PIGGYBREAD: 2011年8月澳門好hea 2日

響酒店游完水，返房浸左一陣泡泡浴hea下hea下，又係時候夠鐘去睇水舞間.....

今次我地呢個酒店package除左包來回船飛，仲包埋水舞間入場門票.....水舞間劇院就響Grand Hyatt旁邊，好方便 (相片第二日後補，當時實在太多人)

呢個show逢星期四至日&公眾假期上演，五點同八點兩場.....我地揀左睇五點，諗住睇完先慢慢去食飯，唔駛咁趕~

我地坐B區....個圓形舞台好大，d水唔知有幾深呢?

我諗應該都好深，因為開場無耐有個好高嘅船桅就由水底升上黎.....

d演員仲要響船桅上面跳落水，邊跳仲邊表演埋花式，好似睇緊郭晶晶佢地比賽高台跳水咁呀!!

好厲害，場景變得好快，一個唔覺意又由海面變返陸地......

好多高難度雜技表演.....

坐響前排兩三行d觀眾成日會俾d水整濕，好多人索性撐開把摭擋水花，好好笑，劇入面個小丑仲成日專登走向觀眾撥水~

呢個係女主角，成日響度跳ballet....

其實個故事好簡單，大意都係個女主角俾妒忌佢嘅女王禁錮，男主角歷盡千辛萬苦咁去救佢嘅老土橋段啦，但睇左好耐都覺得九唔搭八，唔知想點.....不過其實著眼點都係睇高科技舞台效果，有無內容已經唔緊要~

呢幕個涼亭後來沉左落去，成個舞台都係水柱，都幾壯觀~~

好多都影唔到，因為d演員跳躍嘅動作太快....

呢個show可以影相但唔可以影video，不過好多人無理會照影，d工作人員叫完佢地唔好影轉頭又影，叫左N次都係咁，好煩厭....都唔明，係都要影，合法俾你影就話影低留個紀念，人地兜口兜面講明唔俾影，俾你偷影左一次就算啦，點解話極都係咁? 影左又點，又唔係d咩super stars，十年內都唔會再翻睇啦!!

呢個影像幾過癮~

最正係呢個亡命電單飛車表演

，不過實在太快又係影唔到~

成個show個半鐘，幾乎無冷場，d雜技同舞台效果真係幾精彩，門票有貴有平，人一世物一世有機會去開澳門不妨去睇下，不過都公演左好耐，唔知仲做到幾時~

散場好多人，走去劇院旁邊嘅紀念品店逛下避下d人潮先，不過都無咩啱買，而且d野幾貴~

之後就去搵地方食dinner，一開始我地就決定兩日都響酒店範圍hea唔打算出去外面逛，所以諗住響酒店食.....不過事前無做過research，是但求其搵間算，水舞間劇院附近有間Beijing Kitchen，以前聽人講過有即叫即烤嘅北京烤鴨，都好想試下，點知去到無位，最快估計要十點，有無搞錯?!

咁改搵第二間啦，我地今個trip嘅宗旨係無野一定要食無咩一定要睇，一切隨緣.....點知新濠天地入面d食店間間都無位，七點都未到喎，原來間間都要先訂位，有無咁誇張呀，呢度d食店又唔平都咁full，真係過份

.....終於見到有間日本料理係有位啦，睇下門外嘅menu都好貴喎，不過見到promote有個二人set 八百幾，是但啦，唔想再去第二度搵過.....老爺話既然個trip係慶祝紀念日，食貴d唔緊要啦~

點知入到去坐低先發覺原來個set係平時先有，weekend係唔供應嘅....頂!!

咁坐低左就費事又起身走啦，唯有散叫，盡叫d平啦......

既來之則安之....先黎個sake嘆下先.....cheers!!

雜錦魚生飯定食.....

Sorry, 隻手又抽筋...

d魚生都好新鮮~

牛肉火鍋.....個鍋都好足料，湯底好甜~

d牛肉好好味呀!

