2011年2月北海道道東道北12日 - 返來啦!!

我地由北海道返左黎啦!!!

一年一度12日嘅「大旅行」又結束啦!! D時間點解過得咁快嫁，明明仲係第一日晨咁早去機場搭機，話咁快一眨眼又玩晒12日......響札幌最後嗰朝，食早餐時望住窗外漫天嘅飛雪，簡直有種想喊嘅衝動，我好唔捨得北海道呀!!

今次係近年出外遊玩去得最耐嘅一次，12日!! 其實去到後段真係有D攰，再加上唔係自駕，日日要拎住D行李走，都幾辛苦......我知我知，D行李基本上都係老爺拎，有幾辛苦呢?? 但我睇見佢手上背上D野一日多過一日，明明凍到飛起佢都可以一身香汗淋漓，咁我做旁觀者都好心痛嘛!!.......我今次好乖，成個trip都無點鬧情緒.....就算有發脾氣嗰一、兩次都係因為老爺黑面先咋，唔怪得我.......所以今次可以話係近年去旅行個氣氛最詳和嘅一次呀!!

12日嘅行程都算順利，基本上想玩嘅野想睇嘅景都好多完成左，好滿意啦......天氣唔錯，大部份日子都係令人心情開朗嘅藍天白雲，亦偶有漫天飄雪嘅浪漫，再加上shop左唔小野，簡直係大滿足!!

好啦，先俾自己重溫一下呢12日嘅大概經歷......我D爛尾遊記已經多到慘不忍睹，黎緊都唔知究竟要寫邊個好，趁呢一刻都仲係處於happy & 積極狀態，都係拿拿聲記低呢12日嘅精華所在先啦~~

首先同大家介紹一下今個trip嘅成員........按慣例靚靚嘅紫bear一定有份......But, 今次佢嘅partner唔係熊寶寶.......

各位，以下呢隻mini bear bear 就係今個trip嘅新成員啦.......

佢好新嫁，係老爺剛剛送俾我嘅生日禮物，佢話專登買隻細size等我可以方便帶去旅行喎.......我最鍾意嘅forever friends毛公仔呀，佢已經N年無靜悄悄走去買黎送俾我啦，正所謂物輕情意重，好sweet呀

 

 

DAY 1 - HK > 札幌

第一日無咩好講，朝早9:40機，去到新千歲三點鐘，唯一要講嘅係未到目的地響機上已經出血啦，因為過年去台灣時又係坐Cathay，已經見到有D野啱買，返HK後check左價錢就上網訂定左響機上攞啦.....未起程就已經掃貨，都無乜邊個會好似我咁敗家!!

呢晚有兩個friend咁啱響札幌，於是就約埋一齊去蟹本家食蟹宴.....都OK唔錯，不過十點就close，下次都係去居酒屋食好D，四個人當中有兩個八婆絕對可以一路隊酒一路八到天光.........

 

DAY 2 - 札幌 > 層雲峽

朝早響札幌shop左一陣，11:30搭酒店shuttle bus去層雲峽，超多人，大巴都兩架......三點半到Choyo Resort Hotel，即刻出去行下......

呢度個feel有D似定山溪.......

夜晚去睇冰瀑祭，雖然有人話呢個祭典只係一般，不過我地就覺得唔錯......或者撞啱係星期六，有firework，幾有氣氛.......

最尾嗰part煙花都幾靚~~

會場入面個大冰洞好大，D冰柱好得意.....我地響入面影左好耐相~~

 

DAY 3 - 層雲峽 > 知床宇登呂

本來預約左響北見搭知床Shiretoko Grand Hotel嘅 shuttle bus，由於book到流冰Norokko號海側席，臨時改行程搭JR直去知床斜里，可以近距離睇沿岸嘅流冰~~

沿途出名嘅北浜站，又要跑上展望台影相，又要衝去站入面睇「牆紙」，仲要睇埋個餐廳「停車場」，最初以為只有七分鐘會好趕，但又OK喎，最後順利完成~~

好多流冰呀!!

