2010年2月日本中部北陸9日 - 落住狗屎逛古都

2月19日 - DAY 1 (PART 5)

 

 

離開21世紀美術館，D雨已經停左，於是我地拿拿林走過去隔離嘅兼六園.......

兼六園有兩個出入口，正門口係桂坂口，另一個係響21世紀美術館旁邊嘅真弓坂口，由美術館行過去好近~

入園費300円.......

張入園券有show明邊個入口嫁~

兼六園貴為日本三大名園之一，最出名就係秋天嘅楓紅同冬天嘅雪吊，我地揀二月黎當然係想睇銀白雪景啦，出發之前都上網check過話呢一日會有雪.......BUT，終於黎到喇，唔好話雪吊，想搵粒雪睇下都無........

無雪不特止，行左幾步，只係行左幾步咋，天色又變黑，開始落起大雨!!

頂佢個肺，你早D落嘛，早D落就索性唔買飛入場啦!!!

我地無雨摭，響園內亦唔見有摭賣，唯有冒住風雨行左一陣，但真係唔掂，D雨愈落愈大，今日只係第一日，咁樣俾雨dub件羽絨點捱成個trip，於是搵處地方避下雨，但成個庭園都係露天，搵左一陣終於見到有個叫時雨亭，於是就響門口避下先.......

企左一陣D雨都無打算停咁樣，其實當時我地企響度呢個時雨亭都係兼六園入面一個景點，係一個茶亭，可以入去食和果子同抹茶，既然都係響度等，我就提議不如入去食住等，點知有人唔肯不特止，就響呢個時候，仲無啦啦開始發爛渣........

以下一段對白係好無聊嘅，只係本人想記錄低有D人非常無理取鬧，叫做留返個record咁啫，大家絕對可以快速skip左佢唔睇........

老爺︰係咪衰呢，頭先響美術館都叫你快D走，係都唔肯，頭先肯走一早過黎而家已經行晒成個園啦!!

我︰你有無攪錯，而家怨我呀?! 咁頭先個天有太陽，我點知忽然咁快又會落番雨??

老爺︰都同你講左D烏雲聚緊過黎啦，(好樣衰) 個美術館都無野行，係都要響外面留咁耐......

我︰咁俾左兩千円嫁，無理由咁蝕底咁快走，梗係要留耐D啦......

老爺︰留耐D做咩啫，九唔搭八，都無野睇!! 嘥晒D時間，你就係咁，成日因小失大!!

我︰咩因小失大?.......你而家咁惡做咩啫??

老爺︰我邊有惡，而家睇下係邊個惡!! 邊個又試響度發惡??

我︰

你做咩無端端鬧我??? 我而家生出黎俾你鬧??

老爺︰我邊有鬧你!! 話你兩句就發脾氣，淨係識發脾氣......(黑晒面)

我︰而家係邊個發脾氣先???........

(下刪N句扯火對白.......)

就係咁樣，兩條友火紅火綠咁響時雨亭外面吵左一輪........D雨無停嘅跡象，仲愈落愈大，最氣頂嘅係嗰頭俾錢入園嗰頭就落狗屎，一諗到咁我地D火就仲大，但咁樣響度等都唔係辦法，吵完大鑊一肚氣，條友唔say sorry不特止仲要一副懶cool咁樣

，於是我就發晦氣話走人搭車返酒店算.........

離開兼六園，響外面是但搵左個巴士站，咁啱有架local bus埋站，見係返金沢站，於是就拿拿聲上車.........巴士行左一陣，又試經過番近江町市場，原來響市場對面有間好大嘅Muji同Comme Ca.......呢個時候大家條氣都已經消得七七八八，有人就問落唔落車shopping，既然有人用我至大嘅弱點黎哄番我，我當然唔能夠抗拒啦，而且咁早又真係無理由走返酒店啫，落住雨shopping就最perfect啦~~

響Muji同Comme Ca逛左一陣，無咩收獲，外面都仲係落緊狗屎，於是我地就諗住去買返把摭.......搵左一陣，其實都有D款啱，點知有人又響度發老脾，一時話D款唔靚，一時又嫌貴，把把都ban我唔俾買!! 你話係咪煩呢，響Comme Ca買唔倒野我嘅心情已經有D down，而家買把摭啫，咁都要響度阻頭阻勢，佢到底記唔記得我今日成日都未發過市，一樣野都未買過嫁?? 真係火都黎，需知道阻人shopping猶如殺人XX.......三句唔埋又再同佢吵過.........

