2015年1月東京草津5日 - 草津溫泉 (上)

第二朝七點半去食早餐......最初訂酒店時曾經考慮要唔要 book 埋酒店早餐嘅 package，諗住自己一個人朝早求其出去食 d 野就算，後來經同事提點，出去食個拉麵都成千円啦，又唔係真係咁拮据，做乜要咁委屈自己，我要記住而家係去 relax，一朝早舒舒服服響酒店食個豐富早餐然後先夠精力出去血拼.....Wow，真係至理名言呀!!.....係喎，不經不覺原來我而家已經到咗要享受人生嘅階段啦!! 真係想唔認老都唔得

Sunroute 嘅早餐都幾豐富嫁.....自己一個人一邊食一邊同老爺 whatsapp，好寫意之餘，亦覺得自己一個人響酒店食早餐好有型咁呀

食完仲可以外帶咖啡，good ar~

Hea 到九點就 check out 出發啦......好緊張呀，我要自己一個人去草津溫泉呀~~

今日天氣好好，藍藍嘅天一片雲都無，心情都開朗 d 呀~~

我最鍾意逛嘅高島屋同 Tokyu Hands，不過要等過兩日由草津返來先可以投入佢地嘅懷抱~

由新宿去草津溫泉有兩種途徑，一種係搭新幹線去輕井沢再轉巴士，另一種係一程高速巴士直達.......本來以我咁鍾意 shopping 嘅人當然會揀第一種乘機去輕井沢個 outlet 血拼一下，但我今次係一人旅唔可以發癲買太多野，而且一程巴士夠簡單最啱我呢 d 路痴，所以最後我係揀咗搭高速巴士......上車地點就響代代木站，如果由新宿搭 JR 只需要一個站，不過老爺幫我睇咗地圖，由酒店附近新南口行過去其實好近，方便過行去車站又要上上落落......

沿鐵路一條直路行，一d 都唔難搵~

唔駛十分鐘就行到去，之前仲驚我咁白痂會行錯路所以預鬆咗好多時間......

好在附近有間 71 又可以去逛逛~ 

逛到咁上下就行返去車站.......可以即場響呢度買車票，不過之前我已經先響網上做咗 reservation，出發前一個月就可以去高速バスネット book，有 early bird ticket，便宜少少 (來回兩程車都減咗成千五円嫁!)，當然要先碌卡過數，搞掂直接 print 張 ticket 就可以上車~

響候車室等咗一陣就夠鐘上車~

由新宿去草津溫泉需時三個半鐘，途中會去到一個 SA，巴士會停留約十五分鐘俾大家落車放放水舒展一下~

呢個上里 SA 好大......感覺好似平時同老爺自駕遊咁，每經過一 d 大嘅 SA 我地都要停低逛逛買杯野飲......

所以我都買咗條腸食下

瞓下醒下，中午一點半就去到啦......時為一月中，位處群馬縣嘅草津溫泉都披滿層層嘅積雪~

果然係溫泉勝地，一出巴士站外面就有個足湯~

下面呢座就係草津溫泉巴士總站，都幾有規模嫁......影咗一陣相忽然發覺唔知自己身處方向，好在站旁邊都有指示往湯畑嘅方向......

由巴士站行去湯畑大約七、八分鐘，好近~

沿路幾時鍾意就停低影下相，好 free 呀!!

溫泉街自然有好多溫泉饅頭賣，望落去熱辣辣好似好吸引，不過已經接近兩點應該去搵地方食飯所以忍口無幫襯~

好快行到去中心位置，終於見到期待以久嘅湯畑啦，嘩! 好壯觀呀.......不過而家唔去逛住先，肚打鼓要先去醫肚~~

一個人在途上尤其是我咁騰雞所以出發前都儘量搵定睇下有 d 咩心水食店，之前睇旅遊書已經鎖定咗響呢間したつづみ食 lunch，不過去到竟然唔俾入......有無搞錯，明明網頁話營業時間係 11:00~15:00，而家都未夠兩點.......

嗰一剎那有 d 徬徨，第一次自己個人遊就俾打擊我.....哼!!.....唔緊要我仲有第二間心水食店燒肉吾妻，但去到超多人排緊隊，而且係食炭燒牛，因為諗住今晚溫泉旅館包嗰餐應該幾豐富，所以 lunch 就唔想食得太 heavy......OK，咁大個旅遊區無理由搵唔到一間合心水嘅，於是就周圍逛睇下有邊間啱食.......

