2011年2月北海道道東道北12日 - Canoeing @ 釧路川

2月23日 - DAY 5 (PART 1)
Pension Atreyu > 釧路川

 

第五日啦!! Good morning....尋晚九點就已經去搵周公，今朝瞓到七點先起身，瞓足十個鐘，真係好正呀!!

今朝嘅行程全部都係Pension女主人同我地plan，尋晚佢仲專登寫定個schedule俾我地，好周到呀~


八點鐘先去食早餐~

仍然坐返尋晚dinner嘅地方~

古典嘅風扇燈

尋晚嘅dinner太正，令我地對今朝呢個早餐非常期待，不過原來係食日式，有d失望

主菜係雞，味道OK都幾好食，不過講真佢地嘅dinner真係出色好多~

食完早餐我地周圍影下相.....

好鍾意呢d咁大碌木，好歐洲原始feel~~

老爺話呢棟木屋係男主人自己搭建，好厲害，不過我唔知老爺響邊度聽返黎，所以唔知真定假，佢講d野我成日都唔係好分得出係真定係玩緊我

呢度d家品全部都好古舊....

係呢個暖爐算係現代d~

呢位就係女主人Ayumi Tomita，佢真係好nice嫁成日都笑~

Pension 主樓全貌

呢間木屋仔旁邊放左好多canoe，唔知其中一隻係咪一陣間俾我地坐呢?

鏟雪車?

呢個應該係農場，不過而家鋪滿晒雪，見唔到有動物~

主人養左兩隻狗，一朝早就同兩隻狗響度玩得好high，仲示意我地一齊玩，不過我一向怕動物，我d身體語言應該令到兩隻狗仔幾無癮，我諗.....之後就見主人將兩隻狗鎖返入籠，sorry囉，我唔係有心歧視你地，但我真係唔想同你地有任何肢體接觸.....

影左一陣相我地就返入房執定好d行李同埋預備出發去玩canoeing~

我地約左9:30出發，女主人叫我地早15分鐘去主樓著衫....呢個canoeing嘅費用係包埋響我地住宿嘅package入面，如果就咁book要7500円一位....去到主樓已經見到有兩個哥哥仔響度同女主人傾緊計，其中一個係我地個guide，之後佢地就教我地點著件dry suit，呢件dry suit同前一日響知床著去玩流冰漫步嗰件野有d類似，不過就唔係exactly一樣，detail係點而家過左半年有好多我都已經唔係好記得，唯一記得嘅係知床嗰件衫係連埋對鞋，所以難著d，今次對鞋係分開，仲有著完件dry suit仲要加多條防水褲，最後仲要著埋自己件羽絨保暖再加多件救生衣，其實真係幾臃腫

俾個look大家睇下~

搞掂晒就出發lu....

拖車上呢兩隻紅色嘅物體就係一陣我地要坐嘅canoe.....旁邊呢個哥哥仔就係我地個guide，佢好高大威猛兼靚仔嫁!!

由Pension出發好快就到登艇嘅地方，一分鐘車程都唔駛.....呢度唔知係邊度，不過景色好靚呀!!

個靚仔guide同我地講解左d要注意嘅事項，又教我地一d划艇嘅基本技巧，佢識dd英文，不過佢預備左幾張卡俾我地睇，上面用英文寫定左我地需要留意嘅野....其實所謂canoeing，我地呢d遊客都係貪得意叫做一場黎到即管體驗下啫，要真係駕馭隻canoe都係好難嘅事，老爺啦我泛舟湖上都已經係N年前嘅事啦，相信個guide都好明白呢個事實，所以佢同我地講話唔需要太認真咁focus點樣划隻canoe，佢叫我地只要好好享受成個tour，控制canoe嗰part由佢負責就可以....佢咁講真係好啱我心意呀

呢個canoeing係將兩隻獨木舟fix埋一齊，我同老爺坐船頭，一人坐一隻，個guide就坐響我後邊，估計係除左因為我比老爺輕磅，佢要平衡返個重量，最主要係佢一定明白老爺嘅划艇技術無論點睇都一定掂過我啦，所以佢要坐響我嗰邊幫我control隻canoe~

Yeah!! 出發啦))))

響靚仔哥哥嘅instruction下好快我地就撐划左出去一個好大嘅湖，呢個湖有d似我地尋日黃昏黎過嘅古丹溫泉對開嘅屈斜路湖......

由湖中心望出去個view真係好靚呀，靚仔哥哥話要幫我地影返張相留念，真係唔該晒佢呀!!

之後我地就划返轉頭，穿過條橋直出去釧路川.....嘩，好靚呀!!

我覺得用仙景黎形容絕不為過，事實上現場睇要靚好多嫁!

呢位就係我地個guide啦，我無誇張，真係幾靚仔嫁，哈哈!!

其實一開始我真係好努力咁划嫁，不過划左一陣已經覺得開始攰，所以無耐我已經係咁意作狀划兩野就算，咁我其實都好忙嫁，要影相嘛，沿途嘅景色真係好靚，再加上朝早有微微嘅風，耳邊有潺潺流水聲，個感覺真係好正好舒服呀!!

呢條釧路川嘅河水好平靜，悠悠閒響度划艇真係好正，不過川流兩邊有好多樹木，有d樹枝會伸展左響河面上，每當我地經過呢d位置時靚仔仔哥哥就會示意我地烏低身唔好俾d樹枝撞到~

黎到呢度靚仔哥哥話停低休息下.....

呢度d水好清徹....

水入面有好多綠色嘅植物.....

好似話呢個位置因為個地底有溫泉水，所以有植物生長，靚仔哥哥叫我地掂下d水，果然唔係冰冷，有dd暖.....

佢又攞出一本相部，show俾我地睇解釋係咩黎，不過我已經唔記得係咩，其實當時都唔係好明佢講係咩，好似係海草掛?

抖左一陣又繼續向前划......

又一處危險點，棵樹跌到好近水面，我地要衝過去呀!!

好藍嘅天空


好清嘅河水

沿途久不久靚仔哥哥見到一d比較特別嘅野都會嘗試同我地解釋.....

好似呢d foot prints就係狐狸朝早留低嫁!

靚仔哥哥大概驚我地唔明佢講咩，會扮d鳥雀同動物嘅叫聲等我地分辨，一邊講仲會攞本相部show俾我地知....呢d相全部都係佢影，好厲害呀!!

呢d細小輕身d嘅好似係松鼠嘅foot prints掛，唔sure係咪，太耐唔記得lu~

仲有呢d響川流兩旁嘅泥土，好似話係N年前嘅草同d火山灰一層層咁堆積而成....係咁上下啦，當時都已經唔算真係好聽得明，而家過左咁耐都唔太記得 (唉，都話d野隔太耐先寫唔好啦)

 



d樹枝跌左落水面，天氣太冷凝結成冰~






快樂嘅時間實在過得好快，話咁快一個鐘嘅釧路川canoeing就玩完嘞.....今朝呢個體驗真係好正，真係有d唔捨得呀!!


上返岸，我地就要返去 Pension離開，點知靚仔哥哥又有d驚喜俾我地呀!!


(...待續)