PIGGYBREAD: 2015年2月日本長島鳥羽零景點 hea 到無可再 hea 6日 (長島篇)

接近十二月，而家先嚟寫返二月嘅外遊會唔會有 d 過份呢? 睇返個 record，截至呢一刻今年只係寫咗七篇遊記，歷史性新低......我承認自己好懶，不過亦都真係好「忙」.....曾經有人講過我嘅腳快過我嘅手，呢句話一點也不假，今年外遊次數較往年頻密好多，一個緊接一個，自己都覺得有 d 頂唔順

.....以為十月頭去完今年大旅行返來，今年嘅旅遊總算告一段落，應該可以輕鬆 d，點知又要即刻忙住搞出年嘅大旅行，簡直沒完沒了，哈哈......訂好晒頭半年嘅機票酒店，今次真係終於可以攤抖一下，係時候要收拾心情補寫返今年嘅遊記啦~~

年頭一月自己一個人去完東京草津梳乎後，二月農曆年又到咗一年一度同老媽子親子遊嘅時間，今年我地去咗名古屋，同往年一樣，同老媽子去基本上係無乜行程，正所謂沒有最只有更，一年 hea 過一年，今年更係零景點，真正嘅 hea 到無可再 hea

年廿九出發，機場好有過年氣氛~

今次搭 ANA.....好鐘意 ANA 呀，行李每人有兩件 23 kg 限額，真係好 generous，同小家子國泰真係無得比，CX 膳食差不在話下，行李限額先離譜，你有諗過去澳洲都一樣只係得 20 kg 嗎?! 出發都已經 15、16 kg 啦，叫人點去 shopping?? CX 真係好老土!!

ANA provide 嘅 snack 都靚 d 嫁，係櫻花 packing......CX 而家中短程機連 snack 都無，一句話，cheap 到無倫

紅酒白酒原樽任攞.....我地 d cheap 精當然唔會客氣

又一齊去日本，d bear bear 好 happy!!

舊年先去過名古屋，所以都好熟悉，一落機即過對面車站搭名鐵......呢度有個小插曲，當時好多人買票好混亂，我地唔肯定會搭普通車定特急，所以只係買基本車資，無加特急卷，諗住響車上如有查票先加錢啦，上到車好 full，我地分開晒坐，個職員查到去老媽子當然雞同鴨講，老媽子身無分文，但佢一d 都唔慌張，只係好淡定咁叫佢搵後面車廂 "my son, my son" (其實應該係 son in law

)，當然最後個職員都無搵到邊位係婆婆嘅 son 或 son in law，我地就咁就賺咗 360円，真係唔好意思

第一晚入住 Meitetsu Grand Hotel，早幾年住過覺得地點好方便，就響名鐵百貨上面，7700一位含早.....最主要係早兩個月前 book 時全個名古屋市所有酒店都已 full，只剩兩間酒店可揀!

娜娜今期校服誘惑~

一入到房就見到呢堆野，第一日咋噃!......Hehe，今個 trip 四個人總共有184 kg，本小姐唔用盡佢點對得住 ANA 一番盛意

房間設備都 ok 嫁~

放低行李即刻去搵食，老媽子唔行得遠求其響車站附近搵間就算~

食完返酒店宵夜.....是日係本小姐牛一，一早已經響 Furano Delice online 訂定一堆野食大擦一番......

呢個蛋盒好得意~

Yummy yummy

食飽瞓，瞓飽又食.....酒店早餐都幾多野食啦~

話明 no 景點，當然無行程，酒店最遲十一點 check out，食完早餐無野做唔駛講梗係各自去 shopping 下先啦，成個 trip 係得呢朝可以響名古屋掃下貨咋......

