2011年8月澳門好hea 2日 - Day 1 (Part 1)

已經有幾年無去澳門，記得對上一次去嗰時個漁人碼頭都仲起緊，其實我地久不久都心思思想去睇下呢個東方拉斯維加斯而家有幾咁繁華，不過如果想住好d個酒店價就好金，所以一路都講講就算....事有湊巧，咁啱早排澳門又有新酒店開幕，今年又咁啱係我同老爺嘅N周年紀念，於是就決定豪佢一豪當慶祝下咁啦!!

一開始本來係想book銀河嘅悅容莊，貪佢房入面有個relaxation pool好過癮，點知一個月前已經話full左，都唔知有無搞錯，都唔係平啦，而家d人有錢得咁交關，幾千蚊晚酒店都咁易full....

房入面有私家relaxation pool，本來一心諗住同老爺響度鴛鴦戲水.....既然想豪無得豪，咁唯有慳返d $$留返下個月去日本先豪啦~

(Extract from Hotel web site)

因為想住氹仔嗰邊，所以就揀左Grand Hyatt....酒店package包左來回船飛，可以揀金光或者新渡輪，金光有臨時碼頭響氹仔嗰邊，如果住氹仔就方便好多，不過香港呢邊只得上環上落，一諗起夜晚返黎由上環返屋企咁鬼遠，我就情願俾多一舊水坐新渡輪響尖沙咀上落算.....

我地搭9:30船，老爺問點解book咁早，咁早去做咩，係囉，我都唔知點解book咁早，同平時返工一樣時間起身，黐左線....

候船室可以望到ICC

今次呢個trip事前一d準備都無，愈來愈發覺如果之前響網上搵得太多料，去到當地d野熟口熟面其實唔係咁過癮，所以我決定以後都唔上網搵咁多料，費事無晒新鮮感 (當然老爺話我擺明係搵野黎賴啦，佢認為我無點準備嘅最大原因係因為好lazy啫，咁某程度佢嘅睇法都唔可以話唔啱嘅，都N年咯，佢都好了解我)

晨咁早10:30去到，過關都好快，雖然只係開一個counter for香港人，但唔算多人，反而內地客多到有d恐怖，成個大堂企到密密麻麻，而家d內地人真係超有錢，好可怕!!

一早去到做咩好呢，走入去Information攞張map研究下先，d歷史名勝古蹟以前都去過晒，唔想再去.....對住張map呆左一陣，是但啦，我地咁sweet sweet，一於拍住拖去逛下公園先啦.....原來澳門有個松山市政公園有纜車坐嫁，登山纜車站響一個叫二龍喉公園嘅地方，外港碼頭有巴士去....

出到去巴士站，嘩外面熱到飛起，又唔知要等幾耐，好快我地就放棄等巴士改為打的....只係幾分鐘車程啫，落錶都係$21~

不過開講有話樂極自然生悲，唔知係咪近來我咒得人PK多，一落車行唔夠兩步我就PK嘞，唉.....今次真係跌得好金，條牛仔褲幾乎爛開，痛到我眼淚水都瞟埋出黎，呢個紀念日都真係難忘....

由細PK到大，我嘅戰績都好彪炳，對上一次PK只係兩個月前響地鐵條樓梯碌左落去，d瘀痕剛剛先叫退返d，又黎.....我可憐嘅膝頭，下圖兩處深色嘅瘀傷就係今次嘅紀念品，四周一撻撻嗰d就係對上一次留低嘅，唉，舊都未散晒又黎新，人地唔知或者會以為係家暴.....

就咁睇map松山公園都幾大~

纜車入口響條巷仔入面....

車費單程$2，來回$3....

我咁lazy，天氣又咁熱，仲要剛剛PK完，當然揀來回，要我由山上行落黎，你不如打死我好過.....同埋，only $3啫!!!!

9號車廂，長長久久，hehe~~

其實呢個纜車車程好短，影兩張相已經到左~

熱死人，一朝早已經33度!

出左纜車口仲要行一段頗長嘅路，不過沿路都有d樹蔭，慢慢逛，ok啦....

有個防空洞展示廊，展示以前軍事設施，免費唔駛錢，順道入去望望.....

個展示廊其實係由地下通道改建，有d陰森嘅感覺.....

軍人休息室....逛逛下忽然見到呢兩個假人公仔，差d俾佢嚇死!!

睇完展示室，再行一段路去睇炮台同燈塔....

松山係澳門最高嘅地方，可以眺望澳門市....叫做最高，其實一d都唔算高囉.....

呢日天氣好好，藍天白雲，不過真係熱到抽筋!! d汗不斷係咁流，如果唔係流汗而係漏油就好啦

終於去到炮台石室入口....

有隻龍貓呀!

石室入面原來放左颱風訊號標記.....

原來仲係用人手操作....

呢個位，查實幾危險囉~

新舊葡京.....

其實講真，我覺得新葡京個外形好老土同俗氣，真係物似xx形

呢座building好靚~

山頂最高點係個教堂同燈塔~

唔講唔知，呢度響2005年已經被聯合國列為世界文化遺產~

東望洋炮台

影晒相逛埋個小教堂就行返回頭路離開......逛完第一個亦係唯一一個景點我都已經熱到謝晒

搭纜車返落去山腳，見到有巴士站去外港碼頭，老爺話時間咁鬆動，不如搭下巴士.....是但啦，有冷氣就得~~

巴士站有個工作人員企響度，佢好主動問我地去邊同搭幾號車，幾好喎，澳門真係繁華左好多.....等左一陣好快就有巴士，不過呢程巴士都兜左好耐，同埋好奇怪，原來澳門d巴士，對開嘅起點站同終點站來回兩條路線d車站係唔同嫁，好似我地搭呢條12號線由順景廣場去外港碼頭，中間會經二龍喉公園，但相反由外港碼頭去順景廣場就無經喎，真係唔搭過都唔知.....

返到去外港碼頭，我地就搭返酒店shuttle bus去酒店繼續我地好hea之旅~

(...待續)