PIGGYBREAD: 2014年9月瑞士塵世美11日 - Pilatus 彼拉圖斯山 (下)

Day 2 (15 September 2014)
Luzern ~ Pilatus ~ Luzern

好輕鬆咁完成咗 Dragon Path 跟 Oberhaupt 健行，我地就返到去車站觀景台~

呢個時候個天開始多厚雲，藍天佔嘅比例少咗......

不過望過去個雲海仍然都好靚~

去完 toilet 就向 Hotel Pilatus-Kulm 方向起行~

好型嘅階梯~

Hotel Pilatus-Kulm 嘅露天餐廳，如果有時間響度嘆返杯咖啡就好啦.......

如果可以響度住一晚就更加正，d 房間望出去係無敵靚景.......

連烏鴉都響度欣賞風景呢~~

經過酒店後就開始向 Tomlishorn 步道進發~

呢個出口就係之前我地行 Dragon Path 響山嘅另一面經過見到嘅綠色線 Path I 健行隧道出口嘞~

由呢度去 Tomlishorn 要 50 分鐘.......開始計時，而家係 10:50，睇下我呢個軟腳怪要行幾耐先

開始一段係平路，行得好輕鬆~

沿途有好多植物介紹.......

不過而家已經過晒花季，只係偶然見到一兩棵花~

回頭影返酒店同車站先，天色尚算明朗，一陣間去完返來就唔同晒 lu~

由車站都有健行步道上落山，都真係見到有人行嫁!

好快行到去呢塊成日響旅遊書見到嘅巨石......

佢個造型都好特別......

遊人要響巨石下面穿過先可以繼續步道~

久不久亦要穿過小山洞~

一邊係山一邊係懸崖，步道亦唔算闊，不過沿路都有欄杆，一d 都唔驚險~

邊行邊欣賞美景

呢朵雲也實在飄得太有趣了吧.......

如果可以跳上去瞓響上面乜都唔做只係周圍飄你話幾好

瑞士真係一個健行國家，沿途不論大人小孩，甚至傷健人士都行得快過我

山下有羚羊啊!

行下行下，我地離開車站好遠啦~

山上嘅風景隨住雲嘅游移而變化.....

處處都係美景~

響 Pilatus 見到最美嘅一朵花

去到呢度望下錶發覺已經 11:20，已經行咗半個鐘!......行得咁輕鬆都要半粒鐘時間，不過我地邊逛邊停低影下相所以時間係耐咗 d~

要開始上石級啦......係咪即係開始要行傳說中好難行嘅尾段路呢?

又唔係噃，都係 d 平路啫........

而且景色仍然繼續優美~

如此美景當然要幫兩隻 bear bear 留返個倩影啦~~

跟住一段路仍然行得舒服........

但響呢個時候老爺望下張地圖，轉頭同我講叫我唔好開心得咁早，因為我地嘅目的地應該就係響前面呢座山嘅最高點.......

最高點個展望台隱約可見

......我當堂有 d 腳軟，忍唔住問老爺︰講真，你認為我真係有能力上到去??

條友回答︰上到嘅，落住狗屎嘅黑岳都上到，呢個 only piece of cake 啦.......之後再補多一句，而且上到上面望出去個 view 咁開揚咁正，無論如何死都要爬咗上去先死....

去年冒住大雨上黑岳係我呢一生中最可怕嘅行山經歷，既然佢用到咁絕嘅理由嚟激勵我，咁我唯有 shut up 繼續行啦

果然過咗無耐開始上斜坡.......

而且 d 碎石路開始難行.........

但山中景色仍然美麗.......不過下面 d 相大部份係老爺影嘅，由呢一刻開始我已經再無心去留意周圍嘅風景，因為真係行到好攰

山路愈來愈陡峭........

有幾辛苦? 睇下我個姿勢就知我行到幾乎想死

老爺就繼續攝獵周遭風景，話之我要生要死~

一見到木凳就即刻飛撲過去，簡直開心過中六合彩.....

小朋友都要坐下休息下啦，何況我係老婦!

