2012年2月巴黎倫敦11日 - 出發前二三事

今次呢個歐洲 trip，其實諗左好耐，舊年年頭去完北海道返黎無耐就發生左311事件，當時個個都話日本未來幾年都唔可以再去，雖然一方面好傷感同沮喪，但另一方面終日發夢都掛住plan去旅行嘅我，少不免就會諗下來年唔去日本可以去邊.....歐洲係一個我地好小會諗到嘅地方，消費高、機程長、又唔可以去太短時間，最重要係每次第一時間就好自然會諗去日本......雖然N年前我初初出黎做野時曾經揹過背囊去歐洲闖盪過兩次，但同老爺就未試過兩人一齊踏足過，咁既然至愛嘅日本無得去不如就改向歐洲出發啦......當然後來個個都去返晒日本，我地舊年十月都去左九州、過年又去埋大阪同和歌山啦，但去歐洲玩呢個念頭基本上係一發不可收拾，終於響去完九州返黎後老爺就拍板話今年個大旅行一於去歐洲嘞~

歐洲咁多個國家我最鍾意就係法國，點解? 既浪漫又藝術，仲可以shopping嘛，所以一開始就決定要去巴黎，原本諗住去9日，打算他他條條去埋d近郊玩，不過後來老爺失驚無神話想去埋倫敦睇下個賊竇，所以就加多兩日，當然，其實得11日要玩盡巴黎同倫敦係好唔夠，不過我已經無乜假淨所以都無辦法.....決定左日數首先要做嘅當然係book機票先啦，本來我想揀CX，諗住要坐成十幾粒鐘，搵返d同聲同氣嘅airline好d嘛，不過相比下因為Air France有夜機去，時間好用d，最後我地都係揀左Air France....同去日本一樣我地都係同agent book 酒店+機票package，諗住咁樣會經濟d，不過之後發覺其實都唔一定，因為好多酒店會做promotion，個價錢同正價或者同agent quote嘅價錢會爭好多，如果有時間慢慢check建議大家直接同酒店做reservation囉.....

平時我地去日本search酒店，好多時都會搵jalan或樂天，今次改去歐洲發覺有個web site好好用，就係Tripadvisor，個用法基本上同jalan差不多，全世界嘅酒店都包括在內，同地區嘅酒店亦有分ranking，跟jalan一樣都有個interactive map可以search同一區有咩酒店，甚至可以睇埋附近有咩食店同 "things to do"，set左check in 同 check out日期佢會list out好多個hotel booking web site，好似booking.com、venere.com，好多選擇，仲有個功能係可以將你曾經search過嘅酒店做比較然後幫你分埋排名，方便大家揀選，不過最最最正嘅當然係呢個web site係英文啦，之前睇jalan都覺得好方便，但我地完全唔曉日文好多時都唔係明得晒佢講乜，呢個Tripadvisor提供多國語言，連大部份用家d comment都睇得明嘛!!

英法d酒店如果唔係太差嘅話一般黎講d價錢都幾貴，記得N年前去流浪時，當時都未流行上網search資料，住宿基本上都係睇地圖walk-in，嗰時為左慳錢住嘅都係比較差嘅蚊型旅館，我仲記得響巴黎住嗰間酒店個房係響閣樓，房內無TV、toilet同bathroom，夜晚去樓梯口間public bathroom 沖涼周不時聽到外面d鬼佬飲醉晒響度大叫大笑，好驚囉.....而家叫做比較afford 得起，再加上我地都唔後生唔想住得太委屈，所以今次揀嘅酒店唔想太差啦，agent provide 嘅 hotel list由二至四星，不過數埋都唔夠十間，我地最初都係諗住揀三星，除左考慮價錢最主要係個location近地鐵，不過搞左一輪改過兩次最後agent都係覆話full 晒，咁我地唯有揀d四星啦，最終我地響巴黎住嘅酒店係響知名嘅香榭麗舍大道旁邊嘅 Hotel California.....從來無諗過自己會有一日可以住響香榭麗舍大道囉，由酒店行出去兩分鐘唔駛就見到 LV 嘞.....貴係貴左dd，不過又唔算太過份囉，所以後來有幾日要自己book酒店 (package包四日三夜酒店) 我地都係book返呢間，一來唔駛將d行李搬來搬去，自己上網做booking又可以揀special promotion，唔駛200e一晚，OK啦.....不過講到正，我地響倫敦book嗰間 Hotel Megaro 就仲正，大家唔好以為係咩豪華酒店，我所講嘅 "正" 係指房間闊落乾淨、設備齊全，又唔需要prepaid，酒店旁邊就係麥當當同Burger King，交通超方便，一分鐘唔駛就到地鐵站，兩分鐘就到火車站，仲有最正嘅係個free wi-fi 好掂呀，雖然巴黎嗰間都有free wi-fi，不過就成日斷線，速度又慢，但倫敦呢間就好好多，晚晚都可以同細妹whatsapp囉，連長途電話都慳返唔駛打呀!!

