PIGGYBREAD: 2014年4月日本中部立山8日

Day 3 (魚津市)

繼續出埋篇倉底貨

由海之駅蜃氣樓大約二十分鐘車程就去到今晚入住嘅金太郎溫泉旅館~

去到大門口響架車攞咗 d 行李我就入去做 check in，老爺就有人帶佢去泊車......

呢間旅館係一間比較大型嘅溫泉酒店，唔知係咪似酒店格局，做 check in 都只係企響 reception counter 填 form，之後我就企響度等老爺，因為本 passport 響佢度，但老爺去咗好耐先到，原來泊車嘅地方好遠，佢泊完之後要走返過來，以過往經驗，一般咁情況旅館通常都係幫客人泊車，但呢間就無咁 service.....而我響等待老爺嘅呢一段時間酒店 d 職員個個企晒響度，唔明佢地點解唔趁呢段空檔向我講解一下酒店嘅設施同朝夕食嘅地點時間囉，於是我就諗或者佢地要等埋我個 partner 先一次過講......但老爺嚟到佢地就叫咗個女仔帶我地上房，於是我又好天真咁諗或者上到房先再講解啦~

我地嘅房間係響別館峰之界四樓......

全館有 free wi-fi 呢~

房間都幾大，和洋式......

Bedroom 有和式紙板隔開，唔鍾意可以全部拉開~

兩張好大嘅床，都幾舒服~

浴衣、襪子、去大浴場泡湯用嘅大小毛巾及索繩袋仔全部齊備.......

而且浴衣有四種 sizes，好周到，一般旅館只係供應兩種 sizes~

Toilet 亦好闊落......

但只有自動沖水同洗 pat pat 功能，無自動廁板開關~

附有洗手盆同 tissue, good 呀~

客廳基本設備齊全~

又有呢 d 七巧板玩~

雪櫃有枝大 size 蒸餾水同兩杯布甸，free 嫁!

有按摩椅，夜晚泡完湯按一按好正~

梳洗台都好大......

好乾淨，設備完善......

旁邊係 shower，有暖氣，好過尋晚嘅下呂紗紗羅四邊通風~

外邊係露天私人風呂......

一邊可以望到外面景色，有捲簾，怕俾人睇見亦可以落咗佢~

自己調教溫泉水嘅溫度~

風呂旁邊係陽台........

望出去個 view 幾正......

有連綿嘅雪山.......

陌田.....

環境好正好舒服~~

房間整體來講相當唔錯.......可以話酒店嘅硬件好 OK，但職員嘅 service 就認真唔掂

，個姐姐仔帶咗我地上房，完全無任何介紹，放低條 key 就想走......唔係掛，就算 zero presentation，咁幾點食早晚餐都要話我地知?? 點知佢真係一 d 英文都唔曉，我重申係一粒單字都唔識，真攞命，搞咗好耐出盡晒身體語言同畫埋圖畫最終搞清楚個時間......但又無講俾我地知究竟兩餐響邊度食，最後我地要走返去 reception counter 問先知......

唔好講話幫我地沖茶呢 d 咁過份嘅要求，個姐姐連我地對鞋都無放好就閃人

......Well, 我認我係超級港嬸，但如果真係去慣日本旅遊嘅人應該會明白我咁諗唔係好苛求啫? 老實講，我地由第一次去日本住溫泉酒店開始，無論幾便宜嘅溫泉旅館都好，從未見過有一間酒店個接待係唔會幫客人放好對鞋，就算唔將對鞋放入鞋櫃，至少都會將個鞋頭掉返轉對住門口，響我嘅認知入面呢個係日本人基本常識，睇日劇都睇得多啦，更何況佢係服務人員，我嚴肅地覺得呢位姐姐真係應該要攞去再培訓囉!!