2012年2月巴黎倫敦11日 - Dinner @ Leon de Bruxelles

11 FEVRIER 2012 (DAY 1 - PART 8)



離開凱旋門，我地就行返去香榭麗舍大道.......逛左成日，再加上jet lag，我地已經攰到隨時瞓得著，不過而家先係七點幾，無道理咁早返酒店休息，打死我都唔肯啦，而且今日中午只係食左個沙律同半個包，真係餓到反艇，點攰都好，一於去墳飽個肚先!

出發之前已經plan左響 Champs Elysees 要去食乜野，無論係旅遊書又好，去過 Paris 嘅 friend 又好，所有人都一定會推介去呢一間 Leon de Bruxelles 食比利時菜，最出名就係食moules，即係mussels 青口......呢間食店幾乎係香港人都會去，當然因為平靚正，而且響巴黎有好多分店，Champs Elysees 呢一間就響我地酒店附近，好易搵~


去到見排隊等位條人龍差不多去到門口，dinner 時間預左好多人，不過我地都係等左一陣就有位~

法國人用餐習慣hea 住食，好他條，去到一坐低唔係問你食乜，而係問你要d 咩aperitif 先，即係餐前酒......正所謂入鄉隨族，wine 就 wine 啦，不過我地 of course 唔係要咩開胃酒或者champagne，行到攰一攰，當然啤啤佢啦......老爺諗都唔諗就要左個Leon beer.......


而個waiter 就suggest 我要左個 Edelweiss beer......

呢個 Edelweiss 都幾易入口，比較甜味，唔錯!

我地響 Champs Elysees 嘅第一個dinner，咁高興，CHEERS!!


睇下食咩好先......研究左一大輪，發覺單係set 都有分兩種，價錢平d 嘅就包entree (i.e. starter) + plat (i.e. main dish) 或者 plat + dessert，而貴d 嘅就係包entree + plat + dessert......唔駛講我地一定要entree + plat + dessert 啦，另外就散叫多一款starter 同青口~

首先上嘅係頭盤，呢個係跟set 嘅炸蝦沙律，個蝦炸得熱辣辣脆卜卜，唔錯~


另外order 多個拼盤......醒唔起全部都係炸，好鬼熱氣，唉!

Main course 嚟啦.....我地揀左雜錦海鮮，一大煲 (仲係 LC 煲嚟嫁!!)，起碼有四、五十隻，除左青口，仲有大蝦同魷魚，d 蝦好大隻嫁，不過最好味當然係青口，而且隻隻都好肥美，雖然我地一向唔係特別鍾意食青口，但呢個真係好鮮味!! Yummy!! 我地最後連d 湯汁都飲埋......隔左半年，而家諗返起真係好想再去食過!!

另外一份係散叫嘅，老爺話試下唔同煮法同口味，所以要左個芝士焗嘅......都唔錯，不過都係上面嗰煲好食d


每份青口都有薯條跟......Hehe，響法國食薯條，真正嘅 french fries 呀!......呢度d 薯條係無限量 refill，另外仲有一大籃麵包，務求 "質" 到你飽為止，一定唔會唔夠飽囉!!

好似響北海道食蟹宴咁有個大盤用嚟裝殼嫁......滿滿一大堆，我從來未試過一次過食咁多青口囉

飲飽食醉，呢一餐真係食得好滿足.......睇下有人飽到個大肚腩出晒嚟


幾飽都好，dessert 係一定唔可以skip 嫁....... 唔駛諗一定係我最愛嘅 creme brulee，我最鍾意用叉敲碎面頭嗰片薄薄嘅焦糖嘅感覺.......呢個燉蛋個size 都好大個，對於已經好飽嘅我地，兩個人食啱啱好.......


埋單盛惠 72.9e，OK 啦，響歐洲 dinner 唔算貴囉，同埋呢間食店個格局唔係好grand 嗰種，裝潢簡潔而有格調，食得好舒服，值得推介

 

食完出嚟，我地走慢慢行返去酒店.....星期六夜晚九點幾，Champs Elysees 真係好熱鬧，一街都係車......



好快返到酒店，雖然十點都未夠，但係我地已經攰到隨時可以瞓得著，個人吽下吽下咁，連之前買定嘅消夜都唔想掂，於是就拿拿聲沖涼然後就去會周公，而響Paris 嘅第一日行程終於完滿結束.......寫左將近半年先寫完 day 1，唉!!


(....待續)