去到知床Shiretoko Grand Hotel已經過左五點半，天都開始黑，拿拿聲去食dinner先，係buffet，幾多野食......

食完就去睇激光show.......

 

DAY 4 - 知床宇登呂 > 屈斜路湖

呢日行程好豐富，晨咁早6:30就去呢個trip最期待嘅一個節目︰流冰漫步!!

浸泡響流冰中，個感覺超正!!.....真係好好玩!!

中午離開知床去屈斜路湖同摩周湖一帶遊覽，夜晚住嘅pension已經幫我地預約左taxi，我地對呢個taxi sightseeing好滿意，個司機叔叔好好人，說話唔多但超nice~~

摩周湖，好靚呀!!

砂湯，好多天鵝，唔怕人嫁，鍾意點同佢地影相都得~~

不過其實D天鵝好嘈

古丹溫泉，景色真係好靚.......同成群天鵝只係一線之隔，你望住我我望住你，響陣陣飄雪下享受秘湯，一生人可以有幾多次機會呢? 不過其實個浴池幾污糟，我地浸左一陣發現有青苔黐埋身嚇到即刻彈起閃，好核突.....之後同天鵝影下相等日落，幾寫意~~

當晚住Pension Atreyu，食左呢個trip最難忘嘅一個晚餐，呢個smoked cheese真係好好味!!

並唔係咩豪華美食，但當晚每一道菜都好好味，按老爺嘅講法，係充滿感情嫁，你會知道主人家係好用心咁做好每一道菜色，especially for you，一般酒店或者旅館係食唔出呢種誠意，好warm好回味!!

 

DAY 5 - 屈斜路湖 > 阿寒湖

朝早去玩canoeing，釧路川幽美嘅風景真係好難忘，個guide沿途會講解好多野，好似教曉我地邊D係咩動物嘅footprint呀咁，最主要係佢高大威猛又靚仔.....好美妙嘅一個體驗~~

玩完canoeing，穿過森林行返去pension，仲免費玩埋snowshoe trekking....無論D雪幾深，著左呢個就可以輕鬆自在咁漫步於雪地之上，對腳唔會深陷落去嫁.....不過老爺太重磅，有幾次都卸唔到力，成隻腳深陷左雪入面，要靚仔哥哥抽返佢出黎......呢個體驗幾得意，靚仔哥哥仲教我地點認啄木鳥同松鼠嘅tracks，幾有趣~~

當晚入住呢個trip最豪華嘅溫泉旅館，阿寒湖鄙之座.......呢間溫泉旅館無論service同埋設施都一流，豪華級嘅享受.....當專車戴我地出去溫泉街時，我地真係覺得自己十足係葉麗儀當年唱過嗰句廣告歌咁︰Hey big spender!!

(小朋友未聽過嘅唔好深究係邊個年份唔該)

單係響超過60平方米嘅房入面影相都已經影左二十分鐘，可想而知幾多野影~

晚飯後去阿寒湖冬華美祭典，D煙花幾靚!!

 

DAY 6 - 阿寒湖 > 十勝川

朝早當然響鄙之座個私家溫泉浸返夠本先check out啦!!

之後搭旅館shuttle bus去帶廣，跟手又入住另一間高級溫泉旅館.......

十勝川嘅美人湯真係好正，浸完之後D皮膚真係好滑嫁!!

晚上又係一餐好難忘嘅晚餐，我好鍾意呢個前菜，好精緻，每一款都好回味，尤其個smoked cream cheese 好味到不得了!!

main dish 係美味嘅炭火燒黑毛和牛，yummy yummy!!

之後仲去埋彩澟詩祭典......係比較趕，但我地嘅宗旨係一場去到可以參與嘅祭典我地都會去玩下.....呢個彩澟詩都唔係咁差啫，點解D人成日話睇唔睇都得呢? 我地覺得OK喎~~

 

DAY 7 - 十勝川溫泉 > 然別湖

朝早又係響旅館浸夠佢個私家風呂，全個trip最貴嘅一晚住宿，唔好蝕呀!!