響西之河源通行咗一陣見到呢間係食烏冬，又唔駛等，一於就呢間啦~

Menu 無圖片，唔知 order 咩好，見到枱面有呢個人氣 no. 1，咁就叫呢個啦~

報紙有介紹噃，應該唔會差得去邊啩

我又一個人開餐啦!!

食飽飽未夠鐘 check in 就去返湯畑逛下.......

日本三大名泉有馬、下呂以及草津，之前已經去過前兩個，今次終於去埋最後一個......草津溫泉最具特色嘅地方相信應該係呢個規模咁大嘅湯畑，現場睇真係好壯觀!

呢個湯滝成個瀑布咁好勁呀~~

所謂湯畑即係熱水田，係草津溫泉水嘅主要源頭，據講每分鐘會湧出4000公升嘅溫泉水，豐富嘅湯量令到呢度嘅旅館都標榜百分百使用不經循環利用、不加水稀釋嘅源泉~

呢 d 一格格嘅箱係用嚟收集溫泉水同空氣接觸後因溫差所產生嘅沉澱物，然後製成入浴劑，亦即係湯之花囉~

真係好似一塊塊田咁呀~

又有個足湯，不過好多人

整個湯畑嘅面積都幾大，現場睇真係好壯觀，泉水嘅熱氣令到成個地方煙霧迷漫，再加上濃濃嘅硫磺味，真係好有溫泉味道嘅溫泉鄉呀!!

草津溫泉有一個好有特色嘅傳統表演「湯もみと踊り」，不過好可惜我去呢一個時間個表演場地熱乃湯維修緊所以個 show 係休演......

激死呀，不過無計啦，唯有寄望下一次同老爺一齊再嚟過啦~

個公仔好 cute 呀!!

草津溫泉貴為日本三大名泉之一，泡湯先係重點所在，呢度有幾個出名嘅日歸湯，好似白旗之湯、千代之湯，都係免費嘅大眾浴場，不過我雖然愛貪小便宜，但既然係唔駛錢，我實在有 d 怕佢嘅衛生狀況，所以都係搵 d 收費穩陣 d~

呢個御座之湯個外型好靚，我打算聽朝會去日歸~

好可愛嘅渠蓋~~

據旅遊書講呢個光泉寺係日本三大溫泉藥師堂之一，未夠鐘 check in，趁仲有小小時間就上去逛下.......

爬完長樓梯上到去頂望返落山下可以見到成個湯畑~

估計應該係手湯，已經結晒冰~

逛到三點鐘就去酒店 check in.......之前揀今晚嘅住宿其實都考慮咗好耐，往常我同老爺揀溫泉旅館大部份都會搵 Jalan 排名前幾位嗰 d，諗住口啤好 d，但今次個人遊就打破先例，首先原來好多溫泉旅館係唔接受一個人嘅訂房，尤其係附私人風呂房，真係想住豪 d 都唔得囉......再加上我想住響湯畑旁邊，可以選擇嘅旅館真係唔多，心目中最想住奈良屋，但好貴實在唔捨得，而且佢 d 一人 plan 又無我想食嘅上州和牛，最後都無得點揀終止就揀咗呢間響 Jalan 排名都頗後嘅大東館........

去到門口靜蠅蠅，唔同一般溫泉旅館無服務員出嚟迎送，大門口一邊門維修又封晒紙好似做緊裝修咁，總之感覺就好舊好冷清........

去到前枱做完 check in，職員簡單講解咗酒店設施，之後就交條鎖匙俾我.......嗰一剎那有 d 錯愕，住過咁多次溫泉旅館都未試過無職員帶上房，就算上次魚津嗰間金太郎個接待係零 presentation 都叫做有個女仔 lead 我地.......

自己去搵房，仲要老爺唔響身邊，個感覺真係好孤令令呀!

房間都幾大，除咗和室10畳，近窗仲有個偏廳......

望出去係湯畑 view~

房有浴室同 shower~

有兩個按摩器可以玩~

仲有加濕器~

當時好似係發生宏樂園火災無耐，自己一個人都係睇定個走火通路先

響房放低行李，就出去外面逛逛......臨出去前問櫃台酒店係咪有 free wifi，原來只係響近門口嘅休憩間先有，不過我連接咗好耐都唔得，把鬼!!

