2009年2月日本東北8日溫泉之旅 - Day 3 (Part 3 松島一‧海灣的優悠)

2月16日   星期一   (妙乃湯 > 角館 > 松島)

離開角館，繼續下午嘅行程......

由角館去松島，首先要搭新幹線返仙台~

沿線嘅風景好靚.....我最鍾意呢種一望無際嘅雪地，遠處有幾間零星嘅小屋.....

坐左個幾鐘，14:25就到仙台.....由仙台去松島有兩條線，一係東北本線，一係仙石線.....東北本線14:44有一班車開，所以我地就揀左搭東北本線~

15:07就到松島站喇.....松島呢邊嘅天氣同秋田爭好遠，只有點點嘅雪花，比起今朝響角館實在唔算係太凍囉.....無白雪鋪蓋嘅車站顯得有D蕭條嘅感覺~~

松島車站係個好細嘅車站.....出左站我地打算先去酒店check in 放低D行李先.....我地今晚入住嘅酒店叫絕景の館，酒店個web site 話由車站去酒店要徒步15分鐘，不過我地費事邊行邊搵，所以打的算.....

好彩打的咋，因為條路都幾長，而且沿路無咩景睇.....間酒店仲要響個小山坡上面嫁，拖住D行李咁搵路都好麻煩喎....打的都係600 yen 啫~~

就係呢間酒店喇.....

間酒店靜英英，入到去個reception無職員響度，按鐘等左一陣就有個女職員出黎，佢都識講D英文，招呼都算OK嫁，攪掂check in 後就帶我地上房~

我地住響103號房~

叫得絕景の館，由房望出去嘅景梗係唔差啦.....睇到成條福浦橋嫁~~

我地入住嘅係露天風呂付和室，即係有私家風呂嫁~~

呢個係露台，可以好悠閒咁坐響度望個海景~

呢個就係個私家風呂喇......咪住先，點解唔同網頁上嘅樣噃?????.....

呢個先係酒店網頁上顯示嘅露天風呂付和室嘅展望風呂喎.....

不過酒店有註明話呢款風呂只係其中一例.....咁即係話佢地唔係一定保證俾呢種我地啦.......

放低D行李，差唔多三點半，我地即刻出發去市內觀光喇~

間酒店響個小山坡上，所以要行返落山....本來松島市內有條循環巴士線，每程收費一律100 yen，不過時間夾唔啱，所以唯有用腳行啦~~~

落到山下面行左一陣就見到條血紅色嘅福浦橋，條橋通向福浦島，島上面有個植物公園....冬天睇怕無咩花睇啦，而且行條橋要收費200 yen，離遠影張相算把啦~~

我地嘅目標係伊達政宗歷史館.....係呀，又係呢條友呀，上次響仙台都介紹過佢響仙台同松島好出名啦~~

松島市其實唔大，D景點都好集中，行十零分鐘就到喇~~

入場費要1000 yen，不過有折扣卷，可以平200 yen....共通折扣卷酒店有得攞嫁~~

其實最初黎呢個歷史館都係抱住到此一遊嘅心態，不過原來佢係一座蠟像館，以伊達政宗嘅一生而劃分左25個展區，每個展區好似講故事咁介紹佢嘅生平.....D蠟像都做得幾神似，每個展區仲有中文介紹，幾有趣，其實OK喎，幾值得去嫁~~~

伊達政宗係宮城縣嘅歷史猛人，佢19歲就繼承家業，年紀輕輕就以個人嘅智慧同勇氣屢獲戰功......不過佢同期咁啱有豐臣秀吉同德川家康，兩個人響全國嘅名氣都大過政宗公囉.....淨係睇日劇都唔覺有做過佢就知啦~~

伊達政宗細個時因為天花而右眼失明，所以又叫獨眼龍政宗.....中間果個細路就係佢喇....成個女仔咁噃~

歷史館有兩層....睇下人地幾周到，不良於行嘅都可以坐呢張電動椅上二樓嫁.....我叫老爺試下坐睇下點運作，佢竟然鬧我痴線.....

老爺好老土，最鍾意影埋D兒童不宜嘅野......呢個其實係政宗公個老婆，響度餵緊奶俾佢地個仔食~~

政宗公著晒盔甲去打仗喇~

就係呢D戰事圖喇，有好多幅嫁.....老爺好似鏢童上左身咁，每見一幅就一輪嘴咁響度旁述個戰情.....好似講馬咁，笑到我出唔倒聲~~~

呢個展區，其實唔係好知邊個係政宗公，因為搵極都搵唔倒邊個係獨眼.....

伊達政宗最後嘅俏像~

睇完個歷史館，近出口有個souvenir shop，梗係又發揮我天生購物狂嘅本性啦~~~

入左D貨後就好滿足咁走喇.....我地沿住條國道45行下條松島購物大街.....其實條街唔係好長，而且當時已經四點半，好多舖已經close左，想話搵間賣燒生蠔嘅店都無~~

就係響呢間店行緊嘅時候，老爺D同事不斷咁打電話黎講公事.....好騷擾人呀)))))))....攪到我無晒心情買野!!!!!!

有用備長炭火燒嘅燒餅賣，梗係唔放過啦....

好大個燒餅....即燒嫁，yummy~~~

就收舖，有割引呀，買返D返香港做手信先......

之後我地就行去松島嘅標誌景點 -- 五大堂

要行過呢條赤紅色嘅木橋去對面個小島，五大堂就響個小島上~

條橋中間係空嫁，睇到下面D海水，水流都幾急，企響上面都有D驚嫁....

呢座就係五大堂唯一嘅建築物，入面放左五大明神像，不過無得入去，只可以影外面~

小島上種左好多松柏.....遠望過去都見到成個松島灣仲有好多其他小島群~~

黎到松島，點都要影下D松葉嘅大特寫掛~~

呢間係松島比較出名嘅酒店 -- Century Hotel，細妹舊年十二月黎住過，話個晚餐好鬼正喎~~

離開五大堂差唔多五點，我地就沿岸邊優優悠悠咁漫步返去酒店~~

雖然天氣寒冷，但一邊欣賞廣闊嘅海灣，一邊響一點點嘅白雪下漫步，都幾寫意呢~~

D小島真係好似小盆栽~~

行左一段路，個天開始黑，好似凍左好多，見路邊有自助機賣熱飲，即刻整番罐熱粟米湯暖下個身先~~

行到返去酒店已經五點半，個天將近黑晒.....而今日嘅戶外行程亦完結喇，之後當然係酒店嘅泡湯同晚餐時間啦.....(待續)

---> Day 3 - Part 4 松島二‧絕景の館