下午就去我一直都夢寐以求嘅然別湖，結左冰嘅一大片湖面搭左幾間冰屋，好靚呀!!

冰湖上獨一無二嘅露天風呂，響白茫茫一片嘅雪地沐浴於溫熱嘅泉水，飄雪從天上輕輕洒下，情境有幾正，大家可以想像一下，我直情唔想離開!!

夜晚去Ice Bar......

一人一杯雞尾酒，cheers!!

 

DAY 8 - 然別湖 > Tomamu

清晨下嘅然別湖，雖然好大風雪，但景致一樣美妙......

依依不捨離開然別湖，下午去到Tomamu，一去到就急不及待去玩banana boat同snow mobile，banana boat一般，snow mobile就好好玩呀!!

響Polar Village玩完就轉戰Viz Spa House，最特別除左定時有人造浪，仲有個jet spa cottage.....就係呢度，我地玩到唔知時間，搞到最後去唔到Ice Village......不過唔緊要，下次再去過，老爺話嘅!!

食完dinner去睇安滕忠雄嘅Chapel on the Water，好美!!

返到房當然要浸下個至正嘅私家Jacuzzi啦!!

 

DAY 9 - Tomamu > 美瑛

朝早唔駃講當然又係響房浸個夠.......

仲有私家sauna房，老爺最happy!!

中午返札幌放低D大行李，跟手又去美瑛，黃昏到達，D景色都好靚!!

 

DAY 10 - 美瑛 > 札幌

美瑛嘅日出，好美喔!!

無誇大，現場睇真係好似身在仙境咁!!

之後join Pension嘅photo tour遊美瑛山.....美瑛嘅名木，唔係summer先值得睇嫁，景觀之路、拼布之路，響白雪舖蓋之下靚到不得了!!

 

DAY 11 - 札幌 > 小樽 > 札幌

小樽，唔需要多解釋啦，呢一日真係shop到不亦樂乎.......lunch去左一個環境好浪漫嘅地方~~

永恆嘅小樽運河~~

 

DAY 12 - 札幌 > HK

最down嘅一日，當然係因為終於要離開北海道返HK啦，但呢樣都未算慘，最慘係.......

行李超重要罰錢!! 68.4 kg，講真，唔算超好多，對於我地黎講真係司空見慣，但死人國泰只肯俾每人extra 3 kg.....3 kg?! 俾得咁小家不如唔好俾啦!!

要罰我地6萬幾 円，當堂暈左響度，抽起兩個旅行袋做handcarry，最終都要64 kg，白俾四萬幾円......好down，好想死嘅感覺，唔開心左好耐

，有史以來響回程機場一個item都無買!! 連次次必買嘅cheese cake都無mood 買.....憎死國泰!!!

行程完結，講左咁耐，係時候講到重點，就係show quali時間.....究竟我呢個敗家精買左D咩狗屎垃圾搞到要罰幾萬円呢?? 請看下回分解......

 

 

重新出發之先去台灣再去日本

自從爸爸走左之後，我地嘅生活模式改變左好多，平時夜晚邊個有時間就返去陪媽媽食飯，星期日幾姐弟妹一家大細都會一齊同媽媽食飯同搵節目.....我諗我算係比較樂觀嘅人，好多謝咁多位blog友對我嘅鼓勵，睇你地嘅留言令我好感動......日子過去，雖然偶然諗起爸爸仍然會傷心同好掛住佢，但正所謂日子難過仍要過，我相信爸爸在天之靈都會希望我地快D振作以後過得開開心心~

令我情緒復原其中一個原因就係要plan去旅行囉，每年我地都會有個「大旅行」，因為上一次去日本中部北陸唔係咁多雪，所以去年八、九月已經響Cathay Holidays hold左個4日3夜package，決定今年又去北海道玩雪......舊年十一月去完青森返黎求其睇過下條路線，book定左一、兩間好想住嘅酒店後又丟低左無攪，爸爸走左之後，當然無晒心情，拖左好長一段時間，而家距離出發日子愈來愈近，近日終於的起心肝攪埋條路線同book酒店.......