離開酒店就出發去逛西之河原通，入口有間 71，同一般 71 唔同，呢間個顏色好似係襯返草津溫泉個環境咁~

呢間就係我原本想入住嘅奈良屋，響 Jalan 同樂天都係排名前幾位，果然個門面都真係優雅好多呀!

雖然係星期日但唔係旺季條溫泉街都唔係好多遊人~

好可愛嘅石像~

呢間 Cotton Bear 好多 bear bear 賣嫁，真係想每一隻都拎走呀!!

Shopping 完買個燒餅食下先~

條溫泉街其實唔算長，不過行下停下 shop 下都行咗大半個鐘~

響呢度個店主好熱情係咁叫我試食山菜漬物，食完我又買返 d 俾媽咪做手信......我真係一個好盡責嘅旅遊消費者

行到呢度再入就係西之河原公園，不過而家已經四點幾，所以打算第二朝先去~

之後就行返去湯畑......

又再影下相~

呢座 building 好可愛，好似德國小鎮 d 屋仔.......其實係賣紀念品同土產，我喺入面都消磨咗唔少時間

Shopping 完經過呢間温泉まんじゅう山びこ，見有個女人響門口炸溫泉饅頭，好似好吸引，見只係 100円一個於是就整個試下......

同一般食開嘅溫泉饅頭唔同，呢個好似天婦羅咁炸過嘅芝麻饅頭好好食呀~

逛完街返去酒店，當然去浸下溫泉先........

響衣櫥入面放咗好多種 size 嘅浴衣，good ar，好多時 d 溫泉旅館只係提供 M & L size，對於我地呢 d 嬌小人士來講真係好唔方便~

大浴場就響地下......

有內湯同一個唔算露天嘅露天風呂

(Photos extracted from Hotel web site)

浸完浴就周圍逛下~

之後就返上房攤抖下食下旅館送嘅 welcome snack.....

老爺不在，要自己泡茶

休息一陣差不多六點就去食 dinner.......

第一次一個人響溫泉旅館食料理呀!!

自己一個人獨佔一間部屋，感覺好特別

習慣 order 枝梅酒.....老爺不在，唯有同紫 bear 對飲，cheers!!

開餐啦~~

呢個就係群馬縣十分出名嘅上州和牛......

雖然無松阪、神戶牛咁滑嫩，但都幾 juicy (而家一講 juicy 就諗起導火新聞線嘅梁小冰)

呢餐真係食得好飽好飽，飽到個胃頂住有 d 唔舒服.......自己一個人食講真係有 d 悶，平時同老爺兩個人食總係我響度發蹹風，今次自己一個人把口無乜好做只可以不斷用嚟食野，唔怪得食得咁鬼飽......經過今次一人旅我發覺自己最掛住老爺嘅時份就係用餐嘅時候 (Well, 其實當然唔止，仲有一個人拖行李、搵路、埋單找數.....etc 嘅時候)

返到房職員已經鋪好床......只係得一張日式床，未試過個感覺好得意呀

夜晚嘅湯畑仍然燈火通明......

食到飽一飽，於是決定換返衫落去逛逛睇下個夜景~

夜晚 d 煙霧仲勁呀!!

夜晚燈色下嘅雪景都幾靚~

行到去呢個位身邊嘅電話傳出 email 同 whatsapp 通知聲，原來呢度可以接收到附近唔知係酒店定邊度嘅 wifi......於是我就頂住冰冷嘅天氣坐響度同老爺、細妹 whatsapp 咗半粒鐘，凍到我幾乎變咗條雪絛

實在太凍，本來想去浸浸個足湯，但真係頂唔順都係返去酒店~

酒店二樓有個「緣日村」，自己一個人反正無咩做於是就走去睇下係乜東東.......

原來係一 d 遊樂設施......

不過一個人都無......咁大地方，我覺得有 d 嘥料囉~

返上房換返浴衣，再去泡多次湯，夜晚男女湯互換，不過其實分別不大~

浸完浴當然又係我嘅放肆時間......試下梅味薯條同 71 微糖咖啡.......

唔少得我嘅摯愛雪糕......

Yummy yummy

食飽飽又去教豬囉

第二日個人遊又順利結束!!

(...待續)