2015年1月東京草津5日 - 草津溫泉(下)

第三日啦，一早起身望下清晨下嘅湯畑先........

O-ha-yo!!

七點半去食早餐.......

Buffet 食物種類一般.......食食下忽然發現成間酒店原來只有餐廳呢度可以接收 wifi，即刻同老爺傾返夠本

呢個叫高原野菜豚肉，唔知係咪特產，不過 d 肉都幾肥

食完上房 hea 多一陣......

可以望見我之前想訂嘅奈良屋.......

同櫻井旅館~

朝早嘅湯畑無乜遊人

雖然係一個人，但唔知搞乜 "me me more more" 都響房 hea 咗好耐，差不多九點先去 check out......放低件行李響酒店就出去湯畑逛下.......

咁早已經有人響度足浴~

一朝早 d 強國人仲未殺到，整個湯畑好清靜好舒服.......

可以同紫 bear 盡情咁影好多造型照呀~~

終於見到個足湯係無人，不過我無帶毛巾，所以終於都無去浸~

呢間草庵其實係旅館，睇佢網頁介紹都唔錯，比較新式，都曾經有考慮過入住，不過佢無一泊二食，所以最後都無揀~

好鍾意呢個草津女孩，好可愛

今次無緣，希望將來有機會再來可以欣賞熱湯表演啦~

響湯畑逛夠後，就出發去西之河原公園啦~

好懷舊嘅公仔，好得意呀~~

西之河原通近盡頭有兩三間溫泉饅頭店，其中一間叫元祖溫泉饅頭專門店長壽店，d 店員晨咁早已經企晒響門口，一見有遊人行過就請人試食饅頭，佢地好堅持嫁，就算你搖晒手佢地都一定要你攞一個，而且好大方，係一整個饅頭，唔係一小塊呢......唔止試食，仲請人入內坐低飲杯熱綠茶，冷天整個熱辣辣嘅包同茶落肚又真係幾正囉......

店內好懷舊氣氛~

飲完茶食完個包，我都打算買返盒饅頭做手信，不過諗住去完西之河原公園出返嚟先買.....d 店員好 nice，即使試食完唔幫襯都唔會黑面，仲同你講 bye bye~

西之河原公園入口就響西之河原通盡頭......

今次到訪草津有兩大憾事，除咗睇唔到熱之湯表演，西之河原露天風呂亦都係休業，據講呢個超大嘅野外風呂可以容納100人，今趟浸唔到好可惜呢.....不過無計，唯有又寄望下一次可以同老爺一齊嚟啦

一朝早公園一個人都無，正呀!!

公園內環境唔錯，隨處都係源泉，幾特別~

紫 bear 玩得好開心

有個神社，上去望望先~

個神社好細，好快巡個圈落返嚟~

有間茶室，不過九點幾未開門營業~

四周都鋪滿白雪，好靚~

逛下逛下行到去露天風呂入口......

殘念!!

響度慢慢逛，影下相不知不覺都 hea 咗接近一個鐘，係時候要離開~~

行到返去溫泉饅頭店附近，未去到長壽店首先已被旁邊一間饅頭店嘅大叔攔截，我搖晒手但佢好熱情係都要我試一個，仲同我講佢呢間好食過長壽店，哈哈.....食完行去元祖店諗住買返盒做手信，店員又 "質" 一個埋嚟......一朝早食咗三個饅頭，而且三個都係原味啡色，都咪話唔 "濟"

入到店內又飲返杯綠茶先，之後就買咗盒三色......呢度 d 人真係好 nice，雖然雞同鴨講但都不斷同我傾計，本來我已經攞咗櫃面上一盒饅頭，有個婆婆好好人，知道我一個女仔，專登叫入面工場即刻 pack 一盒新鮮俾我，仲指俾我睇個 expiry date 係比櫃面賣嗰 d 遲多一日嫁.....真係唔該晒佢呀

離開西之河原通，行返去湯畑，下一個環節當然要去浸浸日歸浴......首先去湯畑旁邊嘅御座之湯........

一開始決定嚟草津，我就已經諗住要去浸呢個御座之湯，因為覺得佢個木結構好靚~

呢度有個三湯めぐり手形，1300円，如果浸晒御座之湯、大滝乃湯、同埋西之河原露天風呂三個湯有折扣，雖然西之河原露天風呂 close 咗，但我都買咗作為紀念，反正單去其餘兩個湯入館費都係1300円~

呢個御座之湯保養得幾好，好乾淨，而且成個館都充滿木香......呢度有兩個內湯，一個「木之湯」，另一個「石之湯」，好似係男女輪流交替，好好彩我浸嘅係我希望嘅「木之湯」，一邊浸一邊傳來陣陣檜木香氣，好舒適好寫意呀

(Photo from Official Web Site)

泡完湯就去二樓湯源之間休息一下~

呢個休息室都幾大，好多日本人真係瞓響度休息.....我都已經覺得自己個行程好悠閒，點知佢地 d 日本人仲誇，即情好似自己屋企咁橫躺響度小睡~

由休息室望出去湯畑嘅景色~

響御座之湯休息咗一陣，我又出發去大滝乃湯......

