2012年10月求求其其亂咁黎大阪山陽有馬四國咁亂七日又玩完啦~~

話咁快呢個好求其嘅關西七日遊又玩完，今次個trip 都算順利，基本上想去嘅景點都叫做去得七七八八，天氣亦ok，除左第一日因為大阪剛打完風所以勁落狗屎外，其餘日子大部份都係陽光普照、風和日麗啦.....好好彩，遇著好天氣，令我地有緣欣賞到大自然日與夜嘅美~~

先來一張月色下嘅廣島縣鞆の浦仙醉島.....


一邊浸住溫泉一邊欣賞月光下嘅美景，耳邊傳來陣陣嘅海浪聲，好幽靜好舒服呀~~

再來一張嗚門海峽嘅日出



今次去左七日，日子唔算長但亦唔算短，兩個人夾埋只係影左三千幾張相，一來四國嘅景點唔算好多，而最主要係老爺臨出發前新買左部 handycam，兜友新屎坑成日攞住部機影video，相對相片就影小左......不過呢部機又真係唔錯嘅，防水防震，一邊攝錄又可以影相，最 like 係個 size 細過我隻手掌，好輕巧好方便

自駕方面，今次我地都仍然係租返Toyota，ok 啦，係個GPS d 反應比較慢，初初要d 時間適應，之後大致上操作都無乜大問題，反而今次響IC 塞左幾轉車，除左大阪市係預左會塞車外，真係無諗過連IC 都嚴重涉滯，尤其寶塚池田一段，真係塞到嘔電，之前都有blog 友提醒過我地，但估唔到佢真係由朝塞到晚，朝又塞晚又塞，都唔知有無搞錯，d 公路費收得咁貴但就閒閒地塞你一粒鐘，超搵笨，直頭要媽媽聲!!

至於我地愈來愈注重嘅酒店，今次七日行程住左五間酒店，基本上全部都令我地好滿意，當然要挑剔嘅地方仍然係有，不過大體上都好ok 啦，我最鍾意嘅係位處廣島縣鞆の浦嘅遠音近音，食住都比預期好，房間對正大海，超正呀，幾乎住到唔想走，如果佢個私家溫泉可以大返小小我就會俾十個讚佢囉!!



總結一下個trip︰行程重點之一嗚門旋渦，因為前一日大阪名古屋刮颱風，連飛機航班都有d 要cancel，好在我地凌晨機無受影響，已經好感恩.....本來諗住去到當日係初十六又趕到個大潮時間d 旋渦應該都睇得幾清楚，可惜去到遇正颱風後遺症落狗屎，d 旋渦都唔係好明顯，但都叫做勉強睇到d 啦~

乘小型汽船近距離找尋旋渦蹤影，雖然刮住橫風橫雨唔係好睇得到，但響風雨下一大班人靠住船舷搏晒命影相影video，每當發現旋渦各人就會大叫，小船因為大浪搖擺不定，一頭一身都濕晒，好狼狽但又好過癮，亦係旅程中另一種難得嘅體驗!!

另一重點，好可怕嘅祖谷蔓藤橋......


木條跟木條之間嘅空隙也未免太大啦，我對35號腳只係剛剛好掂到兩條木嘅邊沿，一邊行一邊好驚會踏錯跌落去!!

用左個半鐘爬左千幾級石級終於上到去金刀比羅宮位於山頂嘅奧社，平時唔願做運動行步路都會PK嘅我，望住山下嘅琴平市好有滿足感呀! 不過要比較始終覺得山形縣嘅山寺靚d，或者因為上次去嘅時候係雪景~

終於浸過有三千年歷史嘅道後溫泉本館.......唔係好覺有千與千尋入面油屋嘅影子，不過d 古舊木樓梯真係好難行，千尋咁快手就適應可以健步如飛都好利害.......至於呢個千年古湯，其實都只係一般嘅公眾浴池，好簡陋，三階靈の湯還好d，二階神の湯好多人! d 婆婆嬸嬸們個個帶齊晒一桶桶沐浴用品響浴池邊沖涼洗頭，個個對住個溫泉池起勢咁刷身刷腳，好似好耐未沖過涼咁，幾嘔心核突囉!!

朝早漫步於寧靜優美嘅鞆の浦漁港，好寫意

除左道後溫泉，今次亦去左另一個有名嘅古老溫泉，有馬溫泉嘅金泉，正，好relax 呀!!

