PIGGYBREAD: 2015年1月東京草津5日

話咁快旅程已經去到第四日啦，瞓到八點先起身，然後就落去食個豐富早餐.......

食完仲可以外帶杯咖啡走，good ar!

今日無行程，全日 shopping

......未試過響日本自己一個人 shop 足一日，好興奮呀!!

我一直有一個心願，就係可以不受時間所限漫無目的咁逛激安同 100円店，每個 item 逐個睇逐個揀，逛到腳跛或者自己都頂唔順先離開 (好低能嘅心願

)......平時 shopping，其實老爺都算肯陪我，又或者任我 "up" 個時間各自搵食之後再 gather，但係明白人一定會知道，就算身邊嗰個幾有容忍力，你都硬係唔自然個心入面硬係唔係幾好意思，所以每次嘅「自由時間」都係唔敢要求太多，結果總係唔夠時間囉，shopping 呢樣野要成日就住就住就真係好唔過癮，所以今次咁難得自己一個，真係鍾意點行都得啦!!

今次我終於完成咗心願啦

，一個早上我只係逛咗激安同西武新宿 Pe Pe，以前成日覺得激安開 24小時，而 Pe Pe 嗰間 Can Do 收十點，所以好多時都拖到夜晚過咗八點後先去，其實個個都人同此心，結果就次次都要同人迫，尤其係激安，層層都鬼咁窄，人一多真係行到無乜癮，今次我一早就先去，朝早真係小好多人，逛得好舒服......盡情地逛晒激安同 100円店，再去埋 Pe Pe 其餘幾層，專攻 discount items，時為一月中，都仲有 d on sale，正!!

逛到咁上下就去搵食，行返去歌舞伎町嗰邊，一眼就見到杜如風介紹過嘅若狹家，之前同老爺嚟幾次東京都無緣去，今次就一於去試下啦.......

我叫咗個海膽魚子吞拿魚蓉三色丼......好味呀!

d 海膽幾鮮甜，學杜如風講，食完真係忍唔住笑咗出嚟

80円咁平加多個味噌湯先~~

食完好滿足咁離開，之後繼續逛 Lumine 同幾間藥房.....

逛到大約三點有 d 攰就先返酒店放低 d 野，休息一陣 d 戰鬥力又嚟過，於是就出發去東京駅.......先去逛咗陣大丸，然後就去食返個 tea 先......

雖然呢杯野要1306円，但真係好 yummy 呀!!

食完就走出去外面睇下維修咗幾年嘅車站......我仲記得 09年我同老爺去東北嗰次係住東京駅，當時個內部已經維修到七彩好似個迷宮咁，而家終於叫做個外牆搞掂晒~

不過東京駅真係好鬼大，內部有部份仍然裝修緊，對於我呢個超級路痴，想要由八重洲北口行去丸之內南口真係一件好迷惘嘅事

.......

幾經辛苦終於搵到條通道去丸之內南口

睇完車站當然要去埋車站旁邊嘅 Kitte Shopping Mall......

Shopping 前先上六樓屋上庭園眺望下個東京車站先.......

古老嘅紅磚瓦好有特色~

等多陣影埋個夜景~

賞完景就去 shopping 啦.......

逛完 Kitte Mall 就行返過去八重洲嗰邊，目的地 of course 係東京駅一番街.....逛到咁上下又去食返個卡樂 B 薯片先......

即做嘅薯片加凍冰冰嘅雪糕真係 yummy 到不得了

........

唔爭在整多個熱辣辣嘅薯條，超級好味呀!!

......一個人食晒兩大杯，老爺唔響身邊真係食得好肆無忌憚，hehe，肥死罷就

本來打算響東京駅食晚飯，但打掉完兩份薯條都已經有 d 飽，於是就搭車返新宿放低 d 野響酒店先，然後又再出動......

Shop 到九點多終於響小田急百貨去咗呢間五右衛門洋麵屋解決我嘅晚餐~

我要咗呢個芝士蕃茄海老意粉.......

