PIGGYBREAD: 2014年9月瑞士塵世美11日 - Pilatus 皮拉圖斯山 (上)

Day 2 (15 September 2014)
Luzern ~ Pilatus ~ Luzern

第二朝七點就去食早餐........

呢間酒店個 buffet breakfast 都幾多野食，除咗例有嘅 ham、bacon，甚至有煙三文魚，而腸仔仲要係兩種唔同款

食飽飽就出發去 Pilatus 皮拉圖斯山啦，由酒店行過去火車站好近......本來打算先去逛逛清晨嘅琉森湖影幾張相，但今朝實在太趕，仲要趕住去買車票，點知去到搵極都唔見 Ticket counter，原來響 basement~

今日我地唔用 Swiss Pass，所以要另外買張套票，包咗由琉森乘火車及船往返 Alpnachstad 以及 Cogwheel Railway 往返 Pilatus，持 Swiss Pass 有50% discount, 每位 CHF55.4~

我地搭 8:12 嘅 S5 去 Alpnachstad~

沿途可以見到琉森湖嘅美景......

好快 8:29 就到啦~

一落車已經見到登山車站........呢度設施都好集中，由月台通過地下隧道就到登山車站，遊船碼頭亦響附近不遠處，好方便~

鮮紅色嘅 Cogwheel Railway 登山齒軌火車好醒神呀!!

呢個火車站好洋式 (廢話

.....其實因為剛剛寫完兩篇日本遊記，一時醒唔起呢度係歐洲)

瑞士登山車站旁邊都有好大幅地圖顯示每個觀景台或車站當日有無運作，對於遊客來講真係好方便~

登 Pilatus Kulm 有兩種方法︰

第一種係好似我地咁，由琉森搭 SBB 或者遊湖船到 Alpnachstad 再轉乘全世界最大傾斜道嘅 Cogwheel Railway 上 Pilatus Kulm.....

第二種係由琉森搭 1號巴士去 Kriens，轉 gondola 去 Frakmuntegg，再轉乘 cable car 到 Pilatus Kulm~

最理想嘅遊玩方式當然係先搭遊湖船去 Alpnachstad 後轉 Cogwheel Railway 上 Pilatus，玩完後就搭兩程 cable 去 Kriens，然後搭巴士返琉森，呢個就係被稱為 Golden Round Trip......我地一開始就諗住採取呢條路線，除咗可以搭晒所有交通工具，仲可以響 Frakmuntegg 玩我非常之想玩全世界最長嘅 Toboggan! 不過好可惜，竟然我地去嗰段時間 Frakmuntegg 至 Pilatus Kulm 嘅 cable car 係 closed 咗因為要建造新嘅 cable，好失望囉

，不過都無辦法啦，所以我地終於只能夠用第一種方法，去程搭火車回程搭遊船.....不過其實我地都好驚險差 d 搭唔到遊船，如果連遊湖船都搭唔到真係要撞牆!!

車站地圖打咗黑色大交叉嘅地方就係 Frakmuntegg 至 Pilatus Kulm 一段 cable car 啦，要 2015年春天先重開~

下一班 Cogwheel Railway 開 8:50.......

仲有 d 時間就響附近影下相~

Pilatus 呢條登山鐵道係於 1889 年 6 月 4 日開通，已經超過 100 年!! 除咗悠久歷史，佢最大坡度為 48%，好斜呀!! 係全世界最陡峭嘅登山鐵路.......要爬行咁傾斜嘅山就需要呢 d 雙齒構造啦，想像一百多年前嘅瑞士人已經能夠做出如此設計，好勁呀!! 相反大家仲記唔記得一百年後嘅 6 月4 日中國人又忙住做緊乜野?!

最初諗住我地買咗套票唔駛再買 Cogwheel Railway ticket 所以好老定，忽然見到剛才由琉森搭火車過來時同我地同車嘅幾位台灣女仔手上面攞住 d 好精美嘅車票，又見到好多人響 tickets counter 排隊，靈機一動就走去問下，原來就算同 SBB 買咗套票都要響呢度換車票嫁! 好在發現得早，hehe~~

車票背面就係 Golden Round Trip 嘅路線圖~

差不多夠鐘就入閘啦~

呢班車好多人，大部份都係一個旅行團，我地雖然早入閘響入面排隊，但職員就俾班旅行團先上車，好過份! 個旅行團上晒之後只剩兩個位，個職員就叫我地上車.......

