2011年2月北海道道東道北12日 - 往道東去...

2月21日 - DAY 3 (PART 1)
層雲峽 > 上川 > 網走

第三日啦!! 朝早起身欣賞下窗外嘅風景先......有陽光! 今日嘅天氣唔錯~~

 

原來望出去遠遠可以見到冰瀑祭會場.....

今朝要搭8:40巴士去上川，所以7:00就去食早餐，地點又係尋晚食dinner嘅地方.....

響食事處門口有個牌提醒d客人8:00至9:00呢個時段會好混雜，好彩早d黎.....呢間酒店唔知係咪收好多團體客呢，尋晚都見到有好大團內地客響lobby等搭lift，大家可以想像一下當時d聲音嘅分貝有幾勁.....

七點鐘唔算好多人......

早餐係食buffet，野食ok啦~

窗外嘅景色

食飽就上房執埋d行李，hea一陣就閃人~

老爺去做check out，我當然周圍影下相.....

一朝早已經有野賣.....

得兩個lift，好似小左d.....尋晚我地浸完大浴場咁啱有個內地團剛check in完，一大班人迫晒響度等lift.....我地好cheap，拿拿聲行樓梯上二樓截左部lift先

響正lobby有個notice board顯示左當日貸切風呂預約嘅狀況....其實尋日已經見到，唔知點解當時無影相.....我成日都係咁，好多時見到d野覺得要影低佢，但唔知點解隻手同個腦總係唔係好協調，呢個情況仲好似愈來愈嚴重咁

......

酒店大門.....

酒店對出就係car park~

搞掂晒就離開酒店，沿車路行去巴士站......尋日兩手空空行得好輕鬆，六、七分鐘就去到，今日要拖住個喼同一個手提袋響雪地上行，仲要係斜路，行兩步已經有d攰......(係呀，只不過係第三日咋，我地已經開多個行李袋裝野.....)

去到尋日經過嘅石狩川，停低抖抖先......

響陽光底下嘅冰瀑會場.....

影左一陣相就繼續行，去到巴士站已經見到去上川/旭川嘅巴士到左......

由層雲峽開出嘅道北巴士主要去旭川，途經上川，同大部份日本巴士一樣分段收費，往來上川800円一位......酒店其實本來有免費送迎巴士返札幌或旭川，不過我地下一個目的地係位處道東嘅知床，如果搭酒店shuttle bus去旭川，雖然慳左巴士費，但就好嘥時間，火車班次都夾唔到，當然係俾錢自己搭巴士啦，而且800円都唔算話真係好貴~~

嘩!! 成架車已經坐滿晒人，無位坐我地要企呀.....一朝早咁多人去旭川.....

好彩車程唔算好耐，大約半個鐘，不過企左一陣已經又熱又攰......

九點鬆d去到上川站~

搭去層雲峽嘅巴士都係響呢度上車.......

巴士站候車室都幾闊落......

其實呢d站內時刻表影黎都唔知做咩，不過次次都會不自覺咁影，反正又唔駛錢.....算啦，影得唔好嘥，而家唔知要等到幾時先有得再影.....

JR火車站就響巴士站隔離.......

我地會搭9:42嘅班次去網走.......

今晚我地會去知床宇登呂溫泉，預約左嘅酒店亦都有免費送迎巴士響JR北見站接載客人，本來最初我地已經book左呢個free shuttle bus，後來第一日響札幌搞JR pass，順口問下發覺呢一日嘅流冰Norokko號仲有海側席，上次去網走我地只係搭左冬之濕原號，今次既然流冰Norokko號有位，當然想搭埋佢啦，所以就決定改改行程，由上川搭JR去網走再轉流冰Norokko號去知床斜里，酒店響北見站安排嘅shuttle bus會路經知床斜里站，我地就響知床斜里再搭酒店shuttle bus去知床宇登呂溫泉，反正今日我地會用JR pass，響交通費同時間上都無咩影響~~

未夠鐘，周圍影下相先~~

上川都係一d比較鄉郊嘅地方，搵多間shop睇下都無.....

應該係搵多個人睇下都無~

由上川去網走要成三粒鐘，買定d小食同野飲響火車上嘆先~~

差不多夠鐘站長通知去網走嘅特急就到嘞.....

細車站，d站長都有人情味多d，佢好nice咁話埋俾我地知響邊個乘車口~~

向道東出發啦!!

上車無耐就開始瞓同飲飲食食.....(如果日日都可以咁就好啦~)

三個鐘嘅車程，瞓下醒下食下野，時間都好易過......

沿途嘅雪景都係大片大片白雪雪嘅雪地同雪山~~

呢個山個外形咁古怪嘅....

好想大字形瞓落去......

呢個車站係一列粉紅色嘅車廂，好別緻....

原來係女滿別站~

12:46到達網走站.....距離上一次黎網走已經有四年時間，上次響網走我地玩得好開心，坐破冰船、參觀網走監獄博物館同天都山流冰館，住宿嘅網走湖莊間房個view又好正，所以網走俾我地嘅印象好好，今次重臨真係有種探老朋友嘅感覺......

上次黎好似唔覺有呢個監獄佈景板.....

今次黎網走只係過境性質，主要係轉車，下一班流冰Norokko號嘅開出時間係13:57，有差不多一粒鐘時間，當然去醫肚.....雖然只係一粒鐘嘅空檔，超怕麻煩嘅我地又將兩件行李keep響locker先......

400円用一個鐘......

只得一個鐘時間唔走得遠，我地去返上次幫襯過嘅食店浜長駅前.....呢間店就響車站隔離，好方便，上次我地去到好full，成間店都係香港人，我仲記得當年開始hit去網走坐破冰船，當時都仲未可以上網book船位，要用fax或者打電話，所有香港人都係手揸一本長空旅遊書響呢間浜長駅前一邊食一邊交流破冰船破冰情況，諗返起都好回味~~

一別四年，好似無咩變......

今次唔係好多人....

Menu得日文，亦無圖片，不過唔緊要，店外面有sample，店長會跟你出去落order.....

老爺要豬扒飯......

我點嘅係好好味嘅蝦天婦羅烏冬.....

店入面有特別介紹嫁~~

開餐啦!!

食飽都差不多夠鐘搭車.....下一站，冬季特別列車流冰Norokko號，以慢速行走於網走至知床斜里，慢慢欣賞一下鄂霍次克流冰海面.......

(...待續)