2月21日 - DAY 3 (PART 6)
知床Utoro溫泉
睇完個激光show，響酋長之家shopping完，我地就行返去酒店嘞......
近酒店門口有個足湯......
望落去環境都唔錯，不過我地已經凍到手腳僵硬晒都無意欲浸~
返到去酒店，一入lobby就見到酒店d staff企晒響度等我地，原來佢地預備左d熱湯招呼睇完激光show返黎嘅客人
.....響外面凍到黐筋，呢杯熱茶真係來得及時，好多謝佢地咁貼心嘅服務!!
仲有昆布茶，試飲完鍾意可以入返d貨~
飲完茶of course快d去做返d緊要野，shopping呀!!
響知床Utoro溫泉呢一晚真係好繁忙，基本上由坐shuttle bus到達酒店嗰一刻我地都未停過，check in完已經夠鐘食飯，食完飯就即刻出去睇show，睇完show shopping， shop完就拿拿聲上返房換浴衣去大浴場泡湯，真係趕到氣咳
......我見其他d blog友去玩好多都總係hea住咁渡假，但我地就硬係趕完一場又一場，真係好盡責嘅遊客呀!!
同老爺約定個時間，就各自入去浸浸啦......
入到去真係嚇死人，超多人，塞滿晒成個更衣室，想搵個籃位放衫都要等d人除完衫行開先攝到埋去，去日本浸浴咁多次真係未見過多人多到咁，一個個赤條條咁響度除衫著衫，有d恐怖囉，又嘈
.....
呢間酒店嘅溫泉設施都算幾多，大浴場入面，除左一般嘅浴池，有個按摩池，另有一個薰衣草池，成個池紫色，幾過癮，上多一層係露天風呂，不過有圍欄阻擋住，要企高先可以望外面嘅流冰景....當然其實當時黑媽媽咩都睇唔到啦~
(以下兩張相係from酒店web site)
就算只係大浴場，如果朝早望出去都可以望到流冰景色~~
大浴場入面仲有sauna室.....我入去時有個女人打橫咁瞓左響度，赤條條無摭無掩.....雖然我已經習慣同唔識嘅人剝晒衫浸浴，雖然大家都係女人，佢有嘅野我都有，但我真係唔慣大家咁肉帛相見囉，唔該搵塊毛巾摭摭下身都好掛!!
浸浴都可以留言??
鍾意呢d大酒店入面嘅大浴場，毛巾任攞，唔駛下下就住就住~
浸完浴飲杯水補充返水份先~
同老爺會合後我地就落lobby逛下.....
lobby有好多擺設.....
仲可以上網，不過要錢~
另外有video播放影片，不過現場所見都無咩人睇，因為d人掛住做第二樣野......
響lobby hea嘅絕大部份都係香港人.....以前響外地凡有香港人嘅地方都一定好嘈，而家唔係啦，大家不知幾安靜，因為而家係 iphone嘅年代，今次去日本，見親d香港人十個有九個都好努力埋頭玩iphone，真係小左好多噪音!!
既然lobby有free wi-fi，我地當然唔蝕底，拿拿聲上房攞返晒d架撐落去玩返陣收下email先啦~~
玩左一陣，之後就上返房hea....食下酒店d welcome snack.....嗰包茶粉好難飲，當時發雞盲無留意，後來有blog友提起先知係黑胡椒....我真係唔識欣賞
沖下咖啡先......
最後唔小得係食宵夜啦~~
Hea左一陣就上床教豬嘞，因為聽朝要早起呀....期待已久嘅流冰漫步
，聽朝終於有得玩啦，好緊張呀!!
(...待續)
