2015年1月東京草津5日 - 獨自去偷歡

已經有另一半嘅你，曾經有過跟我一樣想法嗎? 就係試過幻想撇開身邊嗰一位，獨自一人去浪跡天涯?.....對於一人旅，我其實都唔係未試過，當年畢業後我都有過揹大背囊去歐洲闖盪嘅經驗，但已經係 N 年前嘅事，嗰時年青力壯天不怕地不怕，自從同老爺一齊，基本上大多數外遊佢都會響我身邊.....當然，有人結伴同行係一件好幸福嘅事，但有時見其他 blog 友自己一個人自由自在去日本，心裡面少不免會有一絲嚮往，好想試一次自己去日本逛逛，挑戰一下自己嘅能力，而呢個心願終於響 2015年起始完成咗啦~~

N 年無試過自己一個人外遊，最初真係有 d 戰戰兢兢，尤其我一向倚賴慣老爺，一陣怕迷路，一陣又驚沿途無人陪會寂寞，總之就各方面擔心......然而一眨眼五日嘅行程好快就過咗去，平安無事返來之餘，結論係，一個人去旅行，實在係.....
太。爽。太。FREE。啦))))))))



對於我呢個 low b，一人旅有兩件事係最煩惱，第一就係我基本上係一個毫無方向感嘅路痴，要解決呢個難題，首先住宿酒店同 shopping location 儘量揀選以前去過較熟悉嘅地方，至於未去過嘅地方，出發前就先上網 google map 一下景點位置，睇埋街景服務等有個大約概念~

另一個難題就係雞手鴨腳行平路都會 PK 嘅我係拎唔到重野，BUT 矛盾嘅我係一個超級購物狂，身邊各方親友已經警告一個人去東京一定會失控.......要解決呢個問題，首先我揀咗新宿嘅 Sunroute Plaza 作住宿，因為好近車站，之前又住過兩次我比較熟路，而且佢有機場巴士直達，即使我真係 shop 到癲咗，只要我想辦法將 d 行李拉落去大堂就可以.....至於要解決失控呢個基本問題，就咁，因為農曆年我地又會出動，而且因為搭 ANA，每人有兩件各 23 kg free 行李，我地四個人去總共有 184 kg! 而團員中只有我同細妹係亂買野，咁即係我同細妹基本上每人將會有 90 kg.....90 kg!! 唔係講笑，我地已經打算米啦、煲啦，乜鬼狗屎垃圾都托晒返來......基於此有 d 咩重磅野就留返二月先買囉，今次就點都要同自己講要忍一忍手啦

對於一個可以 shopping shop 到試過行李超重要罰四萬幾円嘅癲人嚟講，要忍手真係好考意志力嘅一件事，心癮難忍，咁就唯有響外在條件上約束自己，由於今次係搭廉航，之前聽過下話廉航 d 寄艙行李好易損壞，於是今次我就索性唔帶心愛嘅 Rimowa，改帶好多年無出動因為個轆已經 short short 地但一直唔捨得丟棄嘅 Samonite，hehe，只有25".....咁小容量，老實講真係想死，不過亦都令我無時無刻地警醒自己唔好敗咁多啦~~

今次搭 HK Express，之前成日見 blog 友以好平嘅價錢買到日本機票，所以一直都心郁郁想試下搭，當然 $5 我就無本事搶得到，但千多蚊包晒稅同行李費，我都覺得好 OK 啦.....一直無點搭過廉航，只係早兩年搭過一次酷航去新加坡，除咗係覺得座位窄 d，其他一切都 OK，但 HK Express 坊間一向 d comment 都係麻麻，傳說班次經常性 delay、甚至 cancel......不過去完返來我就覺得幾滿意，來回兩程機都算準時，回程甚至早咗半個鐘，當然登機閘口就比較遙遠，去程坐嗰程接駁巴士都頗長時間，去到東京落咗機要走好遠一段路先到 immigration，回程亦一樣，所以如果同老人家去就唔係咁適合，但我而家仲行得走得，所以問題唔大，係要預鬆d 時間唔可以響機場 shop 得太耐囉~

前言講到呢度，係時候要入正題......自己一個人孤身上路，儘量唔帶咁多隨身物品，今次只帶紫 bear，mini F bear 就留返香港陪老爺囉......嘻嘻，真正嘅拋夫棄一隻 bear 獨自去偷歡呀!!

