2014年4月日本中部立山8日 - 下呂溫泉合掌村

Day 2 (名古屋 > 下呂溫泉)

第二朝七點就去食早餐......

酒店有無料朝食~

當然唔多野食，但都比預期中多喎，有幾款麵包、沙律菜、腸仔、飯團、柚子，算係唔錯啦，無料，仲想點?

食完就上房執埋行李去 check out，6800円，如果無記錯應該係我地咁多年日本自遊行以來住過最平嘅一間酒店.......酒店整體上都 OK 啦，不過我係堅決唔會再入住囉

事緣我響 Amazon 嘅 orders 仲有一件未送到，於是就打算問酒店可唔可以幫我收件並 keep 一個星期後我再返嚟攞......當時 reception counter 只係得一個職員，就係尋晚我地外出返嚟問佢攞 ETC 但佢完全無反應嗰位大叔，其實我唔想同佢 deal，但 counter 無其他職員唯有同佢講，唔知點解今朝我講 d 英文佢又好似明咁噃，但佢 d 態度同身體語言就好衰相，望都唔望我只一味響度搖頭話唔可以，我問佢 do you understand what i have just said (大家唔怪得我要咁問，我並唔係有心睇小佢唔識英文，而係因為尋晚佢確實係完全聽唔明我講嘅英文)，佢就好高聲咁答我 of course i understand......直到呢一刻我其實都未發火，我只係唔明佢點解唔肯幫我收件，雖然我唔知一般酒店有無咁嘅 service，或者大部份酒店都唔會幫 check out 左嘅客人收件?? 我未試過唔知，所以先要試下問下嘛......

條友唔肯幫我當然有 d 唔高興，但最令我扯火嘅係佢 d 態度，我問佢酒店係咪無咁嘅 service 幫客人，佢就話我 check out 左唔係酒店客人(?!)，又話我一星期之後無訂房所以唔會幫我收件......我就話咁我都曾經係酒店住客，我而家仲企響度都仲未走，佢話除非我之後有訂房，仲好囂屎咁問我要唔要而家幫我訂房，如果我而家即刻訂房咪可以幫我收件囉，當時佢個樣同語氣真係好乞人僧......真係火都嚟，呢 d 係乜野 service 呀?? 你酒店制度唔肯幫 check out 左嘅客收件 OK 唔緊要，但個態度係咪唔應該咁寸呢?? 之前一日佢地已經搞錯左我地個 package，當時一開始嗰兩位阿姐 d 態度都唔係好，我覺得呢間酒店 d 職員應該要全部攞去再培訓囉!!x100!!

同條友嘈左大約十分鐘，我地就好火咁離開，唔走仲可以點? 除左嘈幾句仲可以做得乜? 響外地旅遊遇到阻濟，「無奈地接受」呢五個字永遠都只係消費者......大家或者會覺得我係無野攞野嚟嘈，又或者會話我又試港嬸上身........我唔係話消費者就大晒，但我覺得酒店除左硬件，service 係好重要嘅一環，雖然話一分錢一分貨，但係咪平價酒店 d 職員就可以咁無禮貌? 我唔覺得應該係咁囉

當然我個心情唔會因為一個劣質嘅職員而受到影響，行過條馬路已經將不快忘記.....今日首要項目係去攞車，攞車地方好近，由酒店行去一分鐘就到~

手續好快搞掂，職員仲俾左張車行四周油站位置嘅地圖，方便我地還車時先去入油......俾個 like 佢~

今次改揸 nissan，因為比 toyota 平好多~

搞掂晒就出發啦，今日嘅目的地係下呂溫泉.......車行左半個鐘人就身痕，要響 SA 停一停放放水、買杯咖啡提提神先.......

個杯蓋 attach 左塊野.....

原來係用嚟塞住個出水口防止飲料倒瀉，好貼心嘅設計呀!

呢個 SA 環境都唔錯.....

旁邊係公園，不過我地無時間停留慢慢逛......

買 d 零食就繼續上路~

行行下經過一條紅橋，四周環境好靚呀，即刻搵個位停低影返兩張相先.....自駕遊最正就係沿途見到靚景可以停低欣賞~

有條河，遠遠亦有條紅橋，唔知係咩地方?

河水好碧綠呢~

又行左一陣見到呢個 SA 好似好多野逛咁，當然又停一停

呢個 SA 真係好大嫁，大到有工作人員響度指揮交通~

我要食飛驒牛串呀!!

呢幾舊牛要 750円! 不過又真係幾好食

行下停下，唔覺唔覺總共停左四個 SA & PA 加一個道之駅......大約十一點半終於去到第一個景點，下呂溫泉合掌村......

早幾年去過白川鄉同五箇山，已經見過文化遺產合掌屋，仲住過有百年歷史嘅大田屋，好懷念呀，所以今次嚟下呂亦要抽時間探訪一下呢度嘅合掌村~

地方唔算好大，感覺好似比白川鄉合掌造民家園細.......整個合掌村分為兩個區域︰「合掌之里」同「歲時記之森」，中間一條馬路分隔，正門入口處就係「合掌之里」~

一入園就有位著左和服嘅日本姐姐企定定響度俾人影相.....

下呂溫泉係日本三大名泉，周圍都有好多手湯，連合掌村入面都有提供......

