2011年11月深圳東部華僑城2日遊 - Day 1 (Part 2)

回想近幾年去外地玩，唔知點解，每次我地總會遇到好多好難忘好騎呢嘅經歷....好似響日本學人日歸浴搞到老爺當街要表演nude show，次次自駕又總係諸多障礙，唔係攞車唔順利，就係行錯路到暈，甚至差d撞雪山幾乎客C異鄉，去澳門都要PK到整穿條牛仔褲先安落，上次響九州又PK到要入醫院....今次諗住去兩日深圳啫，心想應該都無咩騎呢事件會發生啦，點知依然有機會俾我媽媽聲....今次呢篇遊記就講到呢個東部華僑城之旅最匪夷所思嘅經歷，不過過後回想，過往所有不快或騎呢事件，其實都係一種難得嘅經驗，退一步想，仍然能夠同家人或者心愛嘅人一同經歷都算係一種幸福.....騎呢事件相信今後仍然會繼續發生，而家求神拜佛，只希望過年去關西同二月去Paris可以順利d唔好咁多阻滯....至少唔好要我再PK啦，我真係唔想

先繼續講返個行程，上回講到離開手藝坊已經一點幾，係時候去醫肚....搭左一個stop嘅電瓶車，去到茶翁古鎮，呢度有幾間食店~

建築物嘅外形都好古色古香~

我地揀左呢間叫聚茗樓....

d小菜都OK~

呢碟墨綠色一片片嗰d係茶業，幾香口~

唯獨呢個雞超唔抵，唔好話無雞味，直情係淡而無味，but又唔平，差不多兩舊水!

食食下已經唔記得影相

呢個椰汁係國宴飲料，以為好難飲，但味道又ok喎~

食食下忽然聽到外面有鑼鼓聲，係男兒當自強，拿拿聲放低碗筷走出去睇下，原來係醒獅表演....

仲要響梅花樁上跳來跳去，個梅花樁都好高嫁，好功架呀!

食飽就周圍逛下.....

之後見到剛剛舞獅嗰兩個師傅響度練習緊....原來係兩個少年，十二、三歲左右咋，厲害!

廣場中間有個水池，形狀古怪，好似個頭盔咁，離遠將個頭同佢夾好位置可以影搞笑相~

d屋頂係用瓦片一塊塊鋪蓋嫁~

逛左一陣，影下相，都幾寫意....見已經將近三點，我地就搭電瓶車離開返去總站大劇院....

呢個就係大劇院，每日下午都會上映「天禪」，不過據講套野都好悶下，可以不看~

大劇院附近d屋仔好有童話feel.....

好似瑞士、奧地利d屋仔




呢條步行街兩旁都係一d小商店，不過sell嘅野唔多吸引囉

茵特拉根湖

呢度個景色好靚，據講係仿照瑞士嘅Interlaken~

湖邊呢位著粉紅色衫咁可愛嘅小妹妹響度望咩呀?

湖中有隻黑天鵝....

呢條橋廊好似琉森嗰條木橋....

呢個鐘樓可以走上去玩~

成個茵特拉根鎮有好多呢d銅像，其實都係人扮嫁，遠睇真係好似....好多人走埋去同佢影相，我仲見到有個女仔借意抽佢水

茵特拉根鎮好有氣氛好熱鬧，條街同廣場仲不斷有音樂播放~

好 London feel嘅電話亭，第一時間諗起Doctor Who

行得攰亦可以坐下~

Hea左一陣我地就離開茶溪谷，搭shuttle bus去雲海高地，目的地當然係華僑城入面我最期待嘅「登峰造極」，即係類似美國大峽谷嗰個skywalk咁，企響上面可以俯瞰成個大梅沙海濱....最重要係呢個伸延出懸崖之外嘅U型觀景平台，全個地板都係透明玻璃，可想而知幾刺激

點知去到竟然係維修close左....頂!! 當堂媽媽聲，有無搞錯，重點項目都close，之前又無通知，at least響售票處都應該要有通知啦，好失望好唔高興囉!!

去唔到觀景台，唯有行去搭纜車落大峽谷....通往車站沿路都可以有d景望下~

有個高爾夫球場....

