2012年2月巴黎倫敦11日 - 巴黎臉上的疤痕

11 FEVRIER 2012 (DAY 1 - PART 6)

完成晒羅浮宮之旅，已經係三點半，行左四個多鐘，對腳真係攰到好似唔係自己咁.....離開 Sully Wing，我地行返出去金字塔底部，仍然係超多人~~


出到去又見到條螺旋形樓梯，老爺又即刻衝埋去影相.......

跟住嘅行程當然係到左最重要嘅shopping 時間，響金字塔底部拿破崙中庭有好大嘅書店同禮品店，有成兩層，真係小d 腳骨力都唔掂，不過即使前一分鐘我攰到想死咁款，只要一見到係賣物嘅地方，我d 精力自自然然又會唔知由邊度走返出嚟


樓下嘅book store 除左有大量嘅藝術圖書，仲有好多月曆、文具、postcard 賣，當然全部都印有羅浮宮館藏嘅圖片啦，真係件件都揀得落手，不過價錢就幾貴囉，但當然我都有d 斬獲啦，而且掛住shop完全唔記得影相......而樓上就係禮品中心，有好多飾物、衫、porcelain、複製畫、雕塑，d 雕塑好誇張，好似有個維納斯女神雕像有成個人咁高，真係好懷疑有d 咩人會買囉......禮品中心d 野好貴，而且唔係咁啱買~

逛完book store，緊接嘅係長長嘅購物長廊，有紀念品店，郵局、kids shop、餐廳，連 L'Occitane 都有!!


Yeah!! souvenir shop 呀，賣飛佛!!


好多mona lisa 副產品，雖然d 野實在好貴我真係忍得好辛苦，最後只係shop左幾個items，但都真係樂而忘返，哈哈!!


Starbucks.....而家係咪成個地球只要有人氣嘅地方都已經俾佢入侵晒呢

逛完晒成條長廊，盡頭就會見到個倒金字塔啦.......


記得嗎? 蘭登教授講過，聖杯就藏左響下面.....

 

紫bear當然要走出嚟影張相做個紀念啦，話晒下面嗰個都叫做聖母瑪利亞喎


旁邊有間Apple Store!


唔駛講老爺第一時間衝左入去~


又有條透明玻璃樓梯.....


不過好似IFC 嗰條型d 喎.....當然老爺又要影造型照啦


好多人......不過大概無乜邊間蘋果店唔係咁樣~


我最有興趣嘅當然係 iPhone case 啦......不過我覺得佢地真係唔識做生意囉，竟然唔出d 有羅浮宮藝術品圖像嘅case，真失敗

 

 逛左大半個鐘，叫做入左dd 戰利品，老爺就催走，佢話想趁仲有陽光出去外面影返多d 玻璃金字塔相喎~

未離開之前當然要響金字塔內部影返出去外面先啦......

透過大大片嘅透明玻璃，可以望到外面典雅嘅建築......


有個小型玻璃金字塔~

 

要 bye bye lu.....

仍然仲有人排隊買飛，都接近四點半，仲有個半鐘就close 喎

外面天色仲係好靚~

藍空下嘅 Richelieu Wing，好靚呀

影返張騎兵凱旋門嘅正面先~




Wow!! 睇到遠處嘅巴黎鐵塔呀~~


路易十六雕像.....呢條友同我地嗰個宋徽宗一樣都係無心朝政，成世人最叻就係掛住玩同亂洗人民嘅錢，佢個皇后咪就係由Kirsten Dunst主演嘅瑪莉皇后囉，兩公婆都揮霍無度......







呢個由貝聿銘設計嘅玻璃金字塔原來不知不覺間已經有二十多年歷史，當年起好之後貝生俾人媽到飛起，法國人認為具有歷史價值嘅羅浮宮既然係巴黎嘅象徵，無啦啦整個咁現代化嘅玻璃金字塔響度，完全係破壞左羅浮宮原本古典嘅風格同景觀......「巴黎臉上嘅 一道疤痕~」Da Vinci Code 入面 Jean Reno 飾演嘅法舍隊長係咁樣對蘭登形容......

不過貝生認為，將簡約而富現代感嘅金字塔作為羅浮宮嘅入口，就好似人類由古埃及文明開始進化，一路探索直至近代藝術演變，一個介乎舊同新嘅象徵連結......呢個idea 真係好正......呢一道疤痕，除左個意念型格，當然亦有實際嘅效用，佢唔單止為羅浮宮帶嚟富時代感嘅風貌，透明玻璃亦都巧妙咁將光線引入原本晦暗嘅地下樓層，同時又解決左羅浮宮入口同通道太窄太細等等嘅問題......時間耐左，而家d 法國人對呢個金字塔又識得欣賞lu~


大金字塔三邊仲有三個小玻璃金字塔，好可愛，作用係指示三個主要展館嘅通道~

圍繞住大金字塔係d 三角形水池，冬天結晒冰，夏天會靚好多，仲會有噴水~

結晒冰又有另一種美態.....(唯有咁講安慰自己)

小朋友玩冰玩得好開心~


有好多人索性走埋上去玩滑冰.....

 其實附近有告示話危險叫d人唔好走入去冰池，不過無人理會...... 

我地都忍唔住走埋上去......真係好跣嫁，又好驚d 冰會裂開......不過真係幾好玩


玩左一陣我地都閃，因為真係好驚d 冰會裂，同埋好多人PK 囉.....好彩閃得快，無耐就有scurity guard 攞住枝棍走出嚟吹雞叫d人唔好再玩，好惡啊，揸住枝木棍打下打下個樣


之後就繼續周圍影下相，我地有d 唔願走咁樣......


除左玻璃金字塔，當然古典嘅宮殿亦都好靚，影到停唔到手~


歐洲中世紀嘅建築美學，華麗卻又典雅~
 

宏偉而又莊嚴.....真係要細心欣賞........


Pavillon Richelieu，拿破崙三世套房同馬利中庭就響入面啦~

古典嘅建築配襯古典嘅街燈~

偌大嘅廣場、優美嘅建築、細緻嘅雕刻，令人感動嘅藝術氣息，要點樣先可以將呢種氣氛都投入相片之中呢?

一個雕像......

一條圓柱......


一個陽台......


一盞街燈.......

每一個角落都可以係一幅風景......羅浮宮嘅美，要親身去感受~

咁靚嘅地方，真係唔想走


未走已經又想再嚟



人來人往，羅浮宮每一日有數之不盡嘅過客，大部份人就好似我地一樣，花個一百幾十就試圖用幾粒鐘嘅時間妄想吸入幾千年嘅歷史文化藝術空氣，或者有人會覺得人迫人擠到某幅名畫某件著名雕塑面前，影張相，然後又匆匆忙忙趕去下一個景點好似有d 無聊，但係換過另一個角度，要了解藝術固然唔係一件易事，但係所謂藝術欣賞，講到底其實係好個人嘅一種感受，羅浮宮既然係世界殿堂級嘅博物館，又係僅次於鐵塔嘅巴黎地標，欣賞藝術品又好，當巡個觀光景點又好，無論你嘅目的係乜都好，只要能夠放鬆心情，嘗試用自己嘅步伐去體會同感受羅浮宮裡裡外外嘅氣氛，我相信一定能夠搵到屬於自己嘅感動~


響廣場流連左半個鐘，係時候要離開.......


真係依依不捨.......

我地經由Passage Richelieu 離開.......

希望好快我地又會再嚟.......Revoir, Louvre!!


(...待續)