2011年11月深圳東部華僑城2日遊 - Day 1 (Part 1)

早兩星期同屋企人一齊去深圳東部華僑城玩左兩日...我地響中旅買套票，包來回巴士票、入場門票同酒店一晚~

朝早8:00響太子維景酒店附近上車....

差不多一個鐘去到皇岡口岸，過左關再轉另一部細d嘅van仔，再坐多大半個鐘就到大梅沙華僑城東門入口，落車地方係一個停車場，之後又要轉909公交車....其實我真係覺得d交通好鬼煩，轉幾轉車，真係坐到人都顛，咁大個渡假區，d交通設施點解唔安排得完善d，架van都去到入口處啦，做咩唔上埋山上去嫁，又無free shuttle bus接駁，響入口度d車站又亂七八糟，排排下隊又話排另一個車站，轉去排左一陣又話之前排緊嘅先啱，真係媽媽聲....不過老爺同細佬佢地話內地係咁嫁啦，如果俾埋你free shuttle bus，無909公車d人點賺你錢呀!!

明明寫住909巴士站排排下都可以叫你走，咩因由? 係內地先會出現d咁情況!

仲要周圍一地垃圾，唉...呢d就叫經濟大國

909公交車10蚊一位....

排到去前頭臨上車幾個男人企響度收錢....唔知點形容，總之就係好唔文明嘅感覺....我真係好唔鍾意返大陸，不過諗住陪下媽咪又可以同姪女玩先無計~

東部華僑城面積好大，一共分三個區域︰大俠谷、大華興寺、茶溪谷....大俠谷主要係機動遊戲設施，大華興寺顧名思義係寺廟，一般遊客都未必會花時間去，至於茶溪谷就有幾個主題公園同酒店.....由華僑城東門入口可以搭909公交車直上茶溪谷，如果打算先玩大俠谷亦可以由東門入口行去大俠谷入口，不過都幾遠囉，而大俠谷同茶溪谷兩個區域並無直接交通連接，由大俠谷可以搭纜車或者索道去雲海高地，然後再轉小火車或者接駁巴士去茶溪谷....老實講，都係嗰句，d內部交通接駁真係煩Q死，又早close，真係搭到想打人!!!

因為我地嘅套票係包埋大俠谷同茶溪谷嘅入場門票，不過d門票就要先去酒店攞 (好煩囉!)，所以我地響東門入口搭909號直接去茶溪谷，車程都要成十多二十分鐘....去到茶溪谷我地先去酒店攞入場門票同放低d行李.....近茶溪谷出入口有兩間酒店︰茵特拉根酒店同黑森林酒店，茵特拉根酒店最豪最靚，房價當然好Q貴，最平都要三千幾一晚....三千幾，可以走一轉台灣有餘啦，我地當然揀另外一間黑森林酒店，不過都唔算平，都要兩千幾嫁.....

去到酒店，d職員service都OK啦，做左check in話兩點先有房，然後又同我地講如果想早d攞房可以加一舊水即刻有房仲同我地upgrade有陽台房間，真係，響內地，乜都係錢，只要有錢就乜都得~


酒店lobby




房間唔算十分大，不過都好乾淨企理，仲幾有童話feel....







比較奇怪係間間房都只係有shower，無浴缸~


個電子磅係唔work嘅~


好有童話feel嘅鐘~


其他d裝飾擺設都係~




我地d房都係向泳池...


酒店處處都好有歐陸色彩~~

搞掂晒就去茶溪谷玩啦.....

兩天門票，可自由出入~

一入園就見到好大嘅花田，十足去左A貨富良野咁~

d向日葵都足有人咁高嫁~

好大隻甲虫!

茶溪谷有好多個主題景點，如果用腳行唔知要行幾多日，園內有d叫電瓶車行走，總共六個stop，可自由上落~

莫講話我地一家有老有嫩唔想佢地行得咁辛苦，我咁lazy都唔會行啦.....

而且三十蚊位，即刻科水上車啦~

第一個stop係四季植物館.....

館外有個蓮塘~

一入館就有個好大嘅地球，不過唔知同植物有咩關係~

館內有好多花花草草，其實都幾靚~

仲有好多古靈精怪聽都未聽過嘅植物.....

我地好無聊，連呢個噴水池都玩一餐，搞到一身都濕晒

個植物館都幾大，行得累可以坐下.....

又有另一個花田....

有鸚鵡表演....

植物館後面有個迷宮，不過連姪女都話好easy，一d難度都無~

呢個玻璃迷宮仲簡單，仲要有塊玻璃係碎左....點解唔拆走佢，好危險喎~

呢個大汽球同海洋公園嗰個一樣，不過今日無開放....

響第一個stop都消磨左好耐，之後我地就等電瓶車去第二個stop，都有好多人等，好多時都要等一、兩班車，不過d車都唔會太疏啦~

第二個stop係濕地花園....呢條紅橋好搶眼....

又有蓮塘，d蓮花開得幾靚~

可以望到遠遠嘅大華興寺四面觀音像~

呢個裝置好過癮，係取水器，不斷咁轉個軑盤可以將下面d水抽上黎.....

有名堂嫁，叫阿基米德取水器~

Hea左一陣繼續去第三個stop....

第三個stop係三洲茶園，不過我地skip左佢唔去，茶園，無咩興趣....第四個stop係手藝坊....

呢度無啦啦有個關於近代史嘅庚子首義館.....

館入面有好多圖片介紹，都幾詳盡同幾有趣味性，唔算好求其喎~

不過最好玩係有個電視，俾你企響前面自拍，響ceiling有兩部電視會顯示剛剛影嘅自拍像....好好玩呀，我地響度不斷擺pose玩左好耐

之後我地上去茶藝坊....

呢條橋幾型....

呢條橋都好長，行左一半已經唔想行，不過姪女話要行，佢話做事唔可以半途而廢，唉....

響條橋上可以望見遠遠山頭有好多茶田~

明明叫茶藝坊，其中一層樓又有釀米酒坊....

玩左半日，睇睇錶原來已經一點幾，係時候搵地方醫肚.....

(...待續)