不過未去北海道，我地又先去另一處地方玩玩，今年過年我地會同媽媽去外地散心，不過決定得太遲，離初一唔夠一個禮拜，咩package都full晒，於是改跟團啦，以為跟團會平D，點知真係大鄉里，原來過年D團費勁貴，好似去沖繩5日竟然要萬幾蚊一位!! 黐線嫁，改玩第二度唔去日本啦，韓國5日6千幾7千都OK，不過sorry無晒位，有D又用唔晒紅色假期要請多一兩日假，最後終於搵左個台灣4日仲淨返幾個位，都要5000蚊一位，是但啦，至在同媽咪散下心，佢對腳又唔行得耐，跟團佢就舒服D.....我已經將近10年無跟過團，所以諗起都幾有趣，不過最緊要係希望媽咪玩得開心啦~

講返個「大旅行」，上次響雪地自駕經歷過差D撞雪山事件，老爺已經表明冬天去北海道唔再自駕，所以今次又回復返坐JR同巴士......近呢幾次去日本都自駕，突然要check返JR同巴士D班次，真係頭都大，不過今次好多時都會利用酒店provide 嘅free shuttle bus，所以都唔係太煩，而且洗費仲無咁貴添~

俾大家睇下大致上嘅行程︰

Day 1
HK > 札幌    宿︰札幌 Best Western Hotel Fino
第一日去到札幌都已經近黃昏，不過咁啱有個朋友呢一日響札幌，所以就約定左一齊去食蟹宴~

Day 2
札幌 > 層雲峽   宿︰朝陽リゾートホテル
早上爭取時間響札幌shopping一陣得一陣，之後乘酒店shuttle bus往層雲峽，夜訪冰瀑祭會場.....呢一程由札幌去層雲峽嘅free shuttle bus好抵，亦都因為可以慳一筆先book呢間酒店，不過send fax 同 email去confirm個shuttle bus，已經幾日都無回覆，唔知攪咩......
http://www.sounkyo.net/

Day 3 
層雲峽 > 知床Utoro   宿︰知床グランドホテル北こぶし
朝早由層雲峽搭巴士去上川，轉JR去北見，再轉乘酒店shuttle bus往知床Utoro，夜晚睇知床極光show
http://www.shinra.or.jp/

Day 4
知床Utoro > 川湯溫泉   宿︰川湯第一ホテル 忍冬 或 溫泉浪漫の宿　湯の閣
晨咁早起身去玩流冰漫步，已經book左6:30時段，超希望天氣OK有得玩，但而家又有D驚會PK到癲....
食完早餐就乘酒店shuttle bus離開.....不過呢一日跟手嘅行程到而家仲有D愁，呢一晚會去川湯溫泉，原本打算搭觀光巴士遊川湯附近好似摩周湖、屈斜路湖等一帶景點，點知今年由網走開出嘅阿寒摩周國立公園線竟然無啦啦運休，另一條由釧路開嘅觀光線又夾極都夾唔到時間，真係媽媽聲......於是唯有send email試下問酒店，睇下川湯溫泉自己有無咩巴士線，或者同佢book架車作幾小時遊覽咁啦，呢間川湯第一酒店嘅service真係一流，英文勁掂之餘仲要非常快手就回覆，答案係無local 巴士嘅，不過佢地可以幫我地book架的士，三個鐘大約20,500円，當然唔計每個spot要stay嘅時間.....20,500円!! 攞命咩....不過酒店話如果我地真係諗住book，佢可以幫我地同的士攞個fix價咁話喎，不過咁貴我地都應該唔打算book啦......
另一個option，就係呢一段路自駕，老爺話睇下我究竟有幾想去嗰D地方囉，如果真係好想就plan下啦......你話我係咪真係好想呢? 咁就梗係想啦，不過又未至於話非去不可囉，我而家都已經好隨意，事實上呢個世界好多野都唔到你控制，世界咁大，都好難話去得晒你想去嘅地方，去得到就去啦，最緊要係安全啫，所以等過左年睇下D天氣點先算囉，所以呢一日嘅行程到而家仲未定係點......不過點都好，夜晚嘅event就一定唔會放過囉，因為已經book左去摩周湖睇星星同睇個Diamond Dust呀，又係嗰句，希望天公造美啦，個Diamond Dust要遇上天氣好同有-13度氣溫先得嫁.....不過觀乎上一次去青森睇紅葉嘅運勢，我地D運氣都係麻麻地，所以都係抱住隨緣嘅心態啦......不過我響度諗，如果呢一日又唔去摩周湖同屈斜路湖D景點，又遇著個天氣唔好睇唔到星星同diamond dust，咁我地其實走去川湯溫泉做咩呢??
http://www.masyuko.or.jp/pc/event/ev_hoshikikou.html
http://www.masyuko.or.jp/pc/event/ev_diamond.html