一人一喼一熊出發啦))))......好緊張呀

之前已經聽人講 HK Express 個登機口好遠，所以要預早 d 去 check in，我地三個鐘頭前去到 Terminal 2，已經好多人排緊隊，我地大約都排咗半粒鐘......今次買咗回程 25 kg.....我本來都想買 30 kg，加 5 kg 只需 $50 真係好抵，不過響屋企試咗自己拎 20 kg 都好辛苦，所以都係唔好太過貪......去程 10.3 kg，都仲有 13 kg 俾我敗

之後就行返過去 Terminal 1，都無點逛就同老爺拜拜啦，嗰一剎那真係有 d 唔捨得添......我真係好白痴，入到去過完 X ray 竟然睇唔見條 E 通道，走來走去搵咗一陣先見到 (滴汗 ing).......一路響區外睇住我嘅老爺一等我過完關就即刻來電笑住鬧，一年都出國兩三次啦，咁都發雞盲，真係瘀爆~~

正式開始一人旅，首先當然係去 Plaza Premium Lounge 食 lunch，要食飽 d 呀，因為廉航無野食嫁......第一次自己響機場 lounge 食野，一邊食一邊同各方好友 whatsapp 話別，暫時都 OK 唔覺悶~

食完就行去 Gate 15 Replay 攞 free evian 礦泉水，之後又行返去 Duty Free Shop 買最 like 嘅 Godiva，走來走去都無點真正逛過就差不多夠鐘登機......登機口響 524，因為要落一層最初以為要搭無人列車，原來唔係，Gate 521 ~ 524 響另一邊平時無事無幹係唔會逛到嘅位置.....

等咗一陣就入閘啦，之後要搭一段頗長程嘅巴士，去到仲要係行樓梯上機嫁......班機都幾 full，但都只係比原定時間遲咗約 10分鐘起飛，OK 喎......機內無 TV 無野食又無人傾計，無咩好做睇咗陣自己 download 定嘅 Running Man，又瞓咗陣就差不多到成田啦~

今個 trip 只有紫 bear......有 d lonely 添

航機比原定時間早咗 10分鐘到達，不過要行好長好長嘅路先去到 Immigration，我坐前排好快落機，去到關口唔駛點排就搞掂，之後去埋 toilet 出嚟已經見到件行李，即刻攞埋離開，之前又係聽人講話單身女仔入境要打開晒行李反轉晒 check，但我又無喎......出到去即刻走去買 N'EX 車票.......由落機到買完車票我只係用咗約 15分鐘就搞掂晒，自己都好滿意呀

而家無咗 N'EX + Suica 套票，只係有由成田往市區單程優惠，1500円~

19:49 嘅車，仲有成半個多鐘頭，附近只得兩間便利店，逛咗陣無咩好做就入閘早 d 去候車室坐下啦~

我坐三號車廂，旁邊就係候車室，正~

由成田去新宿要大約 90分鐘，臨行前老爺買定咗 d 小食俾我，食完諗住繼續睇 RM，呢個時候先發現唔知幾時跌咗個 LG ear phone，激死呀.....果然老爺一唔響身邊就論論盡盡

21:16 去到新宿，響南口一出行一陣轉個彎就見到 Sunroute Plaza，好方便呀~

呢間酒店之前住過兩次，所以房間間隔都好熟悉，想唔到 single room 都算闊落喎，係個衣櫃好窄好Q，只夠放件羽絨同多件衫~

一個人來講張床都好闊啦~

響房放低 d 野就拿拿林出去啦，因為想趁電器店舖十點未關門前衝去買個 earphone 先呀......大家唔好用正常人嘅角度去諗，以一個路痴來講，響毫無心理準備之下要夜媽媽響新宿逛，對我嚟講都算係一個挑戰......印象中近西口 Agnes B 附近好似有間幾層高嘅電器舖，於是就直衝過去，去到發覺原來已經搬咗去對面街小田急百貨上面，而原有位置而家就變咗 Uniqlo，但見都就快十點仍然人頭湧湧好熱鬧，雖然我都好鍾意逛日本嘅 Uniqlo，但係要忍忍忍，做咗 d 重要野先.....

