PIGGYBREAD: 2016年3月北國極地18日

我一直好想去睇極光，有人話呢個係一生人點都要去一次嘅旅行，我好同意，雖然我不斷有好多個一生人點都要去一次嘅地方

.....好記得好幾年前去北海道，有一晚響知床海旁睇激光 show，響無邊黑暗嘅夜空上打上變幻嘅燈光，個感覺真係好奇異，當時已經同老爺講，總有一日我要去極地睇真正嘅極光~

要睇極光其實都有好幾個選擇︰北歐、冰島、加拿大、阿拉斯加、NZ 等等，好多人話要睇極光肯肯定係去黃刀鎮睇啦，一年有二百幾日都好易睇到，但我嘅第一選擇係北歐.......識睇嘅人一定會話我傻，但我呢個人其實真係傻傻地

......睇極光固然係重點，但我又唔想只係純粹為咗追光而去.....事實上我幾鐘意北歐呢個地方，好多年前我初初出嚟做野時曾經去過，感覺好好，雖然物價好高，但當地環境、人情都令人好舒服，當年跟學聯嘅歐洲巴士團，而家慣咗自由行，再去嘅感覺應該好唔同，所以決定要再去一次，今次要入埋北極圈，希望可以睇到期待已久嘅北極光~~

呢個 trip 其實已經係舊年三月嘅事，當時去完返嚟好想寫返留個 record，但又係一個字.....哈哈，唔係懶字 (雖然我真係好懶

)，係忙呀!.....我係真忙，舊年一共去咗七個 trips，平均計都至少兩個月去一次啦，完成一個 trip 又要忙住搞下一個，真係想每次記返個大概都無時間呀!

今次呢個旅行，由 planning 到出發，身邊嘅人都極度唔贊成，老爺尤其反對.......係呀，因為呢個 trip 只係我自己一個人去!

.....由最初期蘊釀時細妹佢地話一齊去，搞下搞下到最終決定自己獨行，當中有過好多心理掙扎.....最重要一點係到底我係咪有能力響零下二三十度環境下去應付一 d 預測唔到嘅困難呢?

我一向論盡嘛，多年嚟又慣咗倚賴老爺，雖然近年都有自己去日本嘅經驗，但大佬，講緊嘅係日本! 日本喎，點同人煙飄渺嘅北極圈相比.....當然，仲有就係點解我要自己一個人去? 而呢個亦係老爺最不解嘅地方，到底有乜理由要急於一個人去? 點解唔等埋佢將來時間許可時先一齊去呢? 而家諗返轉頭，自己都覺得好任性，要身邊嘅人為我擔心......不過我諗人總有任性嘅時候，年紀愈長，愈發覺可以隨心所欲嘅時間唔係好多，趁仍有條件可以支持自己任性就任性一下啦

......或者咁講，我好想去做一 d 我一直無試過做嘅事，生活過得愈安穩人漸漸就會失去冒險精神......關於旅行，每次我都會俾自己一個主題，坐破冰船、玩流冰漫步、追櫻、賞楓、賞芝櫻、上立山睇雪牆、瑞士健行、合家親子樂等等 (當然，shopping 都係一個主題，haha).....講到底其實都係俾自己一個籍口去玩.....然而講真，現世代大部份人要去旅行基本上已經唔需要再搵理由，打卡呃 like 先最緊要吧? 不過有時候我仍然會諗，旅行於我自己有咩意義? 響每一個大大小小嘅旅遊當中我到底有乜野得著? 年紀愈大愈覺得響精神上、心靈上總該要有一點點嘅收獲吧?

OK，講返個 trip, 又再獨自去偷歡，老爺最終都支持我啦

.....well, 唔係佢又可以點?? 佢可以做嘅就係盡量幫我響出發前裝備得好 d 咁啦.......今次去18日，睇落好似好長日子，但要去晒北歐四國當然亦係無可能，所以 skip 咗丹麥唔去，重點係北極圈，18日當中佔咗12日都係留響圈內，希望多 d 機會可以追到極光......睇極光呢樣野，雖未至於同響香港買樓一樣咁難，但都唔係一件容易嘅事，就算俾你個極光 KP 值去到 8 但成個天都係烏雲都只會係失望而回~

講咗咁耐，係時候 highlight 一下今個 trip 嘅精華片段，因為按本人一向咁龜速地寫遊記，九成九點九九九都會係爛尾........

首先，到底此行我有無睇到北極光呢? 答案係︰有呀有呀有呀!!!

.....重要嘅說話要講三次，哈哈~ 好感恩，第三晚響瑞典 Abisko 已經睇到，不過識我嘅人都知我係唔識影相，以往一向係靠老爺將美景留住，我只識用手機影埋 d 九唔搭八嘅野，雖然都有學人揸部 Leica D-Lux 好似好有型，但其實部機全自動，以我嘅能力用佢影不如專心欣賞 d 光好過.....出發前老爺積極同我惡補點樣用部 Panasonic (佢當然唔會俾佢自己部 M240 我拎去舞.....就算俾我即使學一年都唔會識用

)，但礙於本人資質同裝備所限，影返嚟嘅極光相唔多，當然質數亦只係好一般~

上面呢張相已經係我所有極光相片中影得最好嘅一張啦

......呢張相係響海拔 800米嘅 Aurora Sky Station 展望台上面影嘅......有極光有月亮有星星有雲有山! 仲想點? Haha.....當然對於精通攝影嘅巴打絲打嚟講呢張相一定唔入流，但對於我呢個之前連腳架都唔識用嘅相機白痴嚟講可以影得到少少野返嚟我絕對已經係一百二十分好滿意啦~~

當晚影呢張相之時我係處於點樣一種狀態呢? 正所謂月黑風高，其時氣溫負三十度，我上身穿 heat tech 打底衫、毛衣、一件羽絨、一件 fleece 外加一件 Gore tex 外衣，下身保暖羊毛厚襪褲、heattech 長褲、再外加 fleece 底 Gore tex 面防水褲，仲有羊毛襪、雪靴，頭帶羊毛冷帽、外罩羽絨帽，再圍住厚厚頸巾同羊毛手襪......大家可以想像我當時個 look 係點嗎? 基本上就係一舊大果蒸糭咁囉，行每一步都好似隻蟹咁，而家諗返起我都唔係好明自己點解仲可以活動自如竟然無 PK......呢舊肥野當時仲要係手揸住長腳架，腳踏滑溜溜嘅冰地及梯級 (!)，一邊聽住個 guide 用好濃重北歐口音嘅英文提示個天邊忽有機會係極光，一邊手忙腳亂學人好似好專業咁響度對焦曝光，哈哈!!

雖然響北極圈內逗留咗 12日，但真係叫清楚睇到北極光只係響瑞典 Abisko 嗰兩晚，當中一晚更係見到傳說中嘅 dancing aurora!

好開心......「一生人點都要睇一次?」當然!! 嗰種感動絕對係非言語筆墨所能夠形容嫁!!

響北極圈嘅日子，夜晚當然去追光，日間就只有 join d local tour 消磨一下......位於瑞典 Jukkasjarvi 嘅 Ice Hotel 據講係全球第一間冰酒店.....好幾年前同老爺有去過北海道然別湖嘅 Ice Village，基本上都係大同小異，不過 Jukkasjarvi 呢間 Ice Hotel 個規模大好多~