2011年2月北海道道東道北12日 - 風水夕食

2月25日 - DAY 7 (PART 5)
然別湖

響然別湖閒逛左一陣，天色開始陰暗，我地就行返去酒店嘞~

上房之前我地首先去左Nature Centre 嘅 counter 預約第二日朝早玩熱氣球先......

好想玩升空熱氣球呀，上次去富良野本來諗住玩，點知遇著落狗屎無得玩，希望今次玩得成啦......職員同我地填左申請書，不過講明未confirm，要睇聽朝嘅天氣情況，佢地七點前會打電話同我地confirm~

之後我地就上返房......外面又落起大雪.......

 

我地約左六點鐘dinner，響自己部屋食，仲有差不多成個鐘時間，當然係換返件浴衣去大浴場泡個熱湯先啦~

大浴場響二階......浴場旁邊仲有massage room，駐守嘅嬸嬸好好人，見老爺同我影相，主動幫我地影合照，真係唔該晒~

影完相就去浸浴啦.......男女有別，女士展望大浴場「彩雲」


(酒店網頁圖片)

男士展望露天風呂「天風」......男士嗰邊個view 開揚好多呢!! 日本人重男輕女嘅觀念仍然好重，真係唔要得!!

(酒店網頁圖片)

同老爺約定左個時間就分道揚鑣，各自去浸浴嘞.......女湯一個人都無，yeah!

浴場設施都好齊備......

連BB床都有......莫非俾媽咪放低個B 響度然後自己出去泡湯??

浴場入面好煙霧迷漫，d 水好熱呀.......不過一個人都無，舒舒服服沖個涼洗埋個頭先落水.......自己包場，正! 我又可以響個長形浴池游水，哈哈~~

除左大浴池，仲有按摩池，唔駛同人爭，good 呀.......泡完湯又有熱茶飲，好舒服呀~

同老爺會合之後就上返房，呢個時候只係五點十個字，約左六點鐘dinner，但去到房門口已經見到有個嬸嬸拎住大盤食物正在敲我地房門......咁早，好似好趕時間咁......入到房個嬸嬸好快手就將d 野食set 好晒，手勢非常純熟敏捷，三分鐘內已經搞掂晒出返去，我諗佢真係好趕時間~

呢個dinner都OK 啦，野食樣樣都有d，有魚有肉有海鮮，算係咁~


同前一晚三余庵嘅夕食當然無得比，呢餐連menu 都無張，不過一分錢一分貨，最緊要食得開心舒服~~

先嚟餐前酒，cheers!

前菜

刺身

海鮮鍋


十勝產豚肉，shabu shabu，正!!

天婦羅

鹽燒烤魚


麵豉湯


我至愛嘅漬物


茶碗蒸蛋


數下數下都好多野食.....OK，大家快d 開餐啦~~


Yummy! 呢個 yum 係紫bear講嫁

響自己房食最正嘅地方就係可以邊食邊睇電視，仲有就係可以無拘無束咁食，坐響度食又得，跪響度食又得，瞓響度食都得!


食到咁上下，大概一粒鐘，都唔需要打電話通知，嬸嬸就攞埋個甜品入嚟......隔左一陣仲入埋嚟收拾，好趕呀，連熱茶都無杯.......真係，住過咁多次溫泉旅館，呢間酒店嘅夕食安排都真係算最 "行" 嘅一次~


收拾晒之後就好快手call 埋個哥哥入嚟鋪好埋tatami，三扒兩撥，大工告成，可以收工......望住地上面個床舖，望下個錶，都只係七點幾，平時都未開飯，無理由咁早就去搵周公傾計掛，好在房入面有套 T puzzle，正好可以消磨下時間.......

呢種T puzzle 上次響不老不死溫泉旅館都有provide，所以今次玩得好熟練

玩左陣又睇左一陣電視，hea 到八點鐘，我地就換返d 禦寒衣物，係時候要出去再訪然別湖個Ice Bar 飲返杯cocktail 啦~~

(...待續)