PIGGYBREAD: 2014年4月日本中部立山8日- 往魚津看埋沒林、蜃氣樓

Day 3 (桜野公園 > 魚津)

我都知好古怪，失驚無神又整呢個 14 年立山 trip 嘅遊記，不過呢一篇其實去年已經寫咗大半，於是就將佢埋尾唔好嘥咗佢啦.......

上一篇講到響櫻野公園見到仲有餘櫻，我同老爺好似發咗癲咁不斷咁影相，逗留咗半個鐘好滿足咁離開......下一個目的地係位於富山縣嘅魚津市.......

車行咗約半個鐘，去到飛驒清見 IC，開始進入長長嘅隧道

.....呢個區域對於我地嚟講有好特別嘅記憶，2010年中部之旅，因為俾個 GPS 老點 (詳情可以去呢度望望)，我地響呢段路前前後後行咗三次! 當日沮喪嘅經歷簡直歷歷在目，絕對係童年陰影囉，再度經過呢 d 水蛇春咁長嘅隧道真係一額汗，好在今次我地再無行錯路，好順利走出白川鄉 IC，離開岐阜縣，真係抹一把汗

唔知係唔係緊張過後成個人放鬆晒，我地開始十下十下

，頂唔順於是搵個 SA relax 一下先~

呢個叫城端嘅 SA 個 view 都幾靚，仲有幾棵櫻花點綴~

飲杯咖啡，hea 咗一陣就繼續上路.....原本我地諗住去魚津前順路先去滑川市，嗰度嘅螢魷好出名，有個螢魷博物館我都幾有興趣，不過今朝加插咗睇櫻花環節，估計去到滑川都差不多點半鐘，要參觀埋個博物館先再去食 lunch，老爺當然唔肯立刻抗議，所以就決定 skip 咗唔去滑川直飛車過去魚津駅啦~

接近魚津市，開始見到連綿嘅雪山，唔知邊一座係立山呢?

一點半去到魚津駅，我地打算去光顧車駅旁嘅海風亭食魚生，不過駅前嘅停車位全部 full 晒 (相片係之後食完飯補影，之後就有大把車位)，於是唯有響周圍兜下睇邊度有收費 car park......

兜咗一陣忽然見到有個暗角放咗個海風亭駐車場嘅指示，yeah! 即刻泊埋去唔駛煩~

雖然個駐車場唔係響食店隔離，但都係行過一兩條街，好快就行到去~

魚津靠海，當然要嚟 try try d 魚生.......

我地叫咗兩個海鮮丼，一個 920円，一個 1000円......

其實兩個丼嘅魚生種類基本一樣，貴 d 嗰個多咗隻蝦......Hehe, 當然係我食啦

Oi-shii!! 好新鮮呀......又唔貴，正呀

食完好滿足咁離開，食到飽飽響車站周圍行下先......d 地磚圖案係螢魷，好可愛呀~~

連渠蓋都係~

車站旁都無咩好逛，於是我地就去攞返架車出發去附近嘅埋沒林博物館.......

博物館停車場一行出嚟有個好靚嘅水池~

好嘞，係時候來一個通識課.....所謂埋沒林就即係被埋沒嘅森林，埋沒林嘅成因有好多種，好似被火山灰掩埋、河川氾濫土石堆積掩埋等等，世界各地都有埋沒林，而魚津埋沒林大約就係二千多年前，由於河川氾濫造成杉木原生林被土石沖刷堆積掩埋，之後海平面上升被掩埋嘅原生林就被降到海平面下，而家嘅埋沒林遺跡係1952年興趣魚津港時被挖掘出來，於是日本政府就興建咗個博物館予以原地原狀保存遺跡，並且被國家指定為特別天然紀念物......點解人地 d 保育做得咁好，我地就乜都只講經濟效益??

博物館幾座 building 都好有型~

入館先買票，料金每位 510円~

買咗票有職員同我地介紹博物館內幾個展館，同埋話俾我地知參觀完仲可以去睇一下放映館，好好 service 呀~

我地首先去水中展示館.....

嘩! 一踏入去就覺陰陰暗暗，只見中間一個超巨大水缸.......

大水缸中展示嘅就係原地保存響水中嘅超大原生林樹幹，呢枝樹幹因為當年係被乾淨嘅冰水埋沒，所以可以 keep 到二千年都無被腐蝕，而家為咗保存原狀於是當局特別用地下120公尺原水灌入水槽，溫度亦要 keep 住15度左右，而為咗避免藻類響缸內生長，館內嘅燈光長期係較暗......老實講其實個現場環境真係有 d 陰森