(每個車廂可以坐八個人，d 鬼佬個個都好大嚿，坐滿成個車廂好迫呀!

我地坐得好唔舒服，我個背囊條帶又俾個車門夾住，成程車要用膝頭托住個袋如果唔係個袋甩下甩下會整到對面座嘅人，所以唔係好方便轉身影相，後來發覺原來仲有另一班吉車載其他散客! 早知唔上呢班車啦，激死呀!!

)

車廂嘅設計係傾斜嫁，如果想坐車頭就要爬樓梯上到頂~

出發登山啦~~

雖然座位好迫，但好彩我地最後上車可以執到右邊靠窗位......向上爬行咗約一分鐘就見到個湖景，好靚呀!!

當時第一個感覺就係原來 d 人成日用湖光山色來形容瑞士真係一 d 都無錯呀!

因為個車廂設計係傾斜，人坐響入面係完全感受唔到座山係幾陡峭，不過唔緊要，只要望出外面睇下個山坡就知有幾斜啦!!......咦，竟然有人健行上山，厲害!!

咁樣行法幾時先行得到上山頂??

火車愈向上爬行視野就愈廣，忽然見到雲海呀!!

成個車廂 d 人都好興奮，個個都嘩嘩聲

可以見到雲海好開心呀，現場睇真係好靚呀

車行咗一陣就去到中途站 Amsigen......

因為係單一軌道，上下山嘅車就響呢度交會~

呢個角度望落去好斜呀!

趁停車影下條齒軌先~

齒輪火車除咗載人，仲係運送物資往山上嘅主要交通工具~

火車停咗大約五分鐘又繼續起行........有隻約瑟呀!! (飄零燕入面爺爺養嗰隻大狗就叫約瑟，所以成個瑞士 trip 我一見到呢種聖班納狗就叫佢做約瑟囉)

火車好努力緩緩向上爬行，加油啊~

坐響我地對面有個 baby，好 cute 呀，忍唔住要影佢，佢成日想睇出面個景，但一入山隆就好驚，即刻喊晒要人抱返去車廂中間，但一出山隆又要爬返過去窗邊，爬來爬去好搞笑~~

過咗中途站之後火車要爬行約十五分鐘先去到山頂.......

沿途美景處處

山上小木屋，絕對係飄零燕 feel 呀~~

就到啦!!

坐咗差不多半個鐘終於上到去 Pilatus Kulm 啦~

Ceiling 有隻好大會發光嘅噴火飛龍......至於呢條龍點解會成為呢座山嘅圖騰，當然有段古，傳說 1421年有一條龍飛過呢座山時唔小心撞暈咗一個農夫，當呢個農夫醒返時發現山上有 d 岩石沾咗飛龍嘅血，而呢 d 岩石後來被發現有治療嘅功效，就係咁樣呢條飛龍就成為呢座山嘅標誌......係咪? 我都話啦，古今中外，到處都有太多呢 d 奇奇怪怪嘅古老傳說~

至於 Pilatus 呢座山名稱嘅由來，傳說當年下令釘死耶穌嘅羅馬總督 Pontius Pilatus，唔知係咪做得壞事多，條友死咗之後，佢嘅鬼魂響四處飄盪咗好耐都搵唔到落腳處，最後終於飄到嚟呢座山，之後只要有人想攀登上山就會刮起狂風暴雨，一直到16世紀琉森政府仍然下令唔準人民上山以免會打擾呢個幽靈而令暴風雨出現喎，而呢座山亦因為呢個 Pilatus 而命名......傳說聽過就算，而家呢座名山每日吸引大量遊客到訪，熱鬧到不得了，恐怕嗰隻鬼魂都匿埋唔敢出嚟獻世~~

剛巧見到有直昇機上來~

先響車站大堂巡個圈，呢度有小食店、souvenir shop 同 toilet~

之後就上觀景層......