不過真係好多烏鴉響身邊虎視眈眈

但望出去嘅風景實在太靚，真係好唔想起身離開囉.......

呢個當然係妄想，攤抖咗一陣又要繼續起行~

最後一段路真係超辛苦

，不斷爬呢 d 非常斜嘅山石路!!

而且係不斷走之字路，轉完一個彎又一個彎，好似唔會停咁，只係不斷咁爬行.......

老爺邊影相邊響前面不遠處等我.....

唉....仲要行幾耐先到呀??

走到呢度老爺響上段斜坡大叫我話快啦快啦，要我撐埋落去

最後呢一 part 我係掹住個欄杆一級一口氣咁攀爬上去......真係幾乎有種接近氣絕身亡嘅感覺

，後面有人想超越我，我死攬住條木都唔肯借位俾佢!!

YEAH~~幾經辛苦終於上到去呢個 2132公尺高嘅 Tomlishorn 峰頂啦

.........望下錶現在時間係接近十二點，我總共用咗 70 分鐘行到上嚟，都唔算好耐啫，比預期中快，又無 PK，好叻好厲害呀我

，哈哈~~

極目係 360 度無阻隔廣闊視野，超正呀!!

忽然發現能夠遠眺 Pilatus Kulm 同 Esel 呢~~

Esel 峰

展望台其實地方唔係好大，只有幾張木櫈，好多人坐響度 hea 住聊天......Of course la, 咁辛苦上到嚟當然唔會咁快就走啦!

快手快腳影晒 d 合照同造型照，只係一貶眼時間，雲層就愈聚愈多愈厚.......

好快 bear bear 後面背景全被雲霧掩沒

於是我地決定響度開餐填飽個肚，希望過一陣 d 雲可以散緊 d 啦.......

點知一攞袋面麵包出嚟 d 烏鴉即刻飛撲過來虎視眈眈......

好驚呀

，嚇到我唔敢食即刻收返埋袋包!

等咗一陣 d 雲霧無散去不特止，仲愈來愈多

呢邊好少少，較近嘅景都仲可以望得到.........

連琉森湖都望得見，已經算係不枉此行啦!!

呢座山好得意，唔知點解 d 雲霧硬係飄唔到過去另一邊，現場睇好過癮，一邊係白茫茫一片乜都睇唔見，另一邊就好清晰........我地睇咗好耐都係咁......

好神奇呀!! 好似仙境咁

響展望台消磨咗半個多小時，情況都無改變，似乎個天色只會愈來愈差，於是我地就離開啦~

落山當然輕鬆好多，同上次黑岳相比，今次唔趕時間，又無落大雨，可以自在地邊行邊影相~

回程又從反方向角度欣賞沿途景緻~

呢塊大石個形狀相當古怪~

周不時都會有厚厚嘅雲霧飄過

又去返呢個位，去程時由呢度我行咗差不多四十分鐘先上到去展望台，但回程行到返呢度只係用咗二十分鐘咋~

依然有遊人去緊 Tomlishorn，恐怕佢地上到去都無乜景可以清楚見到啦~

雖然密雲，但風景仍然秀麗，好慶幸我地有 plan 去，Tomlishorn 呢條步道真係好值得花時間花氣力走一趟

隱約見到火車軌啦.......終點在望，加快腳步~

原來 d 山洞構造好特別，去程無回頭所以未必留意到~

嘩! d 霧濃到完全見唔到火車站同 Hotel Pilatus-Kulm 囉!!

同今朝爭好遠! 好彩今朝早上山欣賞過清晰嘅 Pilatus，感恩呀!!

回程只係用咗半個鐘多小小時間........已經過咗中午一點多，係時候食 lunch 同休息下.......酒店露天餐廳當然係一個好選擇.......

BUT 我地呢個係窮遊團

，所以一早已經自備定午餐，就去車站展望層搵張枱野餐啦.......

呢餐基本上算係 free lunch，有今朝響酒店早餐時「外帶」嘅兩個麵包、兩個尋日響飛機上無食嘅麵包，以及尋晚食唔晒嘅三文治同青提.......呢個 lunch 好慳呀

，hehe~~

食食下 d 烏鴉又飛埋嚟......

