2010年2月日本中部北陸9日 - 從太空落下凡間嘅小盒子

2月19日 - DAY 1 (PART 4)

 

 

食完個豐富午餐，離開近江町市場已經將近一點，出到外面真係要叫救命，落緊大雨!! 唯有走番入市場睇下有無雨摭賣啦，點知搵左兩條街都無，無計，於是就冒雨走去出面搵巴士搭喇.......

金沢最著名嘅觀光點係素有日本三大名園之一嘅兼六園，特色所在係佢嘅銀白雪景，一場黎到點都要去逛下啦.......我地會響金沢stay頭尾兩日，之前plan行程時已經打算如果第一日有雪就即刻去左兼六園先，出發前響香港已經check定天氣預報話黎緊幾日金沢呢度只有今日會有雪，點知而家無雪不特止仲落埋雨

，真係唔得佢死，落住雨點遊園喎，於是我地就決定先去兼六園附近嘅21世紀美術館欣賞下現代藝術先啦~~

出到外面咁啱見到金沢隨心巴士站，check下條路線咁啱又係去美術館嫁，於是拿拿林上車.......

呢種巴士唔駛上車攞整理券，因為每程都係100円~~

巴士行左十三分鐘就到市役所．21世紀美術館站喇........一落車發覺好多白色點點野響天上面落落黎，開心到跳起，以為係落雪，不過其實係雨雪咋，但都好過只係落雨啦.........

落左車發覺周圍都做緊維修，搵左一陣先搵到個金沢21世紀美術館~~

呢個美術館據講係金沢市內近年嘅著名景點，單係美術館本身嘅外形，已經係一件大型美術品，曾經得到威尼斯建築商業展「金獅最傑出方案獎」嫁

.......呢個獎係乜東東我就唔清楚，不過我地呢D只係識附庸風雅嘅俗人，D旅遊書話係好野咪走去欣賞下囉.......

下面張相係extract from 美術館小冊子，係成個美術館嘅外形..........有一本旅遊書係咁樣形容︰「.....一整幢直徑約113米的白色圓形建築，座落在草地上，就像是一個從外太空掉下來的小盒子一樣，令人想要走近拆開來看一下。」.......大家有無想去「拆開看一下」嘅衝動呢??

呢個美術館話就話係免費入場，其實免費嘅地方只係限於戶外場地，室內大部份展館都要收費，定期展收350円，今期嘅定期展叫Shift.........

另外仲有特別展，如果睇埋就要1000円，1000円!! 老爺即刻斜眼睥住我

.......咁我話一場黎到當然順手睇埋啦，不過條友就唔多願，俾錢時對住職員姐姐個笑容好牽強下

.......無計，佢個人一向無咩藝術細胞，我唔會怪佢........

D展覽區就係分布晒響個圓形建築物入面，對於我呢種毫無方向感嘅人，行行下都唔知行左去邊，唯有靠老爺認路.......條友都唔知係唔係，好快已經話行晒，但我到而家都仲半信半疑，因為我明明記得唔知邊本書講過話有奈良美智嘅作品，但行完都見唔倒，所以我絕對有理由相信條友仔係為左快D逃離現場，就趁我認唔到路呃我話行晒，其實就skip左好多地方囉...........

館內最人氣嘅作品就係下面呢個游泳池......但點知差唔多去到隔住玻璃望過去只見水靜河飛，只係得個職員阿姐企左響度守住，原來話出面落緊雨唔俾人入去.......

唔係掛......唔俾入?! 頂!!

我地山長水遠走到黎無得入去近距離睇下?? 有無攪錯?! 落緊雨又有咩關係呀? 呢件野落雨唔見得人咩? 出到去俾雨 "dub" 嗰個係我地，我地都唔mind唔知又關你咩事呢??? 但日本人就係咁，規矩一籮籮，又唔識轉彎，同佢理論都嘥gas，唯有逛住第二度先啦~~

呢個美術館入面大部份展品都唔俾影相，只係得幾件permanent exhibits 可以任影，不過就算俾你影你都唔知影咩好，好似我地今次去到做緊嘅呢期特別展 Olafur Eliasson "Your chance encounter"，D作品全部都係利用光呀、影呀、顏色呀、霧呀、風呀呢D元素去構成，等觀眾用視覺、感覺去感受身邊嘅環境，好似其中有一個作品係一個好大嘅空間，入面只係充滿住五顏六色嘅煙霧迷漫，乜都無

，俾你影相你都唔知有咩好影，或者影黎做咩啦.......

