2010年10月日本青森6日紅葉狩個吉 - 出發啦!!

10月22日 - DAY 1 (PART 1)

自從幾個月前決定今年10月要去日本青森睇紅葉，book左機票後一直都好hea，因為實在太lazy，拖左好耐都無咩mood去攪個trip，終於攪到有D好想住嘅酒店full左先識驚

，到差唔多出發前一星期先叫做plan好哂，臨走嗰一日亦終於完成左我嘅個人精美靚靚行程表啦!!

今次去嘅日數無上次去中部北陸咁多，所以頁數亦小D啦，一共49頁啫.......hehe，不過實在太趕太過 "行"，有D資料仲係整錯左添.........結果當然俾人媽到飛起

........

我地今次搭ANA......趁ANA凌晨機即將摺埋之前最後一擊，雖然話CX而家都有做凌晨機，但飛成田，對於我地呢D一到步就要趕去第二個縣嘅人黎講始終唔係咁方便，羽田離市區近D，轉內陸機或者轉搭新幹線都方便好多~~

響網上做左check in，所以唔駛太早去機場，放左工返屋企沖埋涼食D野就他他條條出發嘞!!

 

攪掂寄艙行李，過左關就周圍逛.......之前聽blog友講原來有D visa card可以響機場入面D Travelers' Lounge任食，愛貪小便宜嘅我當然唔放過啦........AE 同 Citi PremierMiles Card都得嫁~~ 

講真，D野食真係一般，同埋可以揀嘅亦唔算好多，最揼心嘅係入去時仲見到有D甜品，點知坐低攞完第一輪野食再去望，成個甜點counter已經close左.......又話24小時，呃人嘅!!!

我諗因為唔駛錢，所以好多人，好嘈!! 仲有就係D職員D service真係........應該係無咩service先真，面口cool到爆，雖然話係唔駛錢，不過我覺得你provide得咁嘅privileges俾客就應該at least有返小小職業操守，服務性行業，俾返小小笑容睇下唔該.......我知我知，免費嘛，想點.......就係因為呢兩個字啫，好，我忍!!

唯一比較滿意係飲品任攞.......咁我就發揮一下港嬸嘅本色，攞盡佢啦!!

食完已經差唔多夠鐘boarding......

起飛後就開始搵周公傾計

.......瞓到差不多三點幾就派早餐啦~~

朝早5點45分就到左羽田機場........

呢個羽田國際航廈係新開嫁，新鮮滾熱辣，開左一日咋!!

同舊嗰個相比真係無得比，以前嗰個細到一眼見晒，呢個絕對係國際級水準~~

以前搭凌晨機入境過左關，仲要響國際航廈坐一程free shuttle bus去Terminal 2先可以轉乘其他交通工具，而家新開呢個Terminal就唔需要嘞，個位置仲近東京市多D嫁.........

出左移民局響大堂有晒指示接駁嘅交通工具........

我地要去東京站轉新幹線，所以搭Monorail 先去濱松町轉JR.......

售票處就響大堂最左手面盡頭.........

晨咁早月台一個人都無~

呢個羽田空港國際線站當然又係新開啦~~

由落機check in、攞行李、去toilet、買車票到企響車站月台等車只係半個鐘，好快!!

包晒成個車廂........

想點坐都得........

東京嘅清晨，o-ha-yo!!

大約十五分鐘車程就到左濱松町，再轉JR山手線去東京站........

七點就已經到左東京站lu~~

我地最後一晚會stay響東京，所以先去酒店放低一件大行李.........東京站八重洲出口，一出就係我好鍾意嘅Daimaru

.......

今次我地響東京揀嘅酒店就響八重洲北口徒步三分鐘就到.........街口有間Honma Golf，老爺一見雙眼發光!!

Yaesu Terminal Hotel，搵勻東京站周邊最平嘅一間酒店，除左平，貪佢夠近東京JR站，仲有搭去羽田機場嘅Keikyu Bus巴士站都唔遠~~

響酒店放低一件大行李，就行返去JR站搵JR綠窗換JR pass......

本來去八戶嘅新幹線有一班車開7:35，但JR綠窗要7:30先開.......趕唔切早班車之餘仲要企響度等開門

........

等左一陣踏正7:30就開門，真係好準時..........

而家東京車站D service比早兩年好好多，D職員個個職講英文，仲有晒英文instruction，聽唔明佢地D日本英文口音都睇得明~

我地今次響青森自駕，由東京來回青森就搭新幹線，所以響香港先買定3 days Flexible JR East Pass......Agent 就咁出張電腦print out就OK，去到日本再兌換pass.......

兌換左pass，跟手就出埋來回東京青森兩程車票~~

攪掂後仲有大半個鐘先上車，呢個時候當然去食個早餐先啦.........我地是但揀左JR綠窗隔離嘅Cafe.......

呢間cafe專係食bagel.......我嗰set好健康，有salad，不過個bagel唔係幾好食

.......

頂老爺唔順，佢揀左個Halloween set，雖然唔知邊忽有Halloween feel，但個bagel係有朱古力餡，成個set甜耶耶，好攞命.........

以為仲有大把時間，點知等下食下傾下，唔覺唔覺就已經夠鐘，睇下錶，有無攪錯，已經8:20!! 我地搭8:28車，我連個包都未食完就要打包走........

真係好趕，你知啦，東京D車站好鬼大，就算入左閘都仲要搵月台，二十幾個月台，偏偏我地就係要去到22號月台........走到我喘晒氣 (點解去親日本總係要趕頭趕命???

)，上到月台仲有兩分鐘就開車，響呢個時候某人仲話要去買野飲同零食，叫我自己去搵5號車廂，佢跟手就到咁話

.......真係好想搵野 "dub" 佢

........

上到車，太遲無地方擺行李.......唯有將個喼打橫放響兩人腳前，想蹺腳瞓個靚教都唔得........我地坐嗰邊係三人座位，我好希望坐窗口位嗰位人兄快D響中途站落車........

真係俾我求到，隔離嗰個叔叔響仙台站就落車

，yeah!! 沿站再無人坐，我地可以將個喼放響窗口位........

紫bear都坐得舒服D啦!!

一開車老爺急不及待先收email (城市人!!)，我就同步開始瞓.......都未瞓著就俾老爺推醒，佢發現原來個 I phone時間自己會adjust做日本時間........好神奇呀，老爺話應該係日本個網絡自動調較掛.........

瞓左一教，之後就睇下列車雜誌，睇下有咩買........

日本人真係咩都可以設計得出..........

雖然我都知雪地好跣，但唔通要成日帶住塊mat通街走??

呢個鞋釘好正，不過要3,465円.......我寧願PK算

.......

專用鞋上鞋，真係頂唔順

.......

呢個mini 腳架要2,500円!!

我的媽，黎日本前剛剛買左部細細嘅Sony 防水機仔，個sales就送左個呢款腳架俾我地，有三隻色，藍綠灰.......當時唔知藍好定綠好，個sales大概見我生得可愛所以送夠兩個俾我.......原來要2,500円，早知叫佢俾埋個灰色我啦!!

哈哈~呢個粉盒係用黎摭白髮!! 好攪野!!

 

 

瞓下教睇下雜誌，時間過得好快，一眨眼三個鐘就過去，十一點半就到左八戶........Oh yeah~ 青森之旅正式開始!!

......待續