之後就搭名鐵巴士去長島度假村.....巴士中心就響 Nana 旁邊，三樓買票，四樓上車，超級方便~

車費單程 1,060円，來回票 1,900円，但我地之後要去鳥羽所以只買單程，車程約40分鐘~

名鐵巴士去到渡假村巴士總站，之後可以再轉 free shuttle bus 去各間酒店

長島度假村總共有三間酒店，最貴「花水木」，以雙人房計，最平都要 30,240円一個人.....實在太誇啦，個人覺得唔值囉.....我地揀咗最平但位置最方便嘅ホテルナガシマ (長島酒店)，無論去 outlet、遊樂園或「湯あみの島」泡湯都好近，package 包遊樂園及「湯あみの島」兩日入場、「名花之里」一日入場及 shuttle bus 接送、以及酒店花水木「傘亭」一杯免費 drink~

Check in 時會俾一大堆野你，都係 d 通行証、meal tickets 同 coupon 等等，隔咗咁耐都唔係好記得 (年紀大莫講話大半年前嘅事，尋日嘅野都未必記得啦

)，總之出入園區都要出示通行証啦~

雖然係三間酒店中價位最便宜一間 (其實都唔算好便宜，都要一萬八千幾一位)，但我地覺得好 ok，房間好新淨，亦好闊落......

窗外應該就係伊勢灣，住兩晚天氣都好好，感覺好開揚好舒服!

側望可以見到遊樂園個摩天輪.....

而酒店下面就係「湯あみの島」，鏡頭 zoom 近可以望見溫泉水

房間內一般應有設備都不缺~

Washroom 基本設備亦齊全~

最正係有個細細嘅私人風呂池.......

普通水或 100% 源泉任君選擇~

Welcome snack 兩日都唔同，但都係當地名物，第一晚係出名嘅安永餅，都幾好食~

我地響呢度住兩晚，頭砲節目當然係衝去 outlet 血拚先啦

.......由各酒店去 outlet 或者遊樂園可以搭 shuttle bus，但由我地酒店行過去都唔係好遠，大約十多分鐘~

去 information 出示 passport 就有 coupon 送，唔攞就蝕啦!!

Outlet 血拚完又趕下一場........酒店 package 係包咗一晚名花之里祭典入場，有 free shuttle bus 接載住客往返，有兩段時間選擇，check in 時要揀定，因為我地唔想食 dinner 趕頭趕命，所以揀咗五點先去名花之里然後先返來慢慢 dinner~

所謂名花之里，其實就係一個大花園......夜媽媽睇乜鬼花呢? 皆因冬季夜晚會有期間限定嘅燈光 show「冬華之競演」，既然 package 包咗當然要去參觀下.....由酒店過去十分鐘左右，去到會場個天都未黑齊，燈飾要差不多六點先會亮.......近入口處有足湯，不過凍冰冰大家都唔想除鞋~

一入去無耐就會見到呢個飛碟形會升高嘅觀景台，想玩要另俾 500円，不過超多人排隊.....名正言順唔駛去

園內嘅環境都幾靚嫁~

跟住人潮走，行下行下就去到由萬千粒小燈泡組成嘅「光之迴廊」，現場睇好靚嫁，而且都幾長，長過上次響十勝川睇彩凜詩祭嗰條好多，不過實在太多人，想停低影下相都好困難~

D 小燈泡全部係花花造型，好可愛

穿過「光之迴廊」最後就去到燈光 show 嘅舞台，現場有音樂配合燈影嘅節奏，都幾有氣氛~

如果早到可以上去較高嘅展望台，會睇得清楚 d，因為周圍都係人，想影一張無人嘅照片係根本無可能嘅事，不過我地行得慢，到發現呢個展望台時 d 人已經排到去樓梯位置，只能夠攝下位影一兩張相~

高處望落去可以見到一片燈海，都幾壯觀~

似唔似尼加拉瓜大瀑布? 呢個係今年嘅主題~

個 show 大約都有二十多分鐘......離開就行另一邊嘅「花迴廊」，相比「光之迴廊」，呢條短 d，而且主色係綠色，影相出嚟人面色怪怪咁

個飛碟觀景台亮晒燈仲更似一個 UFO~

著晒燈色嘅主園區好靚呀~~

呢個鏡池將 d 枯樹打上燈光都幾別緻....

當然最特別係個倒影啦，呢個池用「波平如鏡」嚟形容係最貼切啦~

近出口當然唔少得要去逛逛小食店同 souvenir shops 啦，不過要趕住上返酒店嘅送迎巴士，只能夠係咁意巡個圈~~

返到酒店就去 dinner......

