2010年2月日本中部北陸9日 - 告別白川鄉

2月21日  (DAY 3 - PART 4)

 

 

離開民家園，沿であい橋行返去商店街.......

一街都係人.......

周圍都係合掌屋，影相影到手軟~

除左合掌造民家園，白川鄉仲有幾間開放俾人參觀嘅合掌屋，明善寺係其中一間.....時間有限，我地唔打算入去參觀，始終對寺廟嘅興趣唔係咁大，望過下門口呢個鐘樓門就當去過啦~~

好多人都話白川鄉已經變得過於商業化.......我真係唔明，大佬，本本旅遊書都講明係旅遊熱點，諗都諗得到會商業化啦........商業化幾好吖，對於我地呢D庸俗嘅遊客黎講就啱晒口味啦，到訪嗰幾個鐘啫，想點呀? 有大自然嘅雪景、有唔算太貴入場費嘅展覽館、有做你生意嘅土產店同食店......仲有仲有，我最enjoy嘅一part，久不久就有同聲同氣嘅遊人響你附近扮專業攝影師......唔駛睇，齋聽都覺得型!! (唔知由幾時開始，而家D香港人個個都手揸牛龜咁大部嘅相機，D鏡頭長到阿媽都嫌阻訂.....我地兩兜友只係拎住兩部隨時收得埋落衫袋嘅DC仔響旁邊不斷滴汗ing

)......唔好誤會，我地真係鍾意咁樣嘅旅遊模式嫁，所謂人生百態，響你身邊擦身而過嘅人都係一幅風景......D人成日話要識感恩，我有嫁，基本上呢度有齊一個旅遊區域所應有嘅設施.......你可以又鬧我係朽木不可雕

，但老老實實，大家唔係真係諗住純粹只去望一下所謂嘅文化遺產掛........如果該處景點D人同舖都唔多個有咩意思先，開講話獨樂樂不如眾樂樂嘛，熱熱鬧鬧咁就消磨左半天，我覺得不知幾寫意.........

 

吹完水，繼續睇下合掌屋.........

點解我地D坑渠蓋唔好似人地咁攪下花樣呢? 行步路都多一D趣味嘛，不過如果政府又係整D N年前嘅漁港船家，咁就 no, thanks 啦~~

個屋頂D雪厚到好攪笑......

行到咁上下，係時候shopping一下先.........

行得攰可以坐下.......

好古舊嘅兒時玩具~

街頭小食店，正!!

有圖片，仲有埋計算機，哥哥仔連一句野都唔駛講~~

呢個煙煙韌韌，只係70円......

飛驒牛串，400円，好好味呀!!

一路食一路逛街，諗起呢個時候香港一眾親友響度返緊工做到成隻狗咁，真係忍唔住笑左出黎......

呢棵樹俾人斬淨半截，攪咩呢?

行到咁上下就到長瀨家，本來原先我地打算去和田家，不過既然黎到是但就入呢間啦，反正對於我地黎講D乜乜家都係咁上下啫........

入場費300円

每年四月白川鄉D村民就會一齊走上屋脊，合力將D舊茅草除去，重新換上新草.....望住呢D資料圖片，可以幻想當時嗰種虛憾場景，TVB成日話咩眾志成城為公益，真係九唔搭八

，所謂眾志成城用響呢度仲貼切~~

為左影呢個炕爐老爺攪左好耐，因為D日本遊客響度對住個爐左睇右睇chat極都唔願走.......我只能夠話D日本人真係好有heart黎睇佢地D文物，唔同我地只係想影張相.......呢個唔係外地唔外地遊客嘅問題，你試下走去故宮，睇下有幾多華人真係企響一件古物前細心研究欣賞........

嗱，我都話啦，唔理係咩，我只係想影返張相.........

無處不在嘅飛驒寶寶~~

長瀨家樓高五層，開放嘅一樓展示祝祭、醫療用具，三至五樓就係陳列生活用具同養蠶等農耕工具........

講真，對D農具無咩興趣 (古時D人，日本又好，中國又好，歐洲都好，D農具睇怕都係咁上下啫，響我地呢D lay-man 眼中有幾大分別??)......都話咯，俾左入場費，我只係想影返D相.........

我地比較有興趣嘅係合掌屋嘅結構........

你諗下，整座合掌屋一根釘或鏍絲都無，全靠木樁、禾草等結紮鑲嵌而成都可以咁堅固......真係唔到我唔諗，點解內地嗰D豆腐渣房屋同學校咁易就倒塌，話晒都有小小鋼筋水泥喎........(我知，有人會話邊有豆腐渣工程!! 咪響度危言聳聽......OK，你話無就無，你鍾意點講都得添!!

)

叫你爬上去最高點望返落黎你都未必夠膽，仲話要結繩......

望落樓下都有D驚........

參觀完長瀨家，繼續街頭漫步.......下面呢間屋仔好得意，原來係神田家.......sorry, 唔入lu，今朝參觀過民家園同長瀨家，咩都睇夠啦~~

望下錶，將近十二點，係時候返歸~

沿小路兜返去駐車場大街.......

白川鄉觀光案內所

又係shopping time!!!

響呢間檔仔，老爺終於搵到佢老人家一直念念不忘嘅超級掌門人專用嘅按摩腳板，亦係我地響白川鄉買嘅最後一份紀念品~~

 

下午我地打算先去飛驒大鐘乳泂，估計要一個多鐘車程，所以就決定響白川鄉解決我地嘅午餐，實行黎一個白川鄉最後的午餐~~

求其響駐車場附近搵左間食店.......

十二點都好多人喎~

唔該自己斟茶~

有圖片，基本上都係定食........

我要左個岩魚鹽燒定食........

老爺嘅蕎麥麵定食~~

食飽飽老爺去俾錢，我就做返份內事，去souvenir corner 觀摩一下........

攪掂晒去攞車，架車泊左一朝都係500円~~

Bye-bye!! 白川鄉~~

告別白川鄉，我地向住奧飛驒進發........黑仔事件又黎嘞!!

(待續

)