2010年2月日本中部北陸9日 - 槍見館‧溫泉篇

2月22日 (DAY 4 - PART 1) 

 

 

第四日啦!! 六點鐘就彈左起身，望出窗外天已經開始光........

晨咁早起身當然想去浸浸浴......老爺食左藥休息左一晚已經無咩事，當然齊齊去泡下個露天風呂同嗰幾個貸切啦~~

呢兩件野雖然唔係好厚但就好保暖~

出發去泡湯啦!!!

呢條通道就係通向大浴場，不過尋晚已經去過唔再去lu，我地今朝嘅主打係天體浴呀!!

又係換水靴時間~

門口位有油紙傘俾人用黎擋雪......

有locker可以用，唔知係咪俾日歸客用呢.........

下面一間間屋仔就係貸切風呂........

要行落一條頗長嘅石級，石級上面舖左D茅草，我覺得反而仲跣過唔舖囉~~

 

俾大家睇下個溫泉分佈圖先........最後面嗰一大堆屋就係旅館D房間，行完條石級就首先見到ほたるの湯，係貸切風呂，跟手橫掃過去左手面都係貸切........而右手面就係女性專用風呂嘅岩見の湯，同埋混浴槍見の湯，另一個混浴就響槍の湯下面嘅まんてんの湯~~

我地首先去浸D貸切先........

本來照順路應該係去ほたるの湯，不過門口個牌顯示有人使用中，於是我地就先去隔離嘅森の湯.......

槍見館四個貸切風呂都係響獨立屋仔入面，住客免費使用，唔需要預約，每間屋仔門口有個木牌，將 "使用中" 嗰面向出話俾人知就可以閂埋門安心享用........每間屋仔都有窗，可以推開望外面風景~

奧飛驒溫泉鄉入面嘅旅館，基本上都有無敵景觀嘅露天風呂，各有特色，當初揀旅館時都有一番掙扎，曾經考慮過另一間都好出名嘅水明館佳留萱山莊，除左又係有個面積好大嘅混浴大露天溫泉外，佢地嘅貸切風呂一樣係好開揚，沿溪而建風景一流，不過最後我都係揀左槍見館，原因其實係好個人嘅，其他人未必會覺得特別，甚至會覺得我低B，不過我響旅遊書第一眼見到佢其中一個貸切就俾佢吸引住，好想去玩下

.........

大家睇下，吸引我嘅就係呢個森の湯入面嘅鞦韆同滑梯嘞.......鞦韆滑梯!! 我知好低能，我認嫁.......我一路瞞住老爺都無話佢知點解要揀呢間旅館，到佢呢朝終於見到我揀呢間旅館嘅原因，佢話真係當堂俾我吹到睥一聲，話真係頂我唔順喎.........

個鞦韆真係可以坐同搖嫁!! 不過我只係玩左一陣，老爺話個鞦韆係設計俾小朋友玩，等一家大細可以一齊享受泡湯，唔係俾我呢D牛龜咁大隻嘅肥婆玩喎

.......至於後面個滑梯我都唔係好敢玩，因為D溫泉水都好熱下，我驚滑落黎衝落去個池嗰下會熱Q死........一場黎到，點都要整返張相留念.......我嘅造型係咪好騎哩呢........

玩左一陣就俾老爺命令快D落返水，佢話驚我凍親喎........玩夠就正正經經浸下個溫泉啦，森の湯嘅溫泉池都有兩個，真係好適合一家大細黎浸呀!

浸完森の湯著返衫就行返去隔離嘅ほたるの湯睇下有無人.........

去到見到度門拉開左，無人可以入去浸嘞~~

呢個ほたるの湯個外型幾靚，有個水車響旁邊.........

不過入面個溫泉池就無咩特別，四四方方一個，而且望出去無咩景睇，所以我地好快速浸完就閃.........

跟住就去播隆の湯.........

入面個溫泉池都幾大，兩個人浸綽綽有餘~~

望出去個景都唔錯......

Next, 溪流の湯.........

每間屋仔都有兩個籃俾人放衣物.........不過不斷咁又除衫又著衫都好煩下

，但無計啦，黎呢度都係想浸下佢嘅浴啫，除多幾次都已經唔覺得凍啦~~

呢個溫泉池係響屋仔外面........

所以溪流の湯係四個貸切風呂中景觀最正嘅

........

望出去係溪流，完全無摭無擋，景色一流!! 怪不得叫溪流の湯啦~~

連遠處嘅建築物都望到........

隔離嘅播隆の湯亦望得見~

浸完溪流の湯，就過去隔離嘅足湯........

不過通去呢個足湯嘅小路俾D雪封住去唔到.......

唯有搵個有利位置影張相算啦~~

足湯隔離就係其中一個混浴，まんてんの湯.......

因為係混浴，所以分左男女更衣室.......

全日本只有大約二百間溫泉旅館可以掛上呢個寫有「日本秘湯」嘅燈籠，去年我地去過秋田縣嘅鶴の湯都有入選......新穗高溫泉鄉有三個入選，槍見館係其中一間~~

更衣嘅地方大過貸切嗰D好多~

除晒衫，圍返條毛巾就行落去混浴........

一個人都無，我同老爺包場，正!!

呢個混浴周圍有D樹，環境幾幽雅，浴池對出就係河流，景觀都幾開揚~~

望返上去更衣室........

浸夠就各自換返衫.........之後就去隔離另一個混浴槍見の湯.........

又係分開男女更衣室~

除晒衫圍返條毛巾就拿拿聲衝落去........

槍見の湯個池好大，景觀仲開揚過まんてんの湯........

一樣係無其他人，又係我地嘅私家風呂，正到暈!!

上面就係更衣室嘞~

晨早起身泡個湯真係好舒服，最重要係無其他人

，可以好自在咁響大自然之下享受一下天體浴嘅樂趣~~

浸夠後就各自上去著返衫........混浴旁邊就係岩見の湯，係女性專用風呂......今朝已經浸左咁多次，所以我都無再去浸，同埋最主要係真係唔想又再除衫著衫

........所以只係走左入去影兩張相算.......

浸完浴成個人好溫暖

.......行返條石級上去旅館，個感覺竟然有D唔捨得，所以臨走我地響條石級都影左好多相.......

響條石級影左一陣相，終於都離開.......因為個肚咕咕聲，好肚餓，係時候去食早餐啦!!

(待續

)