OK，廢話唔講咁多，係時候去到最重要嘅事，當然就係post 返d 今次嘅戰利品同大家分享下先啦......唔好誤會，今次唔係shop左好多野咋，經歷過上兩次響北海道同法國嘅慘痛經歷，今次真係好忍手，連老爺響個trip 嘅中段都忍唔住讚我乖左今次無點買埋d 垃雜野......(我唔好意思講實情係四國其實真係無咩無謂野shop 啫)

今次買左兩個 Bao Bao.....


另外一個黑色嘅，我都係鍾意揀d 比較大路嘅色，嗰d 金呀銀呀閃令令都唔係咁啱我.......


而且呢個係有拉錬嫁，平時返工斯文d~

今次只係買左一本雜誌，都係Anna Sui，其實仲有本係送Agnes B 手挽袋，都幾靚，不過呢類袋之前實在買得太多，買完又唔係點用，自己都唔好意思再買......



呢個係貪佢旅行時可以裝垃雜野，中間個袋仔仲可以分開用嫁~

忽然發現仲可以裝埋我部 10.1 呀!! Size 剛剛fit，真係用途廣泛，忍唔住要讚下自己真係精伶嘅敗家精


年頭去Paris 逛過羅浮宮同Musee d'Orsay，睇過唔少名畫，今次去左嗚門一個世界名畫A貨美術館，又將所有世界級名作一次過睇晒，雖然明知道d 畫係假，但都睇得好開心，當然唔少得響Souvnier Shop入返d 紀念品啦~

呢d 唔係post card，而係抹布，抹眼鏡呀、電話電腦screen 呀咁......

唔好以為只係一般嘅眼鏡布，佢註明係microfibre high-tech嫁!

下面呢幾張就真係postcard 嘞，好搞鬼嫁，唔同角度睇會有唔同效果，呢類postcard 雖然已經司空見慣，不過當呢種效果利用響名畫上面又真係好過癮囉......

Mona Lisa，大家應該好熟悉......

轉一個臉阿Lisa 姐就手舞足蹈起來啦


Michelangelo 筆下神創造亞當經典嘅一刻......

哈哈，來個欲拒還迎嘅 moment 吧!

Wow，割耳前後嘅Van Gogh 俾你一次過睇晒




早前唔記得以幾多天文$$成交嘅「吶喊」......

一下子畫中人跳前左咁多，當中所表現嘅恐懼有無加重左呢?

Bag hanger......我知，街邊唔駛十蚊有一個，但換上印象派嘅名畫個feel當堂grand 晒啦，買左三個，送俾家中三位最elegant 嘅lady，of course 包括我自己，哈哈


Folder，當然揀我最愛嘅Van Gogh......話時話我覺得日本人真係識做生意好多，響Orsay 就唔見有咁多古靈精怪嘅products 賣


忍唔住手都買左盒雜糖，又係貪佢個罐......

買左兩把摭，左邊嗰把響Outlet買，其實無乜特別，重點係右邊嗰把，以前響香港見過有類似，但好貴一直唔捨得買，去到外地個心態又唔同講法，上次響Paris Opera 區本來知道有一間shop 有得賣，但唔夠時間無去到，今次終於買得成.....

好開心喔，快d 落雨啦

話左今次好忍手，只係響Outlet買左一件減價Gap 咋!


去左一個令人極度失望嘅五十嵐優美子美術館，滿以為會見到好多小甜甜展藏，點知頂佢個肺，只係得十多張畫，連迪理斯同安東尼都無! 超級搵笨!! 簡直傷透我地呢種超級小甜甜fans嘅心.......響極度不滿同失望嘅心情下諗住去壳店shop個勁彌補一下，結果好辛苦先揀到幾件係小甜甜items，真係媽媽聲!!


又買熊仔電話繩


筆......有人又話次次都買咁多筆厭唔厭.......Well，地方限定喎，無理由唔買，我夠話你次次都哦次次都要我解釋你又厭唔厭呢? 呢個公仔係史迪仔踏住嗚門旋渦，實在太cute~


當然唔少得Kitty products.......

每次入住溫泉旅館，我都要買返小小野做個紀念，下面呢個係響ホテル祖谷溫泉旅館買嘅岩鹽，附送磨鹽器，食dinner 時玩過幾好玩......


自家溫泉旅館出嘅護膚品，據講係由溫泉水提煉出黎，好保濕同滋潤嫁......買左兩份minin pack 試下，因為旅館個package 包左兩張 500円 coupon，買滿二千円可用一張，唔用就蝕啦


響道後溫泉嘅谷屋溫泉旅館買嘅小豬毛巾仔，好可愛~


嗚門 Moana Coast 食左個好美味嘅dinner，買返對 expresso cup 留念一下~


走左趟有馬溫泉浸左個日歸浴，當然要買返小小溫泉美肌產品~


道後溫泉著名嘅化妝水


返到大阪點都要響藥房入返小小美顏products，最大劑係一條心斎橋筋商店街都有N間大藥房，住宿酒店旁邊就有一間Matsumoto Kiyoshi，幾克制都唔可能當睇佢唔到，不過我今次真係好忍手，有圖為証


女士恩物，補充骨膠原......響心斎橋幾間店格過價，最平都係1790円~


唔知work 唔work，即管試下啦!


