仲有兩個多禮拜就要出發喇!!
今次呢個trip嘅行程已經改左九千幾次，真係改到人都癲!!!!
原本想去埋三重縣嘅鳥羽同伊勢，但因為要去北面嘅能登珠洲，考慮到由鳥羽去能登，一南一北實在太遠，為免駕車嗰位仁兄太辛苦，所以最後忍痛捨棄左美味嘅松板和牛同伊勢海老......再加上細妹早兩個月去完高山返黎話都幾多野行，所以又要預一晚stay響高山........
咁其實能登珠洲有咩咁特別要山長水遠犧牲頂級和牛嘥一晚走去呢? 答案係其實無咩特別無咩玩嘅......吸引到我地去嘅原因只有一個，就係住宿嘅嗰間溫泉旅館，係我早幾年響雜誌見到已經夢想去嫁喇
，但呢間野實在太隔涉同太貴(仲貴過舊年響山形住嗰間橋本屋
)，所以都考慮左好耐，不過人一世物一世今日唔知聽日事，正所謂得快樂時且快樂，今次的起心肝豪佢一豪，玩到山窮水盡返黎先再搏殺過搵$$，希望物有所值唔好令我地失望啦~~
而家總算定左個行程大綱出黎，希望唔需要再改，因為日子迫到埋身要拿拿林detail 個schedule啦!!!
先睇睇個行程︰
Day 1
香港 (凌晨機) > 羽田 > 小松空港 > 金沢
宿︰ANA Crowne Plaza
Day 2
金沢 > 五箇山 > 白川鄉 (夜間 light up
....yeah!!)
宿︰大田屋
Day 3
白川鄉 > 飛驒大鐘乳洞 > 新穗高溫泉
宿︰槍見館
Day 4
新穗高溫泉 > 高山
宿︰高山桜庵
Day 5
高山 > 名古屋 (Shopping Day!!!!!!
)
宿︰名鉄グランドホテル
Day 6
名古屋 > 養老 > 越前海岸 > 芦原溫泉
宿︰芦原国際ホテル美松
Day 7
芦原溫泉 > 東尋坊 > 能登珠洲市
宿︰よしが浦温泉 ランプの宿
Day 8
能登珠洲 > 輪島 > 冰見 > 金沢
宿︰ANA Crowne Plaza
Day 9
金沢 > 小松空港 > 羽田 > 香港
今次雖然食唔到松板牛，希望都仲可以食下日本第一蟹 -->越前蟹，同埋人人食過都話正嘅飛驒牛啦
.......至於交通方面，自從上次響北海道自駕過發覺唔駛拎野走黎走去實在太舒服之後，超級lazy嘅我當然希望可以他他條條咁，有人可以做埋司機載我呢度去嗰度去享受人生樂趣啦，不過有人勁麻煩囉，一時話揸車一時又話唔想揸，因為未試過雪地自駕，而白川鄉偏偏就係大雪嘅地方，所以有人心大心細，成日響度日哦夜哦決定唔倒，攪到我遲遲定唔到個plan出黎.......到而家呢一刻，雖然叫做book左車，但最後都唔知某人會唔會改變主意，不過如果佢夠膽響最後一個禮拜先同我講話唔揸車，都有兩條路俾佢揀，一係唔好煩我自己上網check晒D鐵路同巴士班次，一係就同佢上演六國大封相
........
而家酒店confirm晒，車叫做book左，保險下星期攪埋，只係爭換YEN啫......問題係日元咁貴點換得落手呢，但等完又等，等下一個月又一個月，等到將近殺到埋黎都始終要換啦，只希望上天眷顧一下我地呢D日遊愛好者，求其響過年前搵一日個價位低返DD啦，一日啫，唔該啦~~~
沒有留言:
發佈留言