(以下三張相片都係from Olafur Eliasson個官方網頁)

就係呢個喇，入到去個空間煙霧迷漫，天花板set左唔同顏色嘅光管......我地行左一個圈走返出去，都唔係好知做乜~~

個圓筒裝置不斷360度轉，入面D燈光就跟住轉.......????

呢個係一個作品，一個唔留意仲以為只係牆上面嘅裝飾

.........

下面呢個叫 "Blue Planet Sky" 係一個美國Artist James Turrell嘅作品，所表達嘅比較易明.......只係一間房，入面咩都無，天井就開左個大窗口，意思係將個天空切成一件作品，等你望上去唔同時間可以欣賞到唔同嘅風景，體驗到空間轉移嘅靜寂同光線嘅流動~~

呢個都算係作品，叫「雜草」

......咁都得?? 老爺當時笑得好大聲.....真失禮

........

(官方網頁圖片)

呢一排凳，講真，都唔知究竟係一件藝術品，定係俾人坐呢??

唔理咁多，行到攰一攰，坐下先......個兔仔耳朵都幾得意~~

自問後生讀書時都叫做讀過下D近代美術，但下面呢幾舊方塊，實在太令人費解

.........或者我當年讀嘅係十九、二十世紀，呢D係二十一世紀，中間爭左成個世紀喎，當然跟唔上啦..........

呢D凳至少有D美感~~

呢架車仔可以俾人坐上去駕駛.......如果話係俾人消遣我可以理解，但話係藝術品，sorry，我地呢D凡夫俗子真係好難明......不過講明係現代藝術，實在唔應該再用有無美感去衡量，正如而家香港D歌星，有幾個真係唱歌唔走音呢~~

逛完晒個美術館，老爺已經悶到嘔電，對眼反到上天.........行返出去發現D雨已經停左，個泳池開放返喇，於是可以走去欣賞下.........

呢個游泳池係一個叫 Leandro Erlich 嘅阿根廷藝術家所創作，所要表達嘅係人與人之間嘅互動.......咁即係咩意思呢? 我諗大概就係指企響泳池邊同泳池入面嘅人都可以望見對方，唔同嘅時間、唔同嘅角度、唔同人相互之間嘅一刻相逢，造就嗰一剎那嘅獨特感覺.........

 

 

老爺呢D咁實際嘅人當然唔會嘥時間同你去思考呢件野想帶出D咩訊息啦，以下係佢嘅comment︰有咩咁特別?! 只不過係整左塊玻璃係間房嘅上面，然後加D水造成錯覺啫，仲要個扶手嘅接駁位都做得唔夠精細..........(@$#@$!!)

影左幾張相條友就催話要閃，我話想一個響上面一個響下面影對方佢都唔肯，因為由上面行落去泳池底都幾遠，佢話做咩要咁嘥時間，影出黎D效果又唔會係清楚

........我當堂O嘴，但對住呢D完全無幻想力嘅悶蛋，你實在好難要求佢去接受一D九唔搭八嘅異想世界，而我地呢D小女人當然只能夠逆來順受，不過大家可以想像，同呢D藝術細胞zero嘅人一齊，有時真係只能夠嘆一句造物弄人，緣份嘅野真係半點不由人..........

其實成座美術館都係以透明大玻璃圍繞，四面都有出入口，得閒就可以走入去免費嘅展區坐下，感受一下空間嘅藝術........

響室外有呢D類似凳嘅裝置藝術，好似個公園咁俾你坐響度晒下陽光........

呢D喇叭物體係傳聲小耳朵，據講對住佢講野，D聲就會由唔知邊隻耳朵走返出黎......

我試左啦，都唔得嘅.......

響室外玩左一陣，老爺就猛咁響度催要走人，因為個天色開始好番D，可以拿拿聲趕去兼六園喎~~

逛完呢個美術館，體驗左21世紀嘅藝術，個人都無咁俗氣........至於你話用1000円值唔值呢個問題當然好見仁見智，不過我覺得如果你係一個肯對新鮮事物抱持輕鬆開放態度嘅人，一場黎到，何不花小小錢，親身去感受一下何謂無障礙溝通模式嘅現代藝術，話唔定你會從中搵到點點嘅趣味.......就算你覺得真係毫無樂趣可言，至少都可以好似我家嗰件蛋散一樣，理直氣壯咁以過來人嘅口吻同人講︰去過啦，都無野睇嘅，悶到七彩，嘥晒D錢...........

(待續 

)