2011年2月北海道道東道北12日 - 只可遠觀嘅古丹溫泉...

2月22日 - DAY 4 (PART 8)
Pension Atreyu > 古丹溫泉

上一回講到響Pension settled down後，我地就出發去屈斜路湖畔嘅古丹溫泉.....

之前同Pension女主人商量個taxi sightseeing trip時，我地曾經提出想加埋古丹溫泉呢個景點，不過唔知點解女主人一開始已經同我地suggest呢個景點唔需要include落個taxi sightseeing trip，佢話完成左個sightseeing trip返到去Pension時，之後佢地可以安排車我地去古丹溫泉，等我地浸完個露天風呂佢地再黎接我地返Pension，接送費用全免.....咁唔駛錢我地當然no problem啦，需知道如果加埋落個taxi sightseeing trip，即係遊覽嘅時間就長左，個fee就又貴d啦~~

古丹溫泉係一個公共免費嘅露天溫泉，不過可以著泳衣入浴，所以我地出發前先著定晒泳衣諗住去到一除晒d衫就可以跳入溫泉.....響Pension攞定兩條毛巾就閃嘞，一出到去就見到男主人已經將架車駛埋我地間木屋仔前面，好體貼呀!

由Pension去古丹溫泉好近，只係幾分鐘車程，落左車男主人帶我地行過一條小路，去到湖邊就見到古丹溫泉啦!!

同男主人約定左時間50分鐘之後會黎接我地返Pension，佢就離開嘞....而我地亦都迫不及待走入去溫泉池望望......

嘩!! 真係好靚呀!! 用岩石堆砌嘅溫泉池好有野外feel，好多天鵝響對開湖邊，最重要係一個人都無，yeah!! 我地兩個人鍾意點玩都得呀

呢個露天風呂話就話係分男女，入口處左邊係女湯.....

右邊係男湯....

但其實溫泉池中間只係有塊大石係咁意阻隔住，基本上成個池係完全睇晒，同混浴無分別，好在可以著泳衣~

男女兩邊都有更衣室....

兩邊亦各自有個好騎呢嘅locker，連門都無，其實係一個木架，就咁放響更衣室外面.....

叫人將d貴重物品就咁放響度，如果呢度唔係日本，大家夠唔夠膽放?

影左一陣相，老爺話唔好影住啦，趁無人拿拿聲除衫去浸左先，點知話口未完有幾個日本人殺到黎....唉~

雖然話我地著定左泳衣，就算有人都唔係好驚，不過可以揀嘅話我地都唔想響溫泉池一路浸一路俾路人甲乙丙丁當展品咁欣賞，早兩年響東北乳頭溫泉鶴之湯嘅痛苦經歷有人今生今世都已經沒齒難忘，對於可以隨意俾人參觀嘅露天混浴風呂真係有種陰影 (我指老爺，哈哈!!)

咁唯有周圍影下相等D人散左先浸啦.....其實呢度d風景真係好正!

溫泉池對開嘅湖邊有好多天鵝......

d人幾時走呀? 我好想快d跳入去個池近距離同d天鵝打招呼呀!!

有指示叫人入浴前唔好飲酒~

Hea左一陣，路人甲乙丙丁終於離開，我地就拿拿聲各自走入更衣室除鞋除衫.....由更衣室行去個溫泉池只係幾步路，不過除左鞋襪行嗰d沙石地對腳好難頂呀!!

唔理咁多，快步跳入個池中.....唔知係咪野外露天嘅關係，d溫泉水唔算好熱.....不過唔緊要啦，咁難得四野無人，響咁靚嘅屈斜路湖邊泡湯，仲有靚靚嘅白天鵝作伴，一生人唔係有好多次呢種機會啫，我地要盡情享受享受呀!!

呢個古丹溫泉嘅位置因為同屈斜路湖面一樣高，響度泡湯就好似響個湖泡湯咁，即係好似同成群天鵝一齊浸浴，個感覺好過癮，哈哈~~

同d天鵝 say 個 hi 先....hello

浸浴不忘拍玉照，當然要影返d至正嘅泳衣出浴照啦，正當我響度搔手弄姿擺緊甫士之際，老爺忽然響度大叫，原來佢見到我個大脾黐左d青苔......

OMG!! 佢唔講猶自可，佢一講先發覺我地兩個人周身都有好多青苔，好核突呀!! 再望一下個溫泉，原來成個池入面都有好多一舊舊好深色嘅青苔，攞命!! 嚇到我地即刻彈起要閃人.....

雖然一早知道呢個古丹溫泉係免費野外公共溫泉，都預左唔會有咩設施同保養，但都無諗過係無人打理到咁地步.....嗱，再一次証明呢個世界好多靚野都係只可遠觀 (而家諗返起仲仍然打冷震ing)

雖然個溫泉好核突，不過話晒都叫做浸過下，都算成功完成左一個心願.....著返晒衫，呢度無得沖身嫁，唯有搵tissue毛巾抹走d核突野.....之後我地就四周不斷咁影相......

 

大部份嘅主角當然係天鵝啦.....

老爺好鍾意影佢地飲水個樣~~

想自殺定係練緊閉氣功?

佢條頸.....咁攣法，講真有d恐怖囉.....

有兩隻唔覺唔覺靜俏俏咁離群.....

比翼雙飛

終於成功私奔飛走左

原來響天鵝群入面有一隻昅到佢地私奔......

d天鵝嘅叫聲其實真係幾嘈幾刺耳，不過遠望過去落日之下鋪左白雪嘅湖面，響四周一片寂靜中一遍又一遍鴿鴿聲，當你身處其中你又會覺得好有大自然feel，一d都唔覺得煩厭~

由湖邊望返過去更衣室.....

湖嘅另一邊原來有d民居，佢地就好啦，日日都可以對住咁靚嘅風景....不過講真俾你日日咁睇，做慣城市人或者又會覺得悶......

日落啦!!

原來唔知幾時開始已經有人響度擺定架撐影相~

我地都影到唔停手，因為個景真係好靚!!

大家唔好怪我post咁多相，因為無咩幾可睇到咁嘅風景，唔知仲有無機會再黎嘛~

響度玩左差不多一個鐘，Pension男主人準時黎接我地....古丹溫泉嘅景色真係好靚，今日一整日嘅景點都總算好滿意好順利咁完成晒，響暮色蒼茫之下我地心滿意足咁同古丹溫泉講bye-bye然後就離開返Pension lu

Bye-bye 古丹溫泉!!

(...待續)