好可愛嘅渠蓋~

大約十分鐘就行到去大滝乃湯........

呢個浴場比剛才御座之湯個規模大......

大滝乃湯除咗有大浴場同露天風呂外，最特別係仲有一個合わせ湯，由四個湯池組成，泉水嘅溫度一個比一個高，如果由低至高嘅溫度順序入浴，據講可以有治療痛症同疲勞嘅功效.....不過所謂嘅由低至高，實際係由熱至超級熱，我只可以去頭兩個，最後兩個真係熱到飛起，無可能頂得順~

(Photo from Official Web Site)

浸完晒幾個湯，又可以去焗下 sauna，如果純以價錢嚟講，剛才御座之湯收 500円，而呢個大滝乃湯就收 800円，咁當然係大滝乃湯抵好多......泡完湯又可以去休憩室攤抖下，我就當然去逛下 souvenir shop 啦~

不經不覺響大滝乃湯已經 hea 咗一粒鐘，係時候要離開~

泡完湯好肚餓，之前睇旅遊書知道由大滝乃湯行返去湯畑途中有間叫茶房ぐーてらいぜ，午間有意粉供應，不過去到發覺係一間輕食店只有蛋糕，而且無非吸煙區，成間店煙霧彌漫，真係頂唔順，所以唔好意思都要起身走人，好在個店主明白我個不吸煙手勢唔介意，不過我一坐低已經飲咗人成杯水真係唔好意思囉~

返到湯畑見到呢間人氣吾妻燒肉店唔駛等位，一於入去整返個和牛歎下先.......

我揀咗個國產和牛，1300円 only!!

第一次自己獨自食炭燒牛，hehe，我咁大個女未試過自己炭燒嫁.......oishii!! 好好食呀~~

食飽飽未夠鐘搭車又響湯畑逛下.....

同埋最後衡刺入返 d 手信呀!!

最後再來一個湯畑全景吧~~

返酒店攞返件行李就同草津講 bye bye 啦......兩日一夜短遊都唔錯，今次終於去晒日本三大名泉，如果論水質，我最鍾意下呂，真係好鬼滑，浸完第二日仍然滑不溜手，成個 trip 都唔需要搽 body lotion......有馬我地去嗰次無夜晚住宿只係日歸咗個金湯，所以對泉水嘅感覺唔係好深刻.....至於今次呢個草津都 ok，朝早浸嗰兩個日歸都唔錯，浸完都幾滑，而且呢度有個湯畑做賣點，如果可以睇埋熱湯表演就更正，希望將來有機會可以同老爺再來過啦~

我搭兩點鐘嘅巴士返新宿，之前已經響網上買定車票，早鳥票有折扣呀~

中途又係響上里 SA 停十分鐘比大家落車休息下~

返到去新宿六點多 d，即刻去酒店 check in，響房放低野當然又拿拿聲衝出去 shopping 啦......時間有限今晚先集中響東口一帶 shop，逛完伊勢丹、Bic Camera、GU等都已經接近九點，響 L'Occitane 入完貨後個 sales 話佢地二樓 cafe 有供應 dinner set，咁就上去食返個普羅旺斯晚餐啦~~

平時無特別留意，其實響東京等嘅大城市，好多人都係自己一個人響餐廳食飯，食多兩餐我都開始有 d 習慣，hehe....開始學習享受一個人嘅「寂寞」呀

個 set 有 drink, salad, bread, main dish & dessert，計埋稅都係 2000円咋，巧抵呀!!

個焗意粉味道都 OK 唔錯嫁

甜品揀咗我至愛嘅 creme brulee

既然係 L'Occitane Cafe，toilet provide 嘅當然都係佢嘅 products 啦，除咗洗手液，仲有 hand lotion! 咁我唔客氣啦

食完 dinner，響藥房逛咗陣，之後就返酒店，當然又係深宵雪糕時間，有得揀一定係期間限定版，今次係日式紅豆.......

Yummy yummy!!

第三日行程又完成啦，下一篇終於去到最後一篇，拖咗幾個月，中間都已經去咗幾次外遊返嚟，好 lazy 呀，係時候要快快寫我至鍾意嘅戰利品篇啦~~

(...待續)