係食 buffet，我地住兩晚，野食係一樣，所以只係求其 post 一晚嘅相片就算，同埋 buffet 永遠只會掛住食根本都唔會記得影相

另外 package 仲包咗一杯 free drink，所以第二晚食完 dinner 攤抖一陣就去 relax 下.....「傘亭」響另一間酒店「花水木」，係三間酒店房價最貴一間，趁機又可以乘機行過去參觀下~

Menu 上嘅飲品包括 wine、cocktail 都可以 order 嫁~

飲飽食醉當然要抽個時間去「湯あみの島」泡湯，叫得溫泉渡假村佢個溫泉規模當然有番咁上下，呢個「湯あみの島」分為「奧入瀨溪流之湯」及「黑部峽谷之湯」，其實即係男女之別，各有多個唔同種類嘅大浴場、露天風呂同水療按摩，可以話係我暫時去過咁多個露天溫泉最大型嘅一個，真係想 focus 響邊一個部位都可以滿足到你

(All photos extracted from Official Web Site)

我最鍾意係「座樂之湯」，坐響度 d 泉水剛剛好至肩下，個按摩力度又夠勁，最正係佢個出氣泡位置剛剛好喺正個 pat pat，d 水打落去真係好過癮呀

呢個「白絹之湯」都好正，泉水係奶白色，好似去返乳頭溫泉咁~

住客係免費入場，要浸晒所有浴池真係至少要一個多小時，尤其我同細妹一齊去浸，一邊浸一邊八下呢樣八下嗰樣，時間唔覺唔覺就過咗去......不過細妹浸浸下發覺皮膚有 d 敏感，我地懷疑佢唔係好受得嗰個「炭酸風呂」，但我老皮老肉就一 d 問題都無囉

除咗「湯あみの島」，如果住宿我地呢間長島酒店仲可以返去自己房浸下個私家湯，三間酒店中係得呢一間嘅房有嫁咋

雖然只係室內細細嘅風呂，但兩隻 bears 就浸得好開心，睇下佢地瞓得幾咁 sweet 就知啦!!

雖然我地住三日兩夜，但都唔算真係十分 hea，其實都好忙吓......朝早又要起身睇日出.....

至於早餐一樣食 buffet，都 ok 幾多野食嫁~

食完早餐當然無停，係時候要去遊樂園玩下機動遊戲，就響酒店旁邊，行過去大約十多分鐘~

有手帶俾住客，帶住可以多次出入，遊樂園內所有機動遊戲任玩~

朝早十點遊樂園先開，酒店住客可以優先十分鐘入場，不過其實朝早好少人，完全唔需要排隊，鍾意玩咩都得~

我地先陪媽咪玩咗 d 非刺激性嘅遊戲，hea 下 hea 下同佢食埋 lunch 之後就送佢返房休息~

之後就係各人自由時間，我自己就一個人去玩 d 刺激嘅玩意，因為無人敢或有興趣去玩.....

我一向都好鍾意玩呢 d 高速刺激嘅機動遊戲，(Well, 除咗會 360度反轉再反轉嘅過山車係堅決唔會玩啦，因為一唔為意唔識就位其實係好易會整傷條頸.....See? 我唔係盲目追求刺激嘅人囉

)......以前成日要老爺陪我，但老爺其實畏高，後生時俾我纏多兩纏都勉為其難陪我玩下，而家年紀大咗佢真係唔太頂得順，而我亦都開始明白唔敢玩嘅人硬要佢地玩係好痛苦嘅事，所以近呢兩年我都唔再勉強佢，反正玩呢 d 野都係體驗下嗰種快感，純粹個人感受，駛鬼人陪咩，舊年去瑞士少女峰我自己走去玩 zip line (雪上空中纜繩)，老爺響一邊睇到心驚膽跳

，但我就真係覺得超級好玩，響半空中飛翔而下觸目一片冰天雪地嗰種感動佢係無可能體會......

不過遊樂園 d 機動遊戲玩得多，其實來來去去都係嗰幾樣野，玩多幾次都無咩身鮮感，我而家已經進展到玩海盜船都覺得悶......至於呢個長島遊樂園我最期待嘅兩款過山車，其中紅色嘅鋼鐵巨龍2000 據講最高部份係97米! 諗諗都覺得勁刺激，可惜當日維修無開放