搞掂晒機票同酒店，跟住落黎就係plan行程嘞，不過向來懶散嘅我拖下拖下都搞到成一月先的起心肝去搞.....N年無去好多景點都印象模糊，況且老爺未去過，基本上所有名勝都要去囉，所以今次都搵左唔少嘅旅遊書，以下呢幾本有d係自己買，有d係問人借，有d係以前響雜誌換購......


上面第一行左手面第二本同第二行中間兩本係香港出版，下一站系列大家都應該好熟，上面嗰本係早兩年U magazine換購，d資料算係比較update，同埋比較適合返香港人嘅口味....台灣出版嗰d唔係唔好，其實介紹得好詳盡，不過有時過於詳盡囉，第一行右手邊第二本「自遊巴黎」真係超詳細，直情好似當你未出過門又或係小朋友咁，連出左地鐵站行左行右過幾條街同邊個街口幾盞紅綠燈都講得一清二楚，仲要影埋相俾大家做記認!! 咁詳細唔係唔好，不過我覺得都唔駛下下講到咁清楚嘅，有時睇住地圖搵路，偶然行錯路撞下板都係旅遊嘅一種樂趣囉~

下面呢幾本係倫敦嘅....


右下角嗰本「自遊倫敦」同上面嘅「自遊巴黎」係同一個系列，撇開佢嗰種幾乎當人係白痴嘅詳細程度，其實兩本都唔錯嫁，同樣都有十多條路線suggest俾大家，每個景點嘅歷史背景同值得注意嘅地方都有介紹，仲建議埋每個地方大約停留嘅時間，d location map亦都標示得好清楚，個人覺得都ok唔錯啦....而右上角第一本係JTB出版，內容都好豐富，而且比自遊系列輕巧~

除左睇旅遊書，當然唔少得上網搵料，而家資訊發達真係好方便，好似法國旅遊局、HK France Guide、Paris Museum Pass、英國旅遊局等等，都係一d 好有用嘅觀光資訊網頁，不過當然啦，都係嗰句，資訊太多，時間太小，如果自己積極d 唔係咁懶懶行早d 睇資料個trip就可以plan得好d囉......不過我知道老爺唔會怪我嘅~

定左大約嘅行程路線，跟手就要book火車票.....平時去日本，只需要響網上check 好班次，臨出發前買定張JR Pass，去到日本再出車票reserve指定席就可以，今次去英法就有d唔同，基本上歐洲有歐洲火車證 (Eurail Pass) 同單國火車證 (Regional Pass)，前者可以響指定日期內無限次乘坐二十多個國家嘅國鐵 (唔包括英國)，其中仲有一d 彈性通票 (Eurail Flexipass) 可於兩個月內使用10或15日，同自選火車證 (Eurail Select Pass)，可於兩個月內任選指定日數同自定其中三至五個接壤嘅國家.....而單國火車證就係各國自己本土嘅火車證，好似法國火車證，乘客可於一個月有效期內選擇任何三至九日無限次乘坐包括TGV在內嘅法國國鐵.....遊客可以根據自己嘅行程揀選最適合同慳錢嘅通票......不過今次我地基本上只係focus 響巴黎市同倫敦市，當中只會搭往來Mont St Michel 嘅法國國鐵 (SNCF)，以及往來巴黎同倫敦嘅Euro Star，所以唔需要買火車證，反而要預早響網上book定火車票~~

首先要第一時間book Euro Star，因為d價錢好浮動，唔同season有唔同嘅價錢，亦有 fully / semi- / non-flexible 幾種tickets 揀，當然fully flexible就最貴啦因為reserve左之後可以更改，不過無論揀邊種ticket都係愈早買就愈平，愈近出發日期當然就愈貴，even同一日但唔同出發時間個價錢都可以爭好遠，而且仲會有d "Today's lowest fare"，所以confirm左出發日期就好拿拿聲上網 keep checking個價錢.....我雖然lazy，但因為關乎到$$，所以都有hea住check，最後我地來回兩程車都係以44e一位成交......Euro Star做on-line booking都好方便，仲可以揀埋車廂座位，唯一比較差嘅係個coach seating plan睇唔到車行嘅方向，因為有一半係對頭位.....揀好晒俾埋credit card找數之後就可以print埋張e-ticket，真係快捷又妥當!!

至於reserve法國國鐵嘅TGV相對就麻煩些少，個offical web site Voyages-SNCF 除左法文亦有英文選擇，但係當你要做reservation 時佢需要你select所在地，如果揀選香港個web site就會自動導向 Rail Europe 個網頁，係就係英文好易睇，但只要同Voyages-SNCF 對比一下就會發覺 Rail Europe 個價錢貴好多，例如5月1日由Paris 早上8:09 出發去Rennes，Voyages-SNCF quote 嘅價錢係33e一位，但 Rail Europe 就要HK$426，貴左差不多一舊水一位，食水好深囉，所以我地直接響Voyages-SNCF做booking，雖然係法文，但其實某d字眼係可以推敲得到，好似reserver un billet即係reserve ticket、2e Classe即係2nd class等，加埋網上翻譯功能，再估下試下，哈哈，又俾我地成功做到booking囉......Voyages-SNCF 做booking個step其實同一般網上購票差不多，都係check 班次、日期同地點等，同Euro Star一樣，同一日即使唔同出發時間亦係唔同價錢，所以好多時為左要平d就要將個時間推前或者推後，不過因為我地仲要接駁巴士，個時間都就得幾辛苦，最後兩個人來回合共88e，我覺得都算好對得住自己啦.....另外要注意嘅係響網上做booking係要以credit card 先俾錢，Euro Star就即時可以print 張e-ticket，但Voyages-SNCF 就需要去當地以做booking 時碌嘅credit card 取票，所以要記得帶返同一張card 呀~