吵完大鑊後我地又走去搭local line bus返金沢站，今次火摭眼是但上嗰架巴士條路線比較兜得遠，坐左二十分鐘先返到去.......無無聊聊響巴士上瞓左一陣，通常瞓醒一教D唔開心野就會消失晒，所以到落車時我D火氣亦都收晒，於是我地又決定唔返酒店，又再搭巴士去shopping.......今次我地諗住去金沢市內最繁榮、最多shopping centre嘅香林坊逛下.......係，我知我地好無謂，淨係無啦啦搭嘅巴士都唔知搭左幾多程，又嘥錢又嘥時間

........

去到香林坊，我地終於響某間藥房買左把摭啦，千揀萬揀，大家唔好以為呢把摭有咩咁特別，其實只需500円，日本好興，透明嗰種囉，甚至而家香港都有得買........呢幾年去親日本都買，都已經買左N咁多把，帶返香港又唔會攞黎用，都唔知點解有人係都要揀呢種摭

.......

呢個時候先係將近四點，D雨亦細番好多，既然有摭在手，我地就決定先行去附近嘅長町武家屋敷逛下........

由香林坊百萬石通嘅日本銀行後巷，穿過好多狹長嘅小路，就係長町一帶嘅長町武家屋敷.........

呢度係加賀藩政時期中上級武士家族嘅居住地，連綿嘅石板小道，周圍都係黃色嘅土牆，同埋黑色嘅屋瓦~~

沿路都見到金沢最古老嘅用水，大野庄用水~

唔好以為呢D水道成個我地香港D坑渠咁，其實係俾以前金沢居民嘅用水同灌溉用，亦係女人嘅洗衫嘅地方，甚至係搬運木材嘅水路，用途非常廣泛嫁，簡直係古代人嘅生命之源~~

水道上久不久有道小橋，由一之橋到六之橋，總共有六座橋~

行無耐就會到武家屋敷遺跡唯一開放俾人參觀嘅野村家.......

野村家響加賀藩政時期曾經係年俸1200石嘅野村傳兵衛舊宅........係咪唔知我講咩呢? 唔緊要，因為我都唔係好知佢係乜誰，但如果我話呢位人兄係前田利家嘅家臣，大家嘅感覺又會唔會好D呢，前田利家，即係菜菜子嗰套利家與松喎，有D印象喇掛~~

野村家已經傳左二十代，屋邸本身已經損毀，而家保留嘅建築物其實係由第二度遷移過黎嘅富商家屋，只係個庭園保持當年野村家嘅模樣，而呢個庭園曾經俾日本庭園雜誌選為第三位嫁~~

入館費500円~

呢個就係被選為三大庭園嘅日式庭園喇.......真係睇唔出有咩咁靚囉.........

屋入面都係一般嘅古老日式樓房間格......

講真，呢個野村家真係無咩特別，或者係呢幾年響日本實在睇得太多呢D乜乜家，已經無咩新鮮感，不過一場黎到點都要到此一遊囉，基本上我同呢D乜乜家此生都應該唔會再有緣相見，今次唔參觀睇怕都唔會再有機會睇，雖則兩人夾埋成1000円，不過是但啦，出得黎玩都預左要洗一D無謂錢........同埋唔親身睇過點同人講話邊度邊度無野睇喎!!

行左個圈我地就閃喇........好高興出到外面有D shops，當然趁機shop一下啦~~

總算有DD收獲........逛完呢個武家屋敷，望下錶都只係四點半，於是我地就行返去香林坊，難得無再吵大鑊，一於延續我地個shopping mood，唔好俾佢停.........

(待續

)