左面嗰枝長形柱有d似海洋公園嗰d從高空墜落嘅機動遊戲，不過呢個離心力太勁，離好遠都聽到d人不斷尖叫，我地無人想玩~

由雲海高地去大峽谷可以有兩個途徑，一個係坐類似我地昂平360嘅大峽谷索道，另一個就好似山頂纜車嘅叢林纜車，因為呢款纜車嘅座位係面向落山嘅方向，所以我地打算由雲海高地搭去大峽谷，諗住衝落山個感覺過癮d嘛，而今晚返上去就搭索道，點知行錯方向，原來響「登峰造極」出口一邊係通去索道，另一邊係纜車，兩個車站係相反方向，真攞命，d指示真係好唔清楚囉....算啦，既然已經去到索道車站，無理由又行返去另一邊啦~

似唔似昂平360或海洋公園纜車?

去到大峽谷，首先去「深海探奇」睇水母....

大峽谷話就話係一個生態樂園，但大部份設施都係一d機動遊戲，其實對於內地嘅機動遊戲我真係無咩信心同興趣，不過之前聽過其中有個係類似海洋公園我好鍾意玩嘅滑浪飛船，華僑城呢個仲要係穿越個大瀑布，好想玩囉....望下錶已經四點，於是就同細佬媽咪佢地分道揚鑣，約定五點半再集合，佢地就搵地方hea，我同老爺就去玩衝浪.....

首先睇下個樂園地圖搵下個機動遊戲響邊，個map都好簡單下囉，d機動遊戲得個名並無介紹係d咩類型嘅遊戲，老爺估計個滑浪飛船應該叫峽灣棧道，響山腳位置....都好遠喎，於是就快速碌落山去.....但係呢度d地方實在太大，行到去海菲德小鎮附近我已經行到成隻狗咁，沿路又無咩指示，有人開始有d猶豫究竟個方向啱唔啱

行行下見到啦!! 有人就好肯定話條軌道一路通向山下，一路碌落去肯定無錯....

好想玩呀!!!!

呢度係海菲德小鎮街...其實無咩啱行，至少我覺得啦....而且人又多~

落到去山腳，見到大峽谷瀑布~

當然唔可以同真嘅大峽谷瀑布相比啦，但離遠望都幾靚嫁....我發覺呢個東部華僑城d景點大部份都係copy cat，保險地將世界各地出名嘅旅遊景點 or概念照搬過黎，總有一樣野你會覺得啱玩囉~

其實抄唔係問題，我地呢d黎內地玩嘅已經一早做好心理調節，但至少你d指示要清晰d啦唔該....行左好耐都搵唔到個峽灣棧道入口，有人仲要帶左我走入去呢個幽深嘅竹林，大家睇下，係好長嘅樓梯，唔駛講最後當然係行錯路要我走返轉頭，真係愈行愈火!!

 

幾經辛苦最後終於搵到啦....點知原來係遊戲嘅出口，當堂暈左響度，行到身水身汗竟然去左出口，原來個入口響山上嘅海菲德小鎮，SHIT!!!....呢個時候，唔知係咪我嘅面色實在太恐怖，有人響發茅之下竟然走去同d工作人員理論，企圖要佢地俾我地響出口呢度坐船上返去入口....哈哈，而家諗返起都覺得好好笑，老爺當時好man呀....當然無論老爺點嘈都無用啦，雖然呢度係內地但人家都有小小規矩嘅.....無奈下我地唯有走返上山，唉!

其實事後諗返都唔可以怪老爺，d指示真係好唔清楚....圖下方紅色圓圈6號係叫峽灣棧道，點睇都係最似我地想玩嘅衝浪遊戲啦，所以老爺一開始就估計個入口響6號下面屋仔位置，點知原來係響瀑布上面12號位置，叫峽灣漂流....頂，鬼知你同一個機動遊戲會有兩個名，入口同出口仲要隔鬼屎咁遠!!! 老老實實，就咁睇，點都聯想唔到12號呢間屋仔係玩衝浪啦!!

行左大段冤枉路我已經想殺人咁款，又要行返上去!!!....但更晴天霹靂嘅係成個大峽谷d行人電梯只有兩種，一種係維修暫停使用(!)，另一種竟然只係有落無上....

咩道理? 有乜理由係落而唔係上，如果只有一條電梯，點計都應該要set到係上而唔係落啦?? 況且地方咁大整多條電梯都唔怕死掛....我知我知，響內地唔可以用common logic去思考常理，但當你身處我當其時嘅環境你就會明白我當時係幾咁沮喪，唔出動16個字嘅粗鄙語言真係唔可以將心中嗰道屈氣抒發出黎!!