搞掂晒d booking 後就要預備一d平時去日本唔需要考慮嘅額外物品......之前都已經成日聽人講話巴黎d治安好差，尤其夜晚搭地鐵唔係咁安全，所以plan行程時都儘量唔會太夜搭地鐵返酒店.....平時去日本基本上唔需要有咩防盜意識，今次去歐洲就要預備定貼身passport袋，用黎放passport、身份證同將d cash 分散放.....未去之前一路都好擔心，見好多人響forum 講成日俾人偷野，不過去完返黎又覺得未至於咁恐怖囉，係搭地鐵時成日覺得d黑人眼金金咁昅住我地......不過或者我地比較好彩，我只係試過響聖心堂附近俾個黑人起勢咁拉住我要我買野，夜晚響香樹麗舍大道成日都見到有d police揸住槍響度巡，其實只要自己小心d、行街時警覺d個人覺得唔係太大問題囉~

下面張相右手面黑白兩個貼身袋係之前響日本買定，好薄身下，仲有幾格暗袋可以放credit card同cash，不過我成日好驚條帶會斷 (其實無咁易斷，係我自己搵野黎驚)....紫bear隔離嗰個係貼身腰bag，條腰帶係威也好穩陣，同埋放響腰無掛響胸前咁 "鞏"，不過放響腰就無咁易攞啦.....

除左貼身袋，仲有吹氣枕頭響機上瞓教用，同護耳.....平時冬天去日本零下十度我都唔會帶護耳，就係今次有帶，唔單止護耳，連保暖衣物都帶多左，因為臨出發前幾日歐洲有暴風雪.....真係黑仔，往時英、法二月份d天氣都係3、4度咁上下，最初諗住連羽絨都唔駛帶，點知臨出發前一個星期無啦啦黎個暴風雪橫掃整個歐洲大陸，連倫敦都受影響，唉，你話我地幾愁!!......咁都未算，最攞膽係法航又玩罷工，我地10號晚出發，忽然響4號收到通知話6號至9號出發嘅航班大部份會取消，簡直晴天霹靂，雖然話罷工去到9號，但邊個擔保話個罷工期唔會延長? 出發前嗰幾日，我地簡直係響極度忐忑受盡煎熬嘅狀態下渡過，每日唔係要check天氣就要check航班嘅消息，我本身個行程都未detail 好其實已經好緊急好愁，暴風雪令到好多on-line booking又唔敢做.....大家可以想像我地嘅心情就好似坐過山車咁，睇新聞呢頭無特別提法航工會有進一步壞消息，諗住可以鬆一口氣，嗰頭又見到d暴風雪愈吹愈勁，最初只係話橫掃歐洲中部，對法國唔係咁大影響，以為可以安心d，點知愈吹愈勁，之後吹到去英國，d雪深到交通癱瘓，倫敦Heathrow機場甚至要關閉，跟住終於殺到去巴黎，連聖母院、凡爾賽宮都close，嗰幾日真係好驚好慘囉.....

從來未試過plan左嘅行程響臨出發嗰日都仲改緊，因為我地book 左個2 days Paris Mueseum Pass，原先plan 好去到第一、二日就要用，第一日去羅浮宮，第二日就去凡爾賽宮，但係臨走嗰刻見到凡爾賽宮個官方網頁上出左個通知，話因為大風雪關係個御花園要close(!).....大佬，去凡爾賽宮唔去埋個御花園咁去黎做乜? 咁啱又見到個web site 剛剛出左個二人promotion plan只係18e，於是靈機一動決定改改個行程次序，將凡爾賽宮推遲一星期希望到時個暴風雪已經完結，同時又要check下其他景點同d museums 睇下個 Museum Pass 包唔包同埋計計會唔會蝕，計掂數就要即刻 on-line book 埋個凡爾賽宮二人package.....呢d野全部都係臨出門口前半粒鐘搞掂晒，真係忍唔住要自己讚下自己可以咁臨危不亂同快手呀，哈哈~~

拖下拖下hea下hea下終於「排除萬難」叫做勉勉強強搞掂晒個行程，出發嗰日，仍然好驚法航工會繼續玩野，一朝早就上法航個網頁check航班，早上嗰班如期開出，到下午見個網頁話夜晚嗰班都on schedule，總算放下心頭大石，至於個暴風雪就無咩特別消息，無計，聽天由命啦，只要順利去到巴黎入到境就OK嘞.....唔理咁多，出發啦!! Yeah~

Paris, we are coming)))))