2011年2月北海道道東道北12日 - 川湯溫泉泡足湯

2月22日 - DAY 4 (PART 5)
硫磺山 > 川湯溫泉

上一回講到離開硫磺山，我地向住第三個景點川湯溫泉進發....由硫磺山去川湯溫泉都好近，只係幾分鐘車程......

川湯溫泉響屈斜路湖附近，據講因為呢度地底嘅溫泉湧出河面造成煙霧迷濛嘅景象，所以就叫做川湯.....講真其實同一般溫泉鄉無咩分別啦，地方唔係好大，即使中午時份想搵個人見下都比較難

川湯溫泉有咩好玩呢? 咁人煙飄渺嘅地方，睇怕條溫泉街都唔慌多野shop.....

其實一開始想來川湯溫泉遊覽，最主要係想睇夜晚嘅Diamond Dust.....所謂Diamond Dust，係指冬天時當溫泉嘅水蒸氣遇到極寒冷嘅空氣就會凍結而形成冰霰，即係類似一d粉狀嘅冰屑.....而川湯溫泉每年一月尾至三月頭就會特別舉行冰霰舞會 (Diamond Dust Party)，溫泉街一帶夜晚會set晒燈泡，響燈影之下無數嘅冰霰就好似一顆顆閃閃鑽石咁響夜空之下飛舞....幻想一下都估到情景好靚，好想睇呀!!

但係要睇到Diamond Dust好講天時地利，氣溫至少要跌到-12度(!)，同埋要無大風雪....不過大家睇睇我地去到呢日當時個溫度計，係6.1度!!

黐孖筋.....二月份嘅北海道道東地區，-6.1度好似先正常d囉....咁鬼熱，今晚十成十一肯定無得睇Diamond Dust啦!!

好在之前我都無話抱太大期望可以睇得到，所以都唔算好失望啦.....講返下午嘅行程，夜晚就預算睇Diamond Dust，咁日光日白走黎又做咩呢，其實我地之前同Pension溝通嘅時候只係話想去川湯溫泉逛下，但就無講實去做d咩，我地都以為係行下條溫泉街shop shop咁啦，點知黎到先知咁靜俏俏....不過原來司機叔叔另有安排，佢帶我地黎原來係想俾我地見識一下川湯溫泉嘅足湯呀~~

係喎，黎溫泉區當然要欣賞下呢度嘅溫泉設施啦，司機叔叔好有心思呀!!

呢個足湯個環境都ok唔錯.....

正當我地響度影緊相之際，司機叔叔就同我地講佢要返去架車攞d野.....原來佢係去攞毛巾俾我地足浴!! 其實我地無諗過浸，只係打算影幾張相當到此一遊算，點知個司機叔叔唔單止攞定兩條毛巾俾我地浸完抹腳用，佢仲幫我地搵毛巾抹乾淨張木凳先叫我地去坐，真係唔該晒佢呀

.....睇住佢走來走去、好認真咁幫我地預備，嗰剎那除左非常唔好意思 (因為我地其實無打算浸)，仲有就真係好感動囉，因為我覺得佢真係好有誠意要我地試下個足湯.....日本人真係好nice，我好懷念佢地嘅風土人情呀

司機叔叔抹乾淨張木凳後就請我地去浸浸嘞.....本來我地無諗過浸，不過人地咁有誠意，我地梗係卻之不恭啦......我地都有叫佢同我地一齊浸relax下嫁，不過佢係一個好專業嘅司機先生，係唔會響工作時間做非工作嘅野啦

於是我地就好悠閒咁坐響度泡泡足湯.....D溫泉水都好夠熱，好舒服呀! 尤其係俾人當上賓咁服侍嗰種感覺.....呢個額外嘅節目好正囉，因為之前無預算有呢個行程，所以都幾開心呀!!

川湯溫泉水屬硫磺質溫泉，據講可以治療神經痛~

呢個足湯都幾大，可以容納唔少人....不過全程都只係得我地兩條茂利，私家足湯呀!!

浸夠後就響足湯附近周圍逛下.....

湯溫泉生成碑

原來係個手湯.....

呢條木好長呀! 搞咩呢??

咁長驚太多人唔夠地方俾人浸手? 但我地響度hea左半粒鐘都唔見有其他遊人喎.....抑或係俾人用黎玩涮烏冬比賽呢

Hea左一陣，係時候要離開川湯溫泉，響冷冷嘅天氣下可以好悠閒咁響度泡下足湯，呢個景點安排得真係唔錯呀!!

上返車，我地又向住第四個景點進發，係期待已久嘅砂湯呀~~

(...待續)