加多 330円有野飲、湯及 salad~

味道都 ok 唔錯嫁~

食完響藥房入咗 d 貨就慢慢行返去酒店......新南口旁嘅燈色好靚~~

下面呢一堆就係今日嘅成果.......真係好節制，雖然收獲一般但一個人自由自在 shop 足一整日真係好爽，買唔買到野都已經係其次啦

今日已經食咗兩次雪糕，所以宵夜只係食響百果園買嘅士多啤利~

行咗成日都咪話唔攰，一撻落張床即刻昏迷........一覺瞓醒已經八點半，又落去歎返個豐富早餐~

今日係最後一日啦，雖然搭夜晚19:50機，但老爺千叮萬囑要我唔好掛住 shopping 要早 d 去機場，所以只好留響新宿最後衝刺，時間有限我都只係集中主力高島屋同電器舖~

一個上午嘅戰利品

老爺唔響身邊，我最大嘅煩惱係拎行李，雖然我已經好節制無點亂買野，但一個 25" 喼加一個旅行袋，要雞手鴨腳嘅我由酒店拖去 JR 站搭特急都唔係一件簡單嘅事，所以我就選擇搭機場巴士，好在住宿嘅酒店有巴士直達，3100円係唔平，但勝在簡單方便~

乘車處就響酒店門口~

成朝掛住買買買，當然無時間亦唔會記住食 lunch，最後 last minute 返酒店前響旁邊 71 買個飯糰頂住當上巴士食......

又比想像中好食喎

大約個半鐘頭就到成田機場，都等咗好耐先開始做 check in......兩件行李共 22 kg，SHIT! 我買 25 kg，蝕咗 3 kg 呀!!

早知買多兩本雜誌同多對鞋

第一次見係人手寫嘅 boarding pass......唔通廉航真係慳皮 d?!

Check in 後拿拿聲去 shopping，係咁意掃咗一個圈後已經無乜時間剩，今日無食 lunch 肚打鼓兼且一陣間廉航機上無野食，所以要犧牲 d shopping 時間去食野.....本來想去食鰻魚飯，但真係好鬼貴唔係好捨得響機場食

終於去咗食天婦羅蕎麥麵~

食完都差不多夠鐘，廉航 d 登機閘口好遠，要預鬆 d 時間行去 ......

Bye bye 啦，東京，五日四夜一人遊話咁快就結束

......不過好快我又會再來，哈哈~~

完成咗個遊記，當然又到咗最興奮 moment 要 post 埋 d 戰利品啦

......一條友只得 25 kg 嘅 quota，所以真係勁忍手

.....OK，先嚟可愛嘅豬仔手襪，係俾小姪女嫁~

我鍾意逛 300円店，d 野平得嚟係比 100円店靚 d 嫁，仲要 on sale 半價.....一月當時大約 6.8算，一張 blanket 只係11元，點忍手??

左邊嘅熊仔小鏡電話吊飾係東京一番街買，右邊係贈品

Snoopy 毛巾袋，我用佢嚟裝暖水壺......

其實個袋好多用途嫁!

Hello Kitty & Earth Music crossover 筆袋，重點係半價

Muji 又係去執減價貨，唔減都平香港一截，何況減半! 七折都抵啦

我鍾意屋企用 diffuser，雖然唔係減價貨，但趁円平都補定 d 香薰枝~

而家藥房有得扣稅，但要 group 埋一間店儲夠 5001 円，又唔係每一間店都有得叩稅，亦唔係每一間都有齊想要嘅 items，所以都幾煩，不過為咗平都要格多幾間最後先入貨.....

Made in Japan，當然比 made in China 貴好多，但貼近嘴嘅野都係盡量唔好用強國貨啦~

SPF50+，呢款當時都算係新推出，於是諗住買定夏天用......嘻嘻，所以而家咪用緊囉，幾有先見之明

.....用後感︰好易推又唔 "笠"

雖然家中 hand cream 存貨已經多到接近八十枝

，但都忍唔住入多枝保濕，粗用都好

呢個 Shiseido d program 防敏感系列試用後都唔錯，會再買~

藥房送嘅贈品

L'Occitane 雖然唔係日本 product，但円跌有 d items 平香港好多，做埋退稅就更抵啦......

既然係咁機場 duty free shop 又點可以唔補補貨

好耐無用 Fancl，去開日本就幫襯返......年紀開始大係時候要補充返 d 骨膠原~

我 d 頭髮唔知係咪因為留長關係甩得都幾勁，salon 就介紹我買 shiseido 呢隻 scalp treatment，用過覺得係甩小咗，但要六百幾一枝，好貴! 點知今次響高島屋見到有得賣，6480円有得扣稅之餘總有額外九五折，即刻買啦~~ (不過沒有最只有更，之後再去日本俾我搵到仲更平，係一次平過一次

)