2011年8月澳門好hea 2日 - Day 1 (Part 2)

返到去外港碼頭，我地就去搭酒店shuttle bus....澳門d酒店都有提供free shuttle bus響碼頭接送客人，就算唔係住客都可以搭，因為佢地最想方便嘅其實係d睹客囉~

有好多唔同酒店嘅靚靚女職員企響碼頭門口派自己酒店嘅leaflet.....老爺響度望女仔

，我就對佢地派嗰d扇有興趣多d，真係熱到嘔電......

或者仲係比較早，唔係太多人搭shuttle bus，望落去好似去威尼斯人酒店嘅人多d，去新濠天地係一個人都無，最後得我地兩個包晒成架大巴.....

經友誼大橋去路氹......

車行左大約十分鐘就到.....新濠天地 (City of Dreams) 係由三間酒店組成︰Grand Hyatt、Hard Rock同Crown，三間酒店由佈滿shopping mall 嘅新濠大道同賭場串連.....落左車，一上到地面就見到好大一個高清屏幕嘅大魚缸.......

真係好似置身水族館咁，有美人魚響度游來游去.......

可以睇下片感受下.....

新濠大道，全部都係名牌店舖，即係一般香港人唔會去逛嘅shops.....我嘅意思係話就算要逛都唔需要山長水遠過到大海先逛啦，呢d店都係啱有錢內地客多d囉....

所以好明顯人流唔係太多，同威尼斯人或者Galaxy嗰邊爭好遠~

Grand Hyatt響09年尾先開張，book佢都係貪佢比較新淨.....一入到lobby目光就被呢個裝置吸引......

酒店大堂個樓底真係好高，有兩個水簾同水滴造型嘅吊飾響中間.....

仲有一個大型金屬流水地球儀.....呢舊野幾過癮，真係不斷有水流嫁~

呢個Grand Hyatt有兩棟buildings，左邊君悅樓，右邊嘉賓軒，中間呢個係concierge，比較奇怪係見唔到reception counter，原來係匿埋響兩邊，好蚊型，一d都唔似五星級酒店嘅格局，我連相都無諗過影~

而家先一點鬆d，做左pre-check-in，叫我地三點先返黎攞房，放低件行李，我地就先去醫肚.....呢間酒店d職員嘅service都幾好，見我地稍為有小小迷惘都會好主動問我地需唔需要幫手，幫我地keep行李個bell boy仲主動話我地知邊度有食店，good service!!

Grand Hyatt d食店都比較貴，食個lunch啫，唔駛咁豪嘅，終於我地行左去Crown嗰邊嘅food court食通天~~

環境唔錯嫁，有落地窗望對面嘅威尼斯人酒店....不過可以揀嘅野食唔多

雖然係food court，但呢餐都唔係特別平，差不多兩舊水呀!!

同埋我呢碗牛肉湯烏冬比較油囉~

一路食一路望住外面靚景，好寫意呀!!

食完都仲有成粒鐘，老爺話不如行過去對面威尼斯人睇下咩環境,,,,,

外面好曬好熱呀!!

新濠天地其中一間酒店Crown~

另一間Hard Rock Hotel

威尼斯人酒店個環境好靚，好有渡假feel~

成個渡假村嘅建築群都好古典~

好似去左水鄉Venice呀!

呢條長廊好典雅~

室內好金碧輝煌.....

其實成個威尼斯人酒店都好金!!

威尼斯人個賭場好多人好熱鬧，同埋好似好自出自入d guard唔點理你，新濠天地嗰邊入去賭場至少要過個電子板~

參觀完個賭場當然要去睇下條運河......

有人坐gondola，個船夫仲響度唱歌，唔知係咪唱意大利文呢.....坐呢個要成一舊水一位，好貴啫，仲貴過真係響Venice坐! 睇下人地坐就算啦~

聖馬可廣場，都幾似喎，不過當然細好多~

呢個鐘應該真係work嘅.....

運河廣場旁邊d shops比較大眾化，我覺得啱行d囉，同埋做緊sale，shop得過

響威尼斯人逛左一陣，差不多三點我地就行返去Grand Hyatt.....

Check in 嗰邊嘅lift lobby放左好多跳舞蘭，好靚呀!!

之前做左pre-check-in，好快搞掂有key card.....我地住 room 2370

房間都ok好新淨.....梳化都幾大，唔怪得咁多人屈蛇，真係住多個人都得~

個衣帽間要咁大做咩呢?

連褽衫板都有....

今次去澳門發覺好多蒸餾水攞，單係酒店房已經有4枝，之後響每間賭場都有免費水任攞，真係攞到你怕~

新濠天地d免費水全部都係Bonaqua，連賭場任攞嗰d都係，呢樣掂過Galaxy

Wow~ d茶包竟然係T2!! 仲有好多款揀，正呀

咖啡雖然流d，不過都有俾埋低因，都叫做照顧周到啦~

好多電插座，想charge咩電都得....房有兩部電話，下面呢個好high tech，唔識用.....最開心係酒店內所有範圍都有free wifi，yeah!!

Washroom有兩個sink盆，正! 不過張梳妝台同塊鏡個高度唔係好啱，坐響張凳唔係好望到塊鏡....我知我係比較嬌小，但呢d utility唔係應該要user friendly咩?

supplies都好齊全~

個bathroom係可以see through，不過透明落地玻璃可以落簾，唔鍾意俾room mate睇你美人出浴都無問題~

落地大窗外面個view無咩睇，離遠望到海同機場.....

側面係好大個地盤，好似係Sheraton起緊酒店，所以唔落簾浸浴都無問題，不過遲d酒店起好晒就唔可以浸得咁自在lu~

趁有d時間，我地就去享用一下酒店嘅設施先.....酒店三樓有個露天恒溫大泳池，另外仲有一個24小時開放嘅fitness centre，有時間可以去做下gym~

(Photo extracted from Hotel website)

炎炎夏日，我地當然去游下水先.....個泳池有成40米長，好正，雖然日光好曬，但浸泡響微溫嘅池水中，真係好舒服呀!!

(Photo extracted from Hotel website)

游完水，上返房一邊浸下泡泡浴一邊欣賞下外面嘅無敵地盤風景，真係好寫意好relax，如果唔駛做成日可以有咁好享受就好啦!!

之後響房攤抖一陣，hea下hea下又係時候夠鐘去睇水舞間嘞.....

(...待續)