Day 5
川湯溫度 > 阿寒湖   宿︰あかん鶴雅別荘　鄙の座
好耐之前睇雜誌介紹已經好想住呢間高級旅館，不過真係唔平，所以晨咁早已經響Jalan book左佢全間酒店最便宜嗰個plan，話最便宜但其實都好貴，所以希望可以早D去住同浸返夠本.....夜晚有阿寒湖冬華美祭典，我想坐香蕉船同玩雪兜呀!!
http://www.lake-akan.com/
http://www.koudai-akan.net/iceland.html

Day 6
阿寒湖 > 十勝溫泉    宿︰三余庵
呢一晚又係一間好出名 [貴] 嘅旅館，因為見blog 友 jokelib寫得實在太吸引，所以原先唔打算去十勝，最後都情願取消住支笏湖改去呢度......又係book左全個旅館最cheap嗰個plan，今次個trip成12日，budget有限，D円又咁高，唔可以好似上次去能登珠洲咁豪啦......十勝川夜晚有個叫彩凜詩嘅祭典，不過我地都未決定會唔會去，好似好趕咁，間旅館咁鬼貴，係咪應該響旅館慢慢享受佢個dinner同浸盡佢D溫泉呢??
http://www.tokachigawa.net/event/sairinka/index.html

Day 7
十勝溫泉 > 然別湖    宿︰然別湖ホテル福原 或 然別湖畔溫泉ホテル風水
朝早響旅館浸到最後一刻鐘先搭shuttle bus去帶廣，上次去食唔到元祖個豚丼，睇下今次運氣點，之後搭巴士或JR去新得轉乘酒店shuttle bus去然別湖......山長水遠走去呢度都係為左個冰上露天風呂!! 超期待呀!! 夜晚仲有ice bar去飲返兩杯先.....
http://www.nature-center.jp/

Day 8
然別湖 >トマム > Tomamu   宿︰Alpha Resort Tomamu
朝早希望可以坐熱汽球，食完早餐搭酒店shuttle bus去新得，轉JR去トマム再搭酒店shuttle bus 去Alpha Resort Tomamu.....呢度唔駛多介紹，呢兩年已經好紅......都係嗰句，盡早去玩盡佢D設施啦~~

Day 9
Tomamu > 美瑛   宿︰Pension Jacatra
朝早響resort玩盡佢，中午搭返酒店shuttle bus去トマム，然後轉JR去美瑛，再轉搭pension shuttle bus，上次住Woodland Farm嘅經驗幾好，所以今次又book左一間細細嘅cottage，雖然係cottage，但唔貴囉，8,750円一個人，包早晚餐.....去美瑛絕對係因為之前睇左電占兄嘅blog，D雪景實在太靚!!

