Ocean Park Again - Part A

上星期我地去左Ocean Park玩，對上一次去係09年7月，其實去完都唔算係好耐，但因為有兩張免費門票好快夠期，所以響不足兩年嘅時間下我地又再次探訪~


上次去好多地方都做緊擴建，今次去大部份應該已搞掂，好似個入口，舊時響地下，而家要搭電梯上去平台.......


我地十點幾去到，已經有好多國內兄弟姊妹堆左響入口，不過又未算超級多人啦~


個大門口好似大左好多，好多巨大海洋生物公仔俾人影相，不過d造型好古怪~

一入去就係一個頗大嘅人工湖，而家每晚湖上都有音樂show~


順路諗住去坐升空氣球，條人龍望落去好似唔係好長，不過工作人員話要等一個鐘，我地排左五分鐘都係決定放棄，一來上次已經玩過，而且都只係升上半空轉幾個圈，無咩特別，不如早d去玩第二樣野~


於是我地就去睇「海洋奇觀」，即係以前嘅海洋館，我好似記得以前係響另一邊山，而家搬左過嚟?? Anyway, 加建後大左好多.......


d魚都幾靚~




呢個圓柱形大魚缸有好多魚仔，咁啱餵食緊，d魚跟住部機不斷轉，一大群多到有d恐怖


呢個係新加建嘅，由下面望返上去......不過響日本同新加坡都睇過好多次呢類設計，唔算太大新鮮感~




呢個應該係呢個館最囑目之處，好大個魚缸!!

究竟有幾大? 可以睇下片感受下~

原來個魚缸塊玻璃屏幕有68cm咁厚嫁!!


出口當然有賣物店，d毛公仔真係好鬼可愛，好想買呀......不過屋企d公仔已經多到要pack晒箱不見天日，而且買嚟都唔知為乜.......所以我今次好忍得手，一樣野都無買


最新款嘅jelly baby!.....我承認我對住呢堆野望左好耐，攞起一個又放低一個，不過最後都無買，我覺得都係以前嗰個得意d~


之後就係指定動作去睇安安同佳佳.......


有無搞錯! 睇熊貓都要排長龍!




原來而家改左叫四川珍奇館~


可愛嘅佳佳~




安安成日走來走去~


館內多左d金絲猴，走上走落，好鬼精伶~


毛公仔金絲猴虎虎，好得意呀~


連館外面嘅公仔都加多左虎虎喎.......

09年去時係得隻熊貓咋~

歡迎大家慷慨解囊，為左方便大家，可以用八達通捐獻，真係設想周到


跟手再行過另一邊亞洲動物天地......

重點當然係熊貓山莊嘅盈盈樂樂~

唔知係盈盈定樂樂......不斷響地上打滾，好cute


另外一隻都唔弱，攬住個罐擺cutie pose俾大家影相~

 

跟住仲走埋嚟俾大家近距離睇佢食竹葉~

有片睇.....真係好鬼得意，不過d人嘈到死，唔知佢地聽唔聽到~

其實場內有圖文教大家點分辨盈盈同樂樂，不過睇完我都係依然唔識分


呢隻唔係koala，係小熊貓~


 

跟住快速掃埋隔離嘅金魚寶殿......






有靚靚嘅蓮花~


行行下忽然見到有隻孔雀開屏......咦，係咪有好兆頭呢?


再遠d仲有好大part兒童樂園之類，我地唔打算去.......之後我地就去搭海洋列車.....


車站月台


月台幕門


列車即將到站.......個車頭方形咁K怪嘅~


車程只係幾分鐘，既然係穿過個山，外面係漆黑一片無野睇，唔同搭纜車可以欣賞下風景~


好快就到左高峰樂園~


一出車站就係動感天地.....呢部份機動遊戲係新擴建嫁~




呢個「翻天覆地」就咁離遠睇都覺得恐怖，好多尖叫聲傳過嚟!


老爺一向畏高，嚟之前講明唔再玩高危嘅機動遊戲.....不過現場睇呢個「超級旋風」又好似幾OK咁，終於老爺俾我老點左去玩.......


其實只係升上去半空不斷轉圈，速度唔算好快，我覺得有d 悶囉，不過老爺就好驚，佢話對腳凌空吊吊fing個感覺好得人驚


呢個動感天地除左有機動遊戲，仲有好多攤位好似掟飛驃、拋波等等俾人玩~


玩完第一個機動遊戲開始落雨，見都已經一點鐘，於是去搵野食先......


周圍都係人，好在咁啱有枱人走......


三樣野$145.....個吞拿魚螺絲粉仲要唔好食



食食下忽然見到隔離枱有個著住超短熱褲嘅女仔響度搽太陽油......係呀，大家無睇錯我亦無寫錯，係搽緊太陽油，咁個太陽咁猛烈當然要做好防曬.....不過我想話呢d野係咪應該響屋企或者走入去toilet做好d呢? 呢位阿姐本來坐響度棟高隻腳搽已經好不雅，搽搽下佢仲要企起身面向大眾揚起雙腳摀低身起勢咁捽，由小腿捽到上大腿，完全唔介意食店入面d食客嘅眼光......Well, 你唔介意俾人睇啫但係即使唔駛錢我都未必想睇o架，食緊野嫁!! 真係諗起都反胃!! 其實如果咁怕曬黑就唔好著條無乜布嘅褲通街走啦唔該


食完繼續玩.....碰碰車好好玩呀，俾人撞到黐肺.....哈哈，唔撞唔好玩嫁!!


之後見到呢個叫「雷霆節拍」......好刺激呀，我地即刻去排隊玩~

好好玩呀!! 所有人都叫得好淒厲......我都係，不過係因為我坐外邊，d 圈不斷咁勁轉時老爺成個身飛壓過嚟，壓到我好痛呀!!

動感天地仲有最激嘅「動感快車」過山車，唔好話老爺，我一向都唔敢玩過山車......睇見都好驚!


玩完動感天地，繼續行去「熱帶雨林天地」玩激流.......