平時行多幾步樓梯都喊救命嘅我，今次仲要行錯走回頭路，d樓梯好似行極都行唔完，一邊行仲要發現一陣間玩完我地又要再響出口行多一次上去，真係有種想死嘅感覺!!

唔知行左幾耐，終於行到返去海菲德小鎮....行行下又見到個峽灣棧道，本來好沮喪嘅心情一下子又興奮返!

上到去點解唔見有指示個入口響邊嫁?  又無information，唉....搵左一陣問下人終於搵到....點知又一個晴天霹靂，剛剛close左!!!!! 頂，真係媽媽聲!!!!! 有無搞錯，明明寫住五點半close，而家只係四點九....原來所謂五點半close係指佢地d工作人員五點半close閃人，佢地要預一個鐘頭時間去收拾，所以公眾就要提早d四點半close唔好阻佢地收工.....呢個唔好阻佢地收工所以要預早close嘅理論，我唔係生安白造嫁，因為之後又有另一樣勞氣事件發生左先至會令我歸納出呢個結論，至於係咩勞氣野好快會講到~

當時我地企左響度望住個提早收工告示未知點反應，呆左一陣我第一個念頭就係如果有人唔係行錯路就趕得切四點半close前玩到啦....以我咁驕縱又火爆嘅性格，大家可以想像當時老爺係幾咁可憐，其實當時我無鬧佢，真嫁，我係明事理嘅人，我都知唔可以怪佢，所以我無鬧佢，我只係俾左d面色佢睇....

折騰左成個鐘乜都玩唔到，仲要上上落落d樓梯行到成隻狗咁，真係極度沮喪，想話搵張凳坐下又無....心情平復左一陣，老爺就話頭先一路行落山時見到有個叫「水上人家」嘅景點，個外型好古怪，不如去睇下啦~

就咁睇個building外型係斜嫁，我地一心估計係d類似日本好興嘅視覺錯覺博物館.....

點知入到去發現只係好細一間hydro-generating展示館....大佬，你唔係俾人玩嘅設施你就唔好將個building搞到咁K怪呃人走黎啦! 仲要係攔住晒無得入去，頂!!

無計可施，估計細佬呢個時候應該同媽咪去左睇「咆哮山洪」show，於是走返去睇下撞唔撞到佢地....去到個show已經開始左，於是搵個位坐低叠埋心水欣賞下啦~

又係類似海洋公園 or 海洋Disneyland嗰d show啦，不過唔知個故事講乜，只係見d特技人員成日跳落水入面....

睇完show同細佬佢地會合，報告完之前d激心野，心情已經回復返晒....本來之前我地打算響大峽谷呢度食埋dinner先返上去酒店，不過細佬話佢check左原來上返去雲海高地嘅纜車同接駁去茶溪谷嘅巴士六點鐘close，咁費事今晚要媽咪行返出去華僑城入口搭909公車，所以不如先搭車上返去酒店休息下再響茶溪谷搵食啦~

去到纜車站以為會有好多人排隊，點知水靜河飛，去到入口個職員問我地去邊，咁我地話要上返去雲海高地再轉去茶溪谷，其實當時無咩人搭纜車我地都覺得好奇怪，但係個職員又無溫馨提示我地，照樣俾我地上車，於是我地就同另外兩pair遊客一齊包車上山，以為咁好彩唔駛同人逼，其實就咁又開始左另一個匪夷所思嘅勞氣事件啦....

下面張相片係extracted from 某 web site....圖中就係之前所講d座位只係向落山方向嘅叢林纜車....呢個纜車個速度好快嫁，如果係落山真係幾刺激，不過上山都幾過癮啦....不過其中有一個位置唔知點解係分叉左兩段軌，我地當時都諗，如果一個唔覺意架車行錯軌或者行慢左，會唔會咁啱同落緊黎嘅對頭車相撞呢，呢度話晒都係大陸....諗返起都一額汗.....

好快就上返去雲海高地，個天已經開始黑，周圍靜俏俏，只有兩個工作人員響度準備落閘收工....見到我地佢地有d奇怪又問我地去邊，我地又照講一次要去茶溪谷，順便問埋佢地接駁巴士站響邊啦，點知佢地話接駁巴士應該已經close左....唔係掛，都未夠六點，正當我地都未知點反應，佢地就即刻叫我地繼續向前行，話會call車響前面巴士站接我地.....我諗佢地其實係想拿拿林打發我地走唔好阻佢地收工囉....向前行左一陣，一路行個心一路開始慌，四周鬼影都無一隻，話咁快個天又已經黑晒，d街燈超微弱，仲要開始落雨，好恐怖呀，如果前面無人我地會唔會露宿銜頭嫁??