大家開始有白髮嘅煩惱未呢? 如果只係出左幾條又或者髮根只係現左小小，無理由花錢走去salon 做色啫，呢種quick coloring 真係急救之星，for temporary use 最好......香港其實都有，以前都幫媽咪買過，但係嘖射裝，d 色集中晒響某一點，唔自然，又要用梳將佢塗均勻，效果唔係咁好囉~

今次搵到呢種，用法好簡單，就咁將枝野向住頭髮塗上去就ok 嘞，可以keep 住一日，到洗頭時就會洗走晒嫁啦......

而且size 小巧，真係放響手袋響街隨時攞黎用都得呀!!

響有三千年歷史嘅道後溫泉本館浸完個日歸浴，當然要買返d 野留念~


金刀比羅宮買嘅幸運御守......


呢個唔係一般嘅幸運御守，係要好辛苦咁行上785級石級先去到嘅御本宮先有得買.....1500円好貴呀，不過只此一家，無所謂啦，同埋隻神狗仔吊飾好可愛~

呢個仲勁，要繼續行多583級先去到，總共1368級! 行到我幾乎斷氣.....But 呢個交通御守只能夠響頂端嘅嚴魂神社先買到，只此一家


參觀左鞆の浦嘅對潮樓，係咁意都要贊助下


香川縣最出名嘅讚岐烏冬，無理由唔買d 返HK 延續味覺上嘅幸福


有烏冬又點小得醬油?


當然仲有唐辛子調味粉......不過其實呢樽唔係響琴平或高知縣買，係響鳴門食完第一餐烏冬時嗰間食店買，老爺話好食......係呀，響小小嘅食店我地都可以搵到野買嫁~


買左兩本旅遊書.....估計遲d 總有一次要去山陰山陽作深度遊掛? 香港無乜呢度嘅旅遊書，買定唔會有錯


iPhone charger.......右邊係送俾細佬汽車用，因為條友仔成日唔記得charge電，次次見面都喊救命話只剩2%，老爺就話買返個俾佢......老弟，睇下家姐對你幾好，響外地都記住你無電用......

 

左邊係用乾電池，其實以前都有買過，九百幾円，不過個電池接觸點好差......


今次試下呢款，貴d，正所謂一分錢一分貨，接觸點好好多，不過兩粒2A電池都只係夠charge 約10個%，而且要另帶USB 線，外帶麻煩小小，不過急救用都算唔錯啦~


道後溫泉街買嘅honey.......試食完人地一大堆都唔好意思唔買返d


買左幾枝酒，左邊枝保命酒俾媽咪，係鞆の浦著名嘅藥酒，大概係我地嗰d 養命酒啦.....其餘兩枝其實唔係刻意買返黎，都係日間買定諗住夜晚宵夜時飲，不過成日都唔記得左又或者買得太多飲唔晒，唯有帶返香港


食物，真係唔多囉，成日驚住行李超重......


(題外話︰咁樣去玩真係好唔enjoy，成日因為擔心行李overload 要罰錢所以就住就住唔敢買野，真係無晒好多樂趣，d airlines 唔該檢討下啦!!)

道後溫泉著名嘅一六菓子蛋糕.....

略甜左dd，但都幾好食~

今次非常乖無響酒店順手牽羊，呢d全部都係送贈嫁......




不過最驚喜莫過於大阪Cross Hotel provide 嘅 bathing & skin care set，好齊全!!

仲要有埋一套四件 L'Occitane 包括soap, shampoo, conditioner & body lotion，一共兩sets!! 連泊二日仍然繼續provide 多兩sets，正到暈呀!!

搭CX 機當然要事先做定online shopping 啦，有額外九折又可以計mileages.......今次我只係show 個袋就算，入面d 野無謂見光，上次搭法航無野shop 所以今次重手左d，回程響機上刷卡時睇見個數字已經俾老爺怒睥左一次，再show 出黎費事又俾佢再怒插啦

 

最後又黎一張大合照!!

 

無呃大話嫁，真係shop 得唔算多，兩個喼合共49.5 kg! 唔需要罰錢，YEAH!!


詳細遊記，指日可待.......