2011年2月北海道道東道北12日 - hea在知床斜里

2月21日 - DAY 3 (PART 3)
知床斜里

上一回講到搭流冰Norokko號14:48去到知床斜里，響呢度我地要hea兩個鐘等到16:35先再搭酒店安排嘅shuttle bus去知床Utoro溫泉.....

呢個車站都算幾大~

要等差不多兩粒鐘，我地諗住出去車站周邊巡下睇下有無咩可觀嘅景點，首先當然係將d行李keep響locker先啦，點知原來呢個車站無大locker，d中locker唔夠位放我地個喼，結果餘下嘅時間我地都要拖住個喼走，真係吹脹!!

拖住個喼都唔行得遠，我地就響外面影下相.......

呢個車站嘅外形都幾現代.......

原來個外牆係新加建，好似個罩咁圍住成個舊車站.....

由側邊睇會見到原本座building平平無奇~

車站對出嘅廣場，無咩好睇.....

除左酒店提供嘅shuttle bus，去知床半島仲可以搭斜里巴士，巴士站就響JR車站左手邊......

其實14:48到站嘅流冰Norokko號可以搭15:40開出嘅斜里巴士，去到Utoro溫泉16:30，相比我地搭酒店shuttle bus可以早差不多一個鐘到達....

不過我都唔打算搭巴士，首先因為個巴士車費要1490円一位，咁明明搭shuttle bus唔駛錢做咩事要花多三舊水先，其次我地之前plan行程時無諗過會搭Norokko號黎知床斜里，所以無搵定Utoro溫泉嘅地圖，搭巴士去到唔知要行幾遠先行到去酒店，我呢d懶人最好就係一落車唔駛點行就到酒店啦，仲有就係我最初以為知床斜里呢度會有d野行或shop......當然唔搭巴士嘅決定後來俾老爺知道左後又俾佢哦左好耐，佢覺得我唔識分輕重喎，佢老人家認為花多小小錢可以早d到酒店就可以四周行下或者響酒店hea，總好過響呢度無無聊聊咁嘥時間等車，仲認為我嗰三大理由無一個係合理理由....不過當佢知道有巴士搭呢樣野嘅時候，架巴士已經走左lu，所以我都幫佢唔到啦~~

果然響外面逛左一陣無咩好行就返入候車室......

d凳背後面貼晒廣告，幾有諗頭喎~

蓋下印先.....

候車室附設左個展覽廳....

呢隻唔知係海x....

好無聊，咩都影一餐......

響度hea左一陣，真係好無聊，唯有買d野飲下~

老爺話咁響度吽唔係辦法，不如出去行遠d睇下有無野逛，反正大把時間就算拖住個喼慢慢行都唔辛苦.....好彩有行遠d，因為附近原來有間便利店可以消磨下，響呢個悶到抽筋嘅時刻便利店對於我黎講真係等同Daimaru啦!!

逛完便利店又再行遠d，皇天不負有心人，終於俾我地搵到有間shop係賣鞋嫁，仲要做緊big sale!! 大家可以想像當時我係處於一種點樣興奮嘅狀態中啦!!

因為我對腳細，好多size都唔啱，幾乎試勻晒全間shop d boots，間shop又無其他客，我好似行cat walk咁行來行去，搞左好耐，最後終於買左一對，3xxx円咋!! 仲要包送埋一對鞋墊.....呢對野除左有毛毛保暖，至正係個鞋底好掂，一d都唔跣，無論我點樣響d冰地上滑來滑去都ok無問題，超正呀!!

好開心買完野就行返去車站，差唔多時間搭shuttle bus.....

酒店安排嘅shuttle bus pick up location響車站對出嘅廣場，就響Route Inn Hotel對面，好易搵~

黃昏啦，個天色開始暗.....

16:35酒店shuttle bus準時抵達，架車都好full，得我地兩個響呢度上車.....雖然無無聊聊響度hea左兩個鐘，但成功入貨都總算俾我留低一個美好回憶，知床斜里，bye-bye啦，我地應該唔會有咩機會再見啦~~

(...待續)