2014年4月日本中部立山8日 - 桜野公園

Day 3 (下呂溫泉 > 桜野公園)

第三日啦......六點鐘起身，望出窗外陰陰天，唉~

晨咁早起身當然要浸下個私人風呂先......

不過要放咗 d 凍水再開過新水，咁樣都要等十幾分鐘~

浸完未夠七點，嬸嬸已經打電話來提醒早餐時間，之後好快就過來 set table~

嬸嬸話呢個豆腐當滾起時要用 spoon 將佢搞足四次先食得，好搞笑~

朝食都有朴葉味噌，正呀

仲有「龍之瞳」靚靚米飯~~

睇落唔係好多野咁，但食落就好飽!

食完攤抖一陣，然後就執野準備離開~

臨走前當然又再浸多次，唔好蝕嘛

剛剛好個風呂對正個 TV，一邊浸一邊睇，巧爽呀~~

最後一浸

搞到八點半終於要走啦......望出去個停車場 d 車已經走得七七八八~

搞掂 check out，九點前離開下呂溫泉.......天公不作美，開始落雨

仲要愈落愈大

今日要離開岐阜縣向富山縣進發，目的地係魚津市~

行咗約半個鐘搵個地方放放水先......

原來而家只得 12 度，再加上春雨綿綿，好寒呀~~~

由下呂去魚津途中會經過高山，2010年嗰次中部之旅我地已經去過高山，所以今次唔打算去，不過響做 planning 時見高山附近有個桜野公園，雖然已經近四月尾，但我地見尋日響下呂都仲有小小櫻花，於是就 set 個 GPS 諗住順道過去望望睇下會唔會有意外驚喜~

未去到公園，高山一帶沿國道41 已經見到好多櫻花啦!

實在忍唔住，見暫時停咗雨，於是途中求其搵咗個地方泊低架車一於去影返幾張相先~~

出發前 check 網上關於中部一帶櫻花狀況發覺基本上已經開完，所以其實都預咗見唔到，而家忽然見路邊開得咁燦爛，好開心呀!!

影夠諗住上返車，忽然發現附近有個市場，當然要走入去留低 d 腳毛......自駕遊嘅優勢就係呢樣自由度嘛，梗係要好好利用

巡個圈買咗小小生果就離開啦~

好快就去到桜野公園.......

呢個公園就響宮川旁邊，沿岸都種滿櫻花樹，雖然已經過咗滿開階段，再加上陰天影相顏色唔靚，但一向與花花無乜緣份嘅我地都已經好雀躍

好鍾意呢張，紫 bear 個 look 真係好鬼寸

公園入面嘅櫻花亦只係開剩好少，不過對於無期待嘅我地嚟講，都已經足夠我地發癲

花瓣碎落一地，好淒美嘅感覺!!

影呀影，兩個傻仔不斷係咁影

響呢度 hea 咗半個鐘，不經不覺已經十一點，往魚津嘅路途遙遠，只好依依不捨地離開~~

呢篇好簡單，三幾隻字就搞掂

(....待續)