2009年2月日本東北8日溫泉之旅 - Day 3 (Part 1 告別乳頭溫泉鄉)

2月16日   星期一   (妙乃湯 > 角館 > 松島)

第三日！晨咁早就起身，梳洗後當然先拱去浸浸個雪見風呂先啦~~

呢件棉襖.....好似千年日劇戀愛世紀，有一幕理子同哲平都係著住呢種棉襖食火鍋嫁~~

首先走去浸下個混浴先，尋晚黑媽媽其實唔係好睇得清個景，朝早黎睇雖然個天仲未好光得晒但已經好靚，又落緊雪呀....我真係好鍾意飄雪下浸浴嘅感覺~~~~

一朝早已經有幾個人響度浸緊，不過個金湯夠大，所以唔覺得迫，不過有兩個男人霸住左最外圍位置好耐都唔走，果個位睇個瀑布係最近嫁，想話移過去始終唔係幾好意思......

響金湯浸完見銀湯無晒人就即刻走過去浸.....銀湯依然熱過金湯，浸完後發覺辣到成身紅卜卜~~

我地記得尋日預約貸切風呂時，個女職員係有兩個時段俾我地揀，一係夜晚十一點，一係第二朝六點，我地估計我地或者係最後一批預約嘅人，咁朝早六點呢個時段就有可能無人預約，又或者有人預約但D人已經浸完走左呢......所以浸晒兩個混浴後，我地就走過去貸切果邊裝下囉.....

去到發覺真係無人！一於唔理三七廿一，即刻拱入去鎖埋度門跳入個浴池浸返夠本啦~~

呢個就係貸切風呂喇，望出去其實都係個瀑布景，不過側D咁解啫，攀個頭出去係可以見到個混浴金湯嫁.....

終於都浸夠喇，之後就返房換衫同執野~

清晨妙乃湯嘅雪景好靚呀~~~

妙乃湯有三個時段食早餐，7:30，8:00同8:30，我地因為想搭8:40開嘅巴士出返田沢湖，所以就揀左最早7:30食早餐.....

朝食安排響和室食，即係要坐.tatami.....不過和室嘅佈置好典雅~

窗外落住好大雪喎~

我地座位旁邊有個火爐嫁，好溫暖呀~~

早餐其實已經放定晒響度~~

老爺煎嘅蛋好靚~~

我煎嘅蛋好似一舊野.....

最瘀係我唔係好敢響大庭廣眾下打開蛋殼，要老爺幫我打....，咁啱俾個女侍應睇到，佢好似望住外星人咁望住我......當然，我係唔會介意佢咁膚淺嘅目光，我係做大事嘅人，廚務D野從來唔係我嘅強項......

睇下我指住果兩碌野......個侍應示意我地將佢倒落個碗度然後攪攪攪，再落埋前面果杯野 (好似係醋) 同粒梅......

Oh! No!!!.....折開原來係納豆！

舊野好sticky嫁，仲好鬼難聞......真攞命！整完之後隻手臭左成日~~

完成後嘅賣相......想我試食？No way！老爺試過就話好好味，不過我諗佢係講反話，因為佢食到想嘔白泡咁樣......

玩完食完仲有咖啡.....個杯好靚呀~~

D咖啡糖係不規則形狀嫁~

個朝食睇落好似唔係好多野，不過食落原來好飽.....

食飽後就返房執埋D行李，攤抖一陣就去check out喇.....好貴呀！~~

攪掂check out就諗住行出去巴士站等巴士出返去田沢湖，都未踏出門口，有個女職員就問我地係咪搭巴士，又叫我地唔使出去等，佢會出去幫我地睇住，巴士到就叫我地出去.....我地有D唔好意思，不過好快就有第二個女職員攞左兩杯茶出黎叫我地安心坐下先.....見佢地咁熱心，咁就坐低飲杯熱茶先啦~~

坐左一陣，我地都係走左出去，因為記起尋日黎嘅時候趕頭趕命，個門口都未影過相喎~~

外面都落緊幾大雪.....之前叫我地響入面等果位職員原來響門口掃緊雪，佢好好人仲幫我地影合照......影影下相又有另外一個女職員走出黎，佢見我地無無聊聊咁就叫我地返入去室內等，仲一路推我地入去一路話「大丈夫」.....我地唯有乖乖地走返入去，結果兩個女職員一齊響室外凍冰冰咁幫我地等巴士，其實我地真係覺得非常之唔好意思....

無咩做就又影下相啦~~

等多一陣架巴士終於黎到，果兩位女職員走入黎通知我地仲幫我地拎行李.....

出到去好大雪，一個女職員就開左把摭幫我地摭雪，佢一路幫我地擔住把摭一路送我地行到去巴士門口......另一個職員仲恐怖，竟然唔知響邊度拎左張類似木櫈仔嘅踏級放正響巴士門口位，方便我地上巴士......上左車仲一路鞠躬一路同我地講 bye bye .....佢地咁殷勤嘅服侍態度真係令我地好感動，果剎那心入面真係有一種好唔捨得嘅感覺.....日本人真係好有禮貌，尤其係日式旅館嘅服務員，佢地嘅服務態度真係令人覺得好舒服好窩心，姑勿論人地係真心定假意，就算佢地只係職業上嘅需要，至少人地真係真心做好呢份工......

懷住依依不捨嘅心情離開妙乃湯......巴士向住田沢湖嘅方向駛去，車窗外白雪好似鋪天蓋地咁，如此良辰美景，我同老爺都話將來有機會一定要再黎玩過......

巴士去到田沢湖畔....尋晚我地已經商量過，如果去田沢湖畔觀光，搭環湖巴士要成一個鐘，尋日見田沢湖灰濛濛一片，因為有過北海道洞爺湖嘅經驗，驚又會係冷清清無咩睇，我地行程緊密，寧願早D去角館，所以就決定放棄田沢湖喇~~

返到去田沢湖車站，雪依然落得好大，天色都幾陰暗.....

我地搭9:57開嘅新幹線落角館....

月台靜悄悄，一地都係白雪~

田沢湖，bye bye 啦....乳頭溫泉鄉，bye bye 啦.....我地一定會再黎嫁~~~~~

---> Day 3 - Part 2 小京都角館