約行左二十多分鐘就到喇，沿途都幾多彎彎曲曲嘅山路，好彩揀左打的，如果要迫住企響架巴士入面我諗我會暈到七彩囉......落左車第一眼就見到條南勢溪，溪水都幾碧綠喎~~

沿住條溪行左一陣就去到烏來老街.....

過埋條橋就到.....

溫泉旁邊有好多溫泉旅館~~

老街有好多小食賣，不過講真，好多見個樣都唔想食........

烏來原本係泰雅族人嘅聚居地，所以久不久就會見到泰雅族土人嘅公仔~

原隻燒豬都有.......

成條街都好多遊客~~

連伊豆溫泉都有.......

呢度係免費嘅露天溫泉~

條老街唔係好長，好快行完，之後經過大橋.......

然後搭台車去睇瀑布......

要行長長嘅木樓梯先到車站~

烏來台車原本係運木材用，以前係手推車，而家變晒用黎載遊客，每位50台幣~~

呢架台車好古舊，D位都幾窄，無車門嫁，得一條鍊叩埋就算，上左車D職員都唔理你叩左條鍊未就已經開車.........車程大約七、八分鐘，都搖晃得幾厲害........

過左隧道就到站喇~

落左車就要行過條情人橋........

響情人步道漫步完影番張相先........

頭頂有吊車經過，係去山上面嘅雲仙樂園~~

有間烏來台車博物館，不過無咩興趣睇........

再行過D就見到條烏來瀑布啦~~

睇完條瀑布唔知做咩好，條街又無野行.........

於是我地就決定搭纜車去雲仙樂園逛下........(待續)