繼續去年(!)密密遊記錄......
一月去完東京同草津溫泉，二月即刻又同老媽子去名古屋，但見四月初正好有個復活節假期，見 ANA 機票價錢尚算合理，於是又去東京走一轉~~
四月係賞櫻季節.....要說真正為咗睇櫻花而去日本旅遊已經係十多年前嘅事，嗰次係第一次同老爺去日本自遊行，仲記得當時響新宿御苑見到一樹一地嘅粉紅真係好鬼浪漫，一轉眼時光飛逝，原來十多年唔覺唔覺就過咗去，呢十多年我地雖然去咗日本好多次但都無再點認真睇過櫻花，上一次響高山忽然見到小小餘櫻真係好驚喜，撩起條根，於是今次決定舊地重遊，再去東京追追櫻緬懷一下~~
今個 trip 第一個櫻花景點當然係新宿御苑，呢一日天氣好好，藍天下嘅花海好美
好多日本人響草地上舖晒蓆悠閒地賞櫻，一個大半日就咁就流走......好羨慕佢地可以如此閒情逸緻，我地從來無可能咁奢侈，就算係放假出外旅遊......
一群群貌似職場上嘅員工......不用上班? 定係美其名 field trip??
唔止野餐咁簡單，連枱凳碗筷都預備埋.......一家人好溫馨呢~
覺得食野大殺風景? 可以去藝術一下......素描又得......
油畫又得~
如此良辰美景，我地呢 d 遊客響有限時間可以做嘅不外乎都只係搏老命咁影.......
好似傻咗咁不斷影影影!!
紫 bear: 我靚 d 定櫻花靚 d??
美美的景，美美的人，美美的事.......
個人認為湖邊嘅粉紅係最美呢.....
新宿御苑有好幾個湖，每一個都景色優美.....
大自然的美，任何文字語言都顯得不足，我還是收起我的廢話吧.....(其實根本就係懶
)
)
我最喜歡的一拍
這一年，於新宿御苑，我終於領略到何謂「滿園春色」~~
(...待續)
沒有留言:
發佈留言