2010年2月日本中部北陸9日 - 求求其其嘅一頓晚餐

2月19日 - DAY 1 (PART 6)

 

  

由武家屋敷行返去香林坊只係十分鐘時間，我地首先梗係去當地最人氣嘅Kohrinbo 109百貨公司逛逛先啦........

好快巡左一個圈，無咩收獲.......之後行過對面嘅Daiwa.......

呢個Daiwa亦都係一般日式百貨公司，即係勁多大家都唔會響日本買嘅名牌好似LV、Gucci、Fendi呀咁囉........其實都唔明嘅，D旅遊書成日同人介紹呢D百貨公司，試問有幾多人會真係嘥時間走去shop呢D頂級名牌?? 價錢又唔係平過香港，我咁鍾意shopping都唔會啦，唔該D作者有D sense，介紹番D啱我地平民百姓嘅shop啦~~

逛完兩座百貨公司，只係得一間Agnes B有D睇頭，不過都係忍住手先，留番過幾日響名古屋先搏殺........兩手空空，唯有行返去巴士站等巴士返金沢站，呢個時候又落起雨，好好彩下一班車就係去金沢站~~

返到去金沢站都只係五點幾，天都未黑~~

趁未天黑影下車站個古色古香嘅鳥居大門先~~

五點幾，去食晚飯又似乎太早，所以我地就走去酒店攞房先........呢間ANA Crowne Plaza D房都幾大，同東京嗰D爭好遠，唔錯!!

Washroom都幾闊落，最緊要係夠地方放我D一堆二堆林審野~~

窗外望出去個view都好開揚........

可以睇到金沢站嫁~~

 

 

響酒店hea左一陣，我地就行返去金沢站，響車站入面有個百番街，裡面有兩條手信街同兩條食街......好正，個人認為正過香林坊好多!!

呢個時候先六點，俾著平時我就一定會去逛手信街shopping下先，不過尋晚坐左一晚通宵機，一晚無覺好瞓，去到呢個時候D睡魔開始急call，D shopping mood唔該暫時都要休息下，所以我地決定今日早D去食晚飯.........

之前plan行程時曾經打算去試下金沢出名嘅加賀料理，不過老爺唔舒服無咩胃口，所以諗住是但食D野算........響金沢百番街兩條食街兜黎兜去，兜左好耐，但係老爺間間都唔係咁啱，話想食拉麵.......其實已經好攰真係唔想再行，俾著平時已發作左好耐，不過見佢唔舒服無理由唔就佢，唯有忍忍忍忍忍.......於是就改去車站外面嘅Forus搵食.......

呢個Forus係樓高七層嘅百貨公司，D舖都幾啱行嫁，好似Gap、Ozoc咁，好過香林坊囉........不過而家唔好諗shopping住，攪掂左個肚先........Forus 六樓成層都係食店........但行完晒成層，想話搵間食拉麵嘅都無，真係行到好沮喪，無拉麵咁就退而求其次食pasta啦，有一、兩間個款同價錢望落去都OK，點知條友又話成層樓冷清清無咩人氣，唔想響度食，都係想返番去百番街

.......頂!! 間間都唔啱已經無晒mood!! 行來行去最後又要走返去百番街，我對腳真係攰到好似唔係自己咁，但咁點啫，對住個病人，都要死忍啦，於是又行返去百番街.......

 

 

行到返去，又再巡多個圈，條食街有D咩食店我都幾乎背得出.......幾經波折，終於勉強搵左呢間叫 Caffe Arco........心入面真係媽媽聲，之前第一次行過時都已經提議食呢間啦，係都要我行到成隻狗咁先安樂

..........

呢間餐廳間格環境都OK，D枱就略嫌窄左D咁，有好多外籍人士響度hea 住食.........

我地叫左兩個pasta，下面呢個係我嘅煙肉意粉.......講真，我都算係垃圾口啦，但呢碟野真係唔好食，D意粉煮得太硬身，個sauce "杰" 到呢，我食左三份一真係頂唔順唔再食!!

至於老爺嘅野菜pasta，佢就話OK喎.......我好懷疑囉，無理由兩碟D質數差咁遠啫，不過佢嘅忍受力指數一向好強勁，單係睇佢點容忍我就知啦

求求其其食完呢餐，響百番街逛左個圈，好多舖都想shop

，好多野都想買

，不過實在太攰，而且老爺嘅狀態愈來愈唔掂，於是忍痛提早收爐，決定返番去酒店早D執野沖涼瞓覺啦~~

就係咁，我地第一日嘅行程，就係咁響唔係咁smooth嘅情況下渡過左喇，希望聽日D幸運之神可以眷顧返我地，D狗屎呀、D黑仔唔好再跟住我地啦唔該，因為聽日就要去我地呢個trip最期待嘅景點 ---> 去睇合掌屋，好緊張呀!!!

(待續

)