剛才飛來嘅直昇機飛走啦~

觀景台可以飽覽附近一帶山峰美景........

今朝嘅天色好 good 呀，藍天白雲，令人心境開朗......遠遠仲可以眺望連綿嘅雪山，快 d 望多兩眼，晏 d 無嫁啦!

世界最長嘅 Toboggan!! 好想好想玩呀!!

真係好失望今個 trip 玩唔到，最初諗住呢度無得玩，咁去 Grindelwald 時附近嘅 Pfingstegg 都有得玩可以補返數啦，點知嗰日因為響少女峰玩得太耐返到去 Grindelwald 又落雨，最後都無玩到，好遺憾呀!!......單係望官方介紹嘅呢張相就已經令我羨慕到不得了

(From Official Web Site)

連綿嘅雪山，令我忽然懷念起今年五月先去過嘅日本立山......今年咩事呢，竟然一年之內兩個 trips 都係上高山

....不過上山要趁早，遲多幾年變阿婆唔行得走得想上都有心無力

美麗嘅雲海

相片中嘅 building 就係 Hotel Pilatus-Kulm，本來想 book 住一晚諗住第二朝可以睇日出，不過四個月前都已經 fully booked，真誇張!

Hotel Pilatus-Kulm 後面嘅步道就係通去 Tomlishorn，等一陣我地就會去啦~~

Oberhaupt，如果由山腳行上去只需大約十分鐘嘅時間，非常容易嘅一條健行路線~

不過我地打算先去行 Dragon Path 龍道.........

所謂龍道，即係岩洞隧道，係響 Oberhaupt 岩壁中鑿出嘅一條步道，由洞眼中望出去可以欣賞 Pilatus 另一種景色~

響 Pilatus Kulm 一共有五條健行路線，最容易簡單嘅係綠色線 Path I，只行 Dragon Path.......最難行亦最花時間嘅係橙色線 Path V，由 Hotel Pilatu-Kulm 開始起行去到 Tomlishorn，官方網頁 suggest 單程嘅時間係 35 分鐘

.......35 分鐘! 有乜可能?? 或者瑞士 d 人行慣山啦，試諗下佢地手長腳長，行一步等於我行三步，我仲要一年先行嗰兩、三次山，而且據講呢條山路去到最尾嗰段係極度辛苦，想要挑戰呢條步道一定得要預算多 d 時間.......為咗唔好一開始就打殘自己嘅士氣，所以我地先行簡易嘅藍色線 Path II，由 Dragon Path 經 Chriesiloch 折返再直接行紅色線 Path III 上 Oberhaupt 山頂.......至於桃紅色線 Path IV 就要睇下去完 Tomlishorn 仲有無時間先決定行唔行啦~~

OK，出發前先返大堂去個 toilet 先~

有人準備玩降落傘呀!

架直昇機又返來啦.......

睇嚟佢好似係不斷運送物資俾正在興建緊嘅新纜車站~

進入龍道啦~~

岩壁上有好多跟龍有關嘅圖畫及傳說故事~

由龍眼望出去嘅風光會唔會詭異 d 呢

圓桶形嗰座就係另一間酒店 Bellevue，後面就係 Esel~

乜都無嘅山上竟然有間教堂........

山頂仲要豎立咗個十字架......

響咁高嘅地方建造教堂，係咪會更接近上帝多一點呢?

邊行邊欣賞美麗嘅風景真係一件賞心樂事~

無論任何國家任何地方，只要係旅遊景點，總會有人放同心鎖~

呢條步道非常易行，大部份時間都係穿梭於山洞中嘅平路~

當然亦偶有石級......不過其實呢 d 梯級相比一陣間嘅 Tomlishorn 步道已經係小兒科

石級前左手邊有條隧道係通去 Hotel Pilatus-Kulm，如果唔去 Chriesiloch 只係行綠色線 Path I 就可以通過呢條隧道返過去酒店嗰邊.......呢個時候忽然電話 whatsapp 同 email 不斷咁發出通知聲，原來響呢度一帶範圍都接收到酒店釋放嘅 wifi 嫁!! 唔好嘥即刻 whatsapp 幾張相俾人先，hehe~