走過對面點解 d 入口同 window shop 全部 closed 晒嘅? 搵咗一陣先發覺呢間野係 close 九點.....頂! 乜收咁早嫁?! 出師不利嗰剎那有 d 沮喪，但我死唔忿氣，忽然又記起以前住京王嗰邊每晚返酒店前老爺都要走去附近嘅電器店逛下，但正確位置當然唔敢肯定......(大家唔好笑，你地心入面梗係諗有無搞錯，一整個新宿駅周邊都佈滿電器店啦，但要記住我係阿毛又盲又矇，既係路痴又兼老人痴呆嘛).....當時諗反正我都要行返過去南口啦，於是就決定邊行邊周圍搵下，就算搵唔到至多去便利店求其買個 cheap cheap 都用住先啦.....果然行咗一陣去到京王百貨，見對面馬路就有一間啦，頭先去時一心衝去小田急所以都無留意，真係死蠢，嘥晒 d 時間

走到去已經九點五十五分，入去搵咗一陣都唔見有，即刻截住個職員問，原來 earphone 響隔離嗰間先有，佢好好人帶我行過去仲話埋俾我知響四樓.......上到去見到好多唔同款式嘅 earphone 呀，不過呢個時候開始廣播話店鋪要 close啦，想慢慢揀個合心意都唔得，於是就求其揀咗個平平地算啦......(其實都要成一舊水，但就乜 function 都無囉)

買完野個人都開心 d，於是就去搵食啦，逛下逛下就走到去東南口，見到呢間「光麵」旅遊書有介紹過，一於入去食返個沾麵先~

我當然要呢個超豪華嘅熟成光麵「全部盛上」啦

今個一人旅嘅第一個 dinner 呀! 自己一個人食係有 d 悶囉，平時出外旅遊每次食野除咗影一大輪相，老爺仲要同我影 video 記錄低食 d 咩同 'up' 一大堆無謂野，而家自己一個人就無呢枝歌仔唱 lu.....講返個麵，豬骨湯底好香濃，麵條都幾彈牙，ok 啦，不過個人就覺得又未至於係超好食嗰種囉~

食飽飽就慢慢行返去酒店......平時夜晚嘅新宿都好熱鬧，何況今日係星期六，將近十一點，車站一帶仍然燈火璀璨好多人呀!

雖然已經過晒 X'mas，但仲有好多燈色好靚喔~~

行行下見到酒店附近平時去開嗰間藥房仲未 close，當然走入去巡返個圈格下價錢先，逛到十一點鬆 d 又聽到廣播話要關門，勁多香港人響免稅嗰條 line 排隊......話時話香港人講野真係好大聲，兼且個個都好似地膽咁大大聲教同行 d 人乜野最抵買，仲要個個著得好鬼潮......我地近年去日本都係去鄉郊地方多，真係大鄉里出城，原來而家香港人外遊個個都好型男型女，男嘅帶閃鑽耳環，女嘅響幾度下好似日本妹妹著住短裙仔，差 d 以為自己去咗 MK.....我望下自己包到成隻糉咁仲要唔知行情響度格價真係好失禮，只好拿拿聲即閃.......差不多返到酒店當然又要走去對面嗰間 Family Mart 入返 d 夜宵同掃個圈先啦，不過因為怕老爺等我消息所以都唔敢行得耐買完雪糕就返酒店啦~~

一返到酒店房即刻第一時間 whatsapp 老爺，少不免要讚下自己無迷路仲成功買咗個 earphone 呀 (好低能，hee)......報告完畢，沖完涼自然係宵夜時間，深夜一個人食晒兩杯甜品，肥死，不過外遊唔好諗埋 d 衰野.......

呢個咖啡味布甸係深夜 on sale，響便行店都執到平野真係開心.....真係食得津津有味呀

當然唔少得我至愛嘅雪糕，去日本當然揀期間限定，今晚係 vanilla cookies raspberry......

Yummy yummy

食完又同細妹 chat 到點幾兩點，之後就好滿足去教豬啦

第一日行程順利完成，第二日要去期待已久嘅草津溫泉，好緊張呀!!

(...待續)