好在行左一陣就見到個接駁巴士站，都仲有幾個職員響度，當然佢地一聽我地話要去茶溪谷就耍晒手話無接駁巴士，同我地溝通嗰位阿姐一副好cool模樣....你老闆，我地當然即刻扯晒火，當時只係五點十個字，都未夠六點，你地隨便話close就close，咁你地下面大峽谷就應該要有通告唔好放人搭纜車上黎啦，上到黎先話無車，落返去嘅纜車又已經落閘放狗，咁你地叫我地企響度點呀?

嗰位阿姐就叫我地趁仲未夠六點快d行去上面山坡嘅大拐彎小火車站搭小火車去茶溪谷....真係你老味，莫講話我地一家大細有老有嫩根本無可能五分鐘內行到去，就算得我同老爺兩個人，周圍黑媽媽都唔會行啦....你真係當我地白痴，我當然知道你阿姐又好似前面工作人員咁想打發我地走，我梗係賴死唔走，仲要十足一個潑婦咁響度係咁鬧.....嘈左一陣終於有位阿哥走出黎調停，佢都好有禮貌問我地想點，其實我地真係無乜想點，我地只係按你地一路指示走到上黎，你地唔能夠一句話接駁巴士無啦啦早close左就撒手唔理要我地自己諗辦法，你點都要安排車送我地去茶溪谷囉.....呢位阿哥大概係話得事嘅人，佢就叫我地等一陣，佢會特別安排一架909公車兜過黎接我地.....其實真係唔難，佢地根本好容易就調度d交通，只不過個個職員都想置身事外早早收工，唔會幫客人解決問題....經過今次呢個trip，我深深明白，響內地，除左有錢，只要夠惡就得，我所謂嘅惡，當然係要係響理直氣狀嘅情況下發惡啦!

好快就返到去酒店，折騰左一輪，真係有d筋疲力盡，於是就同細佬佢地約定先響房間攤抖下，七點先出去搵地方dinner啦.....




大家見過酒店會provide膠拖鞋未? 唔知係咪方便大家去游水


Hea左一陣，夠鐘我地就會合一齊行過去茵特拉根酒店嗰邊，雖然係星期六，但周圍都冷清清，d遊客唔知去晒邊度食野呢? 最後見到有間叫丹桂軒係食buffet，158一位，老人家同小朋友就88一位，是但啦，費事周圍搵嘛~





不過講真真係唔係好多野食.....








D野食無乜淨好耐都無人refill....






唯一比較特別係野飲有埋紅酒，係長城牌嫁，都OK唔係太差啦~


有片皮鴨....
 

每次只可攞兩件....


唔理咁多，我同細佬排完一次又一次，攞到一枱都係...我係唔會俾自己蝕嫁!!


無咩好食，細佬仲玩埋自製懷石料理




呢間餐廳響門外寫住收十點，又係嘞，所謂十點係指d職員收工時間，佢地九點已經開始陸續熄燈同請你地先埋單....我地七點幾黎到時都仲有d野食揀下，食到大約八點半時已經無咩野食，連片皮鴨個counter都close埋，就響呢個時候見到有pair香港人帶住個幼童入黎，坐低無耐個阿爸只係掛住俾部 iPad個女睇卡通，個阿媽走出去巡個圈攞左小小野食返黎，之後就好唔高興咁問waiter想要飯，個waiter就話要入去廚房睇下 (我知我好八，無計，天性如此，同埋我都係想趁機見識多d人生百態啫)....我當時心諗，如果你間餐廳係想d客九點閃人你地咪老實d寫話close九點囉，通世界嘅人都唔會明你地內地人原來係要預早一個鐘去收檔等收工嫁....OK，就算你地國內係咁習慣，既然預左九點趕人走，八點多已經無野食，咁你地八點半就唔好再收客啦，又或者at least你地要同個客講明無咩食囉，內地d人如果個個都真係繼續咁樣service，我真係唔知點樣仲可以自稱經濟文明大國?!

好在我地早到，都叫做食得飽個肚.....食飽後我地就去湖邊逛下.....


個夜景都幾靚嫁~


呢條就係下午見過嘅仿瑞士琉森橋廊~




響湖邊hea左一陣，我地就行返去酒店.....




同姪女玩左陣，經過一日咁「多采多姿」嘅奇遇，大家都好攰，係時候教豬啦....good night!!


(...待續)