呢個天婦羅最唔抵，得幾舊野要百三!!

呢餐好貴，問題係d野全部都係普通食材無咩特別，不過酒店食都預左唔平，好在之後響賭場執返d當幫補下

食飽飽我地就出去外面逛下.....夜晚 d buildings 著晒燈好靚呀!!

Full moon, good呀

好鍾意呢張個feel

威尼斯人酒店

Galaxy

響外邊影左一陣相，夜晚天氣仍然好熱，不過都有小小風，食飽散下步都ok，之後我地又返入去酒店，差不多九點，我地又去睇第二個show....

呢個龍騰show係響Crown嗰邊嘅天幕劇院表演，入場費要$30，不過新濠天地住客有免費門票，唔駛錢就梗係去睇啦.....呢個show嘅放映時間都好密，日間12:00至18:00半個鐘一場，夜晚一個鐘一場~

睇show前先去個toilet，老爺去完就企響下面呢粒龍珠旁邊等我.....呢張相係第二日補影，當時人頭湧湧......

去完toilet出黎，老爺笑笑口同我講話剛剛響度等我時，有個好sexy嘅姐姐仔走黎同佢兜搭搵生意.....唔係掛，全場至索嗰個已經響佢身邊，仲有人咁唔識相敢埋身?

哈哈....同埋乜原來老爺個樣似嫖客咩??

笑完一輪就排隊入場嘞，入場前有專人同你影相，又係唔鍾意可以唔買嗰d啦.....呢個show嘅表演時間只係十分鐘左右，觀眾透過圓頂形影幕，可以360度欣賞高科技影像，據講呢個天幕用左超過29,000顆劇院式LED燈組成，能夠幻化出唔同影像....

一開始入場時唔知邊個係最佳位置，個個都係同樣心理走到最中間，但其實愈中間愈睇得辛苦.....

圓形天幕好似我地個太空館咁，不過無位坐，個個企響度擔高個頭，好快條頸已經好攰.....

故事主要係講四大龍王穿梭冰川、深海、太陽系等唔同地方黎護送龍珠....

龍呀!!

d影像又係轉得好快，仲要係360度轉來轉去，好難先影到一兩張唔震，不過呢個show可以影video，去片...

最後一幕成個天幕好多金幣跌落黎，都幾嘩嘩聲嫁~

散場後經過有間cafe，入去買定件cake做宵夜先~

之後就去賭場博殺一下啦~

幾年無黎澳門，原來而家minimum嘅賭注都要三舊，好金呀，而且$300嘅賭台好少，不過我地都係至在參與下啫....第一時間玩百家樂先，因為酒店有$100 free coupon for 玩百家樂，之後就玩下大細.....玩左一個鐘羸左八舊水

，我地就決定收手，賺小小已經好開心，再繼續落去一定輸返晒.......

現場所見好多人都真係好爛賭，一坐低可以響度消磨一晚唔走，有d一個人賭兩枱，呢邊落完注又過隔離枱落，好似輸唔切咁，兩邊走黎走去好忙....有好多女人約埋三五成群一齊去賭，邊度旺場即刻打電話call姊妹過檔，我地有d野唔明問佢地，佢地答得好熟練，師奶力量真係不可忽視~

賭博真係好易令人沉迷，尤其係當某張枱有人當旺時，d人好似貓聞到腥咁好快速即刻好多人湧埋黎跟住買....我地呢d純粹黎體驗下人生百態嘅都唔會悶囉，當賭下運氣，最緊要係適可而止.....響度除左有免費蒸餾水，仲不斷有奶茶咖啡汽水任飲，總之務求令你舒舒服服.....之後又有大抽獎，我地當然唔會蝕底，結果只係抽到個鎖匙叩，不過都好開心，正所謂又飲又拎又羸錢，夫復何求，賺到笑啦!!