Day 10
美瑛 > Rera Outlet > 札幌   宿︰札幌 Best Western Hotel Fino
朝早join Pension 嘅 photo tour 去美瑛山一帶影相!! 中午就搭返JR去南千歲，玩到第十日，係時候俾D時間自己去血拼一下啦!!

Day 11
札幌 > 小樽 > 札幌   宿︰札幌 Best Western Hotel Fino
我摯愛嘅小樽，上一次夏天忍痛無去，今次要去足一日!!

Day 12
札幌 > HK
呢一日唔需要多講，當然早D去機場，新加建左之後都未去過，一於最後一擊 shop shop shop啦~~

 

 

 

爸爸走了

這一篇網誌是為了紀念我親愛的爸爸而寫的。

爸爸上個月走了。

要哭的也哭過，要痛的也痛過，以為時間可以將悲傷沖淡，但每當自己一個人靜下來時，淚水總仍是會默默地流下。

我很想念他。很想再次聽他的聲音、再次看到他的面容、很想再一次握他的手，但這一切都已經是沒有可能再發生的事，每當想到這個事實，我總是會有心如刀割的感覺。

人為什麼總是如此執迷不悟，多少人、多少次告訴你要珍視現在，我們好像看得通透明白，但其實我們總是將生命中的最重要忽略。無法言喻的悲傷，除了對爸爸的不捨，更多的是悔疚。對於爸爸的病，過後回想，我總是懊悔是否當日的一些決定是做錯了。我知道再這樣想是無濟於事，對於生命的終結，對於人生的來去匆匆，也許我永遠也沒有足夠的智慧去參透箇中的道理，但我實在無法原諒自己在爸爸生前做得不夠多不夠好。很多事都是過後才醒覺，是不是總要在失去後我們才能真正學懂珍惜？

還記得最後一次在家跟爸爸閒聊，那最後的一個星期五，爸爸跟我說，早上和媽媽去看醫生，由家門口徒步往的士站，平常不用五分鐘的路程，當天他用了二十五分鐘。那夜回到家，跟弟弟電聊說起這件事，當時的我邊說邊已泣不成聲。為什麼人力是如此渺小？生命中實在有太多事我們是如斯無能為力。

近日我總是想起妹妹跟我說過的一段話。身為天主教徒的她，曾經向天主祈求，盼望天父可以多給爸爸二十年的時間，後來她又深怕自己太貪心，所以就改向天父祈求多給爸爸十年。爸爸走後，她不明白，為什麼只是區區的十年，天主也不能答應她。其後有人告訴她，爸爸的離開，天主自有安排。去到天國的爸爸，在天父的懷抱裡，不用再受塵世間一切的愁苦。我想，如果真是這樣，那豈不是另一種幸福？或者我應該要感恩，十年前，爸爸第一次病發，上天已經寬容地給了我們額外的十年。媽媽說爸爸走得太突然，有很多事還未交帶妥當...我想人生中的遺憾總是沒完沒了吧，換一個角度，這十年來，爸爸看到了摯愛的孫女出生成長、看到了妹妹結婚、看到我終於圓夢畢業.....那一次我們一家人在公園內拍照，我們幾個大不透，硬要爸媽跟我們擺著古古怪怪的造型，午後淡淡的陽光，見證了我們幾姐弟妹的古靈精怪，見證了爸爸媽媽對我們無比的寬容，當日的歡笑溫馨，到如今仍然瀝瀝在目。每次看著這一組相片，我就看到爸爸給我們留下了近年最開懷的笑容.....我想，我應該要懂得感恩。

爸爸走了，但我深信，他一定在天國等候我們。爸爸，請不用牽掛，正如那一夜我在病榻前跟你許下的諾言，我們會好好照顧自己，好好照顧媽媽。我深深地希望你可以了無牽掛，走向遠方快樂的國度。

爸爸，再見了。