好快速食完個午餐，休息完當然要去行埋最後一條健行步道，就係位於 Hotel Bellevue 後方嘅 Esel 峰啦.......雖然望上去似乎已被雲霧濃罩，但一場嚟到，仲有 dd 時間就行上去到此一遊啦~

當然又係要行石級.......

行到半路頂唔順要停低抖抖，趁機影下相先~

呢個角度好清楚睇到興建中嘅新纜車站~

好快又繼續上......今日行嘅梯級相等於我以往一年嘅次數

唔駛十分鐘就上到去展望台啦........呢個 Esel 峰高 2118 公尺，比 Tomlishorn 低小小，但一樣係 360 度全景~

呢個展望台算係三個山峰中最大一個~

如果好天，可以欣賞到伯恩高地群山嘅美麗風光........

今日咁多雲當然睇唔清，但都勉強可以望到琉森，算係咁啦~

至於 Pilatus 範圍嘅能見度亦唔算清.......

往 Oberhaupt 嘅步道還可以見到，觀景台已經睇唔清........

Hotel Pilatus-Kulm 後方嘅 Chriesiloch 以及更遠嘅 Tomlisorn 就被厚厚嘅雲層摭蓋 lu~

響 Esel 峰逗留咗一陣，望下錶差不多兩點，今日嘅行程好順利，時間都算掌握得幾好，原本因為擔心我嘅體力未必能夠應付咁多條健行路線，所以我地預 d 時間好鬆動，好在臨出發去瑞士前兩星期老爺晚晚迫我去跑步練氣，真係一分耕耘一分收穫，無 PK 不特止，仲比預定時間早完成一個多鐘，好叻呀

.......原本我地打算搭 15:45 班次離開 Pilatus，而家既然早咗咁當然想早 d 返琉森逛下，所以響 Esel 呢度影完相就快快離開，希望可以趕得切搭 14:20 嘅 Cogwheel Railway 啦~

Bye-bye 啦，Pilatus~~

沿上來嘅梯級走返落去~

五分鐘就返到去 Hotel Bellevue~

去到車站見仲有十多分鐘於是就快快去埋個 toilet 然後諗住快速逛埋個 souvenir shop.......

去完 toilet 出嚟見到已經好多人排緊隧入閘，咁唯有放棄唔 shopping 跟住排隧啦，去到閘口個工作人員問我地攞票，咁我地買咗來回票嘛咪俾張票佢睇囉，點知佢話除咗車票仲要睇預訂班次嘅票.....其實當時我地唔係好明佢講乜，搞咗一輪先知原來因為 cable car 停駛以至搭火車落山嘅遊客多咗好多，所以要事先攞 Time Ticket!.......Oh NO!! 點解今朝響山下車站 Ticket Counter 個工作人員無話俾人知嫁??

當然 14:20 呢班車已經 full 晒，而最可怕係之後幾班車亦都 full 埋，個 staff 話而家只可以俾 16:25 班次嘅後補位我地......16:25?!

嗰剎那簡直係暈咗響度!! 原本仲諗住早 d 離開可以早 d 返琉森，而家連遊湖船都趕唔切呀，因為最後一班船係 16:37! 今日響琉森嘅行程全部要泡湯!!

SHIT!! 原來有個 Notice 放咗響大堂，幾時放響度嫁?? 今朝到嘅時候都唔見!!

無計可施唯有響度 hea 住等，早知唔駛咁趕剛才響 Esel 峰 hea 耐 d 啦.......樂觀 d 諗反正我都未 shopping 就逛下 souvenir shop 囉.......不過實在太累於是搵個地方坐下先，橫掂大把時間，不過真係有 d 唔開心，明明今朝一早嚟到如果知道要咁安排就攞定 Time Ticket 先啦! 而家搭唔到遊湖船不特止，如果連 16:37 嘅候補位都等唔到都唔知要幾點先可以返到去琉森........