連足湯都有.......

都有好多人響度浸嫁~

四周環境唔錯......

有櫻花呀

上次睇合掌屋係冬天，d 合掌屋頂鋪滿晒白雪好靚......無白雪覆蓋嘅合掌屋又有另一種純樸 feel

呢座舊大戶住宅家係國家指定重要財產，可以入內參觀~

入去參觀前當然要影返張到此一遊啦~~

屋內有個伯伯成日坐響度煲茶.....

佢好熱情嫁，我地趁佢曾經有段時間行開左就走埋去佢坐嗰個位度影相，影影下佢返嚟，見到我地就坐埋嚟不斷同我地傾計，雞同鴨都可以講左十分鐘，我都覺得自己好厲害

可以上二樓~

二樓都係展示古時嘅農具同一d人形模型，同白川鄉睇嗰 d 差不多.....

不過佢俾遊人行走嘅地板唔係原木搭建，個感覺現代好多，成個 feel 被破壞晒~

由二樓望向外面個 view 都唔錯

逛完合掌屋就去外面逛下，有個細細嘅池塘......

四月都有紅葉??

另外一邊係飛驒工房同食店，時間有限，我地都只係響外面行個圈影下相，無打算逐間合掌屋都入去睇~

最開心係偶爾會見到櫻花樹.....

其實今朝由名古屋開車過嚟，出左 IC 之後沿國道走一路已經見到櫻花處處，都已經四月尾無諗過呢一帶仲有櫻花，雖然已經係滿開但總算係有驚喜

好厚嘅茅草屋頂~

連許願板都有!.....如果同白川鄉合掌村比較，我覺得呢個合掌村仲更商業人工化

仲有自助野賣.....

人食定餵魚用??

青蛙好似係下呂溫泉嘅吉祥物，周圍都見到各式各樣嘅青蛙~

最搞笑係呢個!

有水車嘅地方特別覺得幽靜~

高椅神社，係紀念料理之神....即係廚神?

旅遊書話亦係合掌村守護之神.....其實我唔明廚神點解係呢度嘅宏護之神? 兩者有咩關係??

之後我地就過去另一面嘅「歲時記之森」，目的地係山上嘅展望台.......

要經由地底通道行過去~

另一面地勢高 d，可以望返過去舊大戶家住宅嗰邊~

呢個位置望過去嘅 view 好靚，靚過一陣上去嘅展望台~

開始上山，又經過一個細細嘅神社~

有間水車小屋~

沿小徑走兩旁都係青青綠綠，當中夾雜點點紅，上山嘅路亦唔難行，走得好輕鬆~~

好快上到去最高處嘅展望台 (其實都唔係好高)，望返山下有 d 失望，真係非一般地無野睇，同白川鄉嗰個爭好遠，真係無乜料到噃~

點解有兩個叮噹響度??

預備離開之際忽然見到有個付費滑り台，好似係100円一位，全自助式，無職員響度駐守，要玩就自己入錢，我當然拉住老爺要玩.....

自己揀個坐墊.....

有圖畫說明要注意事項~

就係由呢條滑道滑落去.......

原來條滑道都唔短嫁，仲要打轉，都幾刺激......好好玩呀!!

滑道有兩段，中間要經過呢條木橋......我的媽!! 呢條橋好鬼難行嫁，唔係講笑，我覺得仲難行過四國嗰條祖谷橋

行完橋就去到第二段滑道，唔想玩滑道可以改玩呢個......不過我諗無乜邊個成年人會想玩囉!

滑道盡頭就去返下面水車小屋嗰邊.....望下錶已經接近一點，響度不經不覺已經消磨左個半鐘.....

於是行返去「合掌之里」~

要走啦，再望多眼合掌屋啦~~

臨離開前去搵埋棵夫婦杉.....

影緊相嘅時候又見到之前響舊大戶家住宅嗰位伯伯，嘩，佢好似他鄉遇故知咁，即刻拉住我地傾，又帶我地行返去舊大戶家住宅，話俾我地知最佳影夫婦杉嘅影相位，又教我地擺造型，總之就好搞笑，我諗佢平時成日坐響度煲茶一定好悶，偶爾見到有人肯同佢傾兩嘴即使言語不通都開心到無乜所謂~~

出入口處有間壳店，當然要入去巡返個圈~

離開時先發覺原來停車場入口個地下都有隻青蛙歡迎你~

好悠閒咁逛完合掌村，係時候去醫肚，我地揀左旅遊書介紹嘅せん田......

由合掌村開車過去只係五分鐘，不過食店無停車場，響附近兜左陣都搵唔到位泊車，因為下午我地打算去下呂溫泉博物館，所以就決定將架車先泊響博物館嘅專用停車場~

由博物館行返過嚟其實都好近，兩分鐘腳程~

午飯時間要等位，我地都等左十多分鐘~

一場嚟到飛驒地帶當然要食飛驒牛，唔駛講我當然要朴葉味噌飛驒牛御膳......

好懷念嘅朴葉味噌! Yummy yummy~~

老爺要呢個燒和牛勁好食呀!!

食飽飽又係時候開始下午嘅行程，原本只係諗住順手去逛埋嘅下呂溫泉博物館，原來又比想像中有趣噃.......

(...待續)