2012年2月巴黎倫敦11日 - 羅浮宮遊遊盪盪

11 FEVRIER 2012 (DAY 1 - PART 4)


睇完 Mona Lisa，離開好嘈雜嘅6號展覽廳，繼續向其他展館進發........

展覽廳同展覽廳之間好多時都有d 大玻璃窗可以望到外面嘅景色，間唔中會有一、兩張凳放響窗前，每次去到呢d位，老爺第一時間就撲去影外面嘅景色，佢老人家都係鍾意睇建築物多d，而我當然就趁機坐低抖返陣啦.....逛羅浮宮係一種長久戰，我呢d一年都做唔到幾次運動嘅人，一有機會攤抖下就好似執到金咁雀躍~


羅浮宮嘅外牆都有好多雕塑......

其實整個羅浮宮建築郡已經係一件藝術品~


金字塔入口條隊已經好長喇!



完成左鎮館三寶中嘅兩寶，跟住落嚟應該去搵餘下嘅一寶「維納斯女神」雕像，不過呢個雕像響Ground Floor，我地最初諗住行晒一個level先再去第二個level，所以就決定逛埋level 1 睇下有咩係之前圈左想睇嘅collections先.......

逛羅浮宮成日都要做嘅一個動作就係抬高頭，因為好多時個天花板都有好多裝飾同名畫，好華麗.......

我地呢d過客抬頭望多一陣條頸都攰到唔想望，當時d畫家日日咁抬高住個頭嚟畫都好痛苦喎......


好古典好靚呀!!


長長嘅Grand Gallery，主要擺放13至17世紀嘅意大利paintings，好多都係宗教繪畫，我地唔係太大興趣，好快速咁掃過......

 

呢條長廊.....唔知係咪 Da Vinci Code 入面一開始館長被追殺嘅地方?? 個skylight好似呀!

好多地方其實都做緊維修~

 

快速咁穿越過Grand Gallery，我地去到75至77號展覽廳，呢度有一d比較出名嘅法國 paintings......

呢個 hall 嘅 decorations 幾 detail 幾靚~


有人響度臨摹緊名畫.......

響羅浮宮繪畫，幾型喎，好似要事先同館方申請嫁.......睇下佢畫咩先......

原來係一幅好巨大嘅 Napoleonic history painting (Napoleon Bonaparte Visiting the Plague)......

奇怪，成個展覽廳有咁多出名嘅名畫，呢位仁兄唔知點解要揀一幅關於瘟疫嘅畫嚟畫，咁慘情，有得揀為乜唔揀幅開心d嘅主題嚟畫呀??......不過佢都畫得好似，唔知響度畫左幾耐，個個行過都停低望下同影低佢同佢幅畫，我覺得連佢都變成左一幅畫嘅主角囉~

77號展覽廳當然仲有好多名畫......


好似下面呢一幅「自由領導人民」(Liberty Leading The People)，大家一定要認識下，因為真係好出名，連法國法郎都搵過佢做紙幣背景嫁.....

呢幅畫係一個叫 E. Delacroix 嘅法國浪漫主義畫家所畫，主題係1830年法國嘅七月革命，當時有個廢柴皇帝頒布左一系列反自由法案，搞到d人好不滿，終於個個走出嚟推翻左個皇帝，仲建立埋個君主立憲政制，唔，人民力量不可忽視呢.....呢幅畫就表達左人對自由人權嘅渴望，畫正中嗰個女人就係代表自由嘅女神，佢一手揸槍一手高舉法國國旗，帶領住人民踩過屍體向前邁進....為民主而戰，義無反顧，勇往直前.....

正當我欣賞緊幅畫情不自禁咁熱血青年上身之際，有人好無聊，問點解去搞革命要搞到扯低件衫拋晒成個胸出嚟.......唉，第二樣野又唔見佢咁留意


另一幅浪漫主義嘅名作「梅杜薩之筏」(The Raft of the Medusa).......

呢幅畫嘅背景係一艘叫Medusa嘅軍艦，當年因為有條廢柴船長本來已經被革職，但因為有後台所以又可以復返職  (Well, 點解咁似我公司d 死廢柴? 每日咁多人x又唔見佢地x!!)，咁話明廢柴即係無Q用啦，響佢領導無方之下有次響航行途中終於搞到隻船沉沒左，幾百個船員就好似Titanic 咁只得一半搭到救生艇，其餘嗰一半有色人種就自己造左隻木筏響海上漂流左十幾日，後來無野食d船員就唯有人食人，最後只得十幾人生還.....畫家以生還者響海面上發現第二隻船嗰一剎嘅景象，刻劃左遇難者當時嘅絕望......

畫面色調昏暗而單調，有一種好絕望嘅感覺.....畫面下半部好多死屍呀，人食人，我忍唔住諗起天與地鼓佬佢地食家明......

「薩賓婦女的調停」(The Intervention of the Sabine Women)


話說古羅馬剛成立時搞左個 party，邀請左附近一個叫薩賓族嘅人嚟玩，點知原來羅馬人係出蠱惑，想乘機強搶薩賓族d民女嚟幫佢地傳宗接代 (咁都得?!)，薩賓人當然條氣好唔順但亦好無奈，因為當時羅馬人好勁嘛，於是佢地返鄉下之後就裝備自己，到時機成熟就同羅馬人開戰想話要攞返d女人......呢幅畫就係描繪已經成為人妻嘅薩賓婦女帶住佢地嘅BB走出嚟調停，一邊係薩賓族嘅親人，另一邊就係自己嘅老公，是但邊一方輸左都唔好啦~

薩賓女人張開雙臂阻擋兩邊嘅戰士，白衣飄飄好柔弱嘅感覺，但為左捍衛自己嘅家庭同所愛嘅人，好勇敢呀!!

嗯，有趣嘅係，點解當時d人去打仗都唔著衫褲?? 光禿禿咁樣豪氣d 咩? 小心重要部位成為target喎

 

有人本來好無聊響度十下十下放緊蚊，一見到下面幅畫即刻精神晒，隨即發揮佢嘅三級創意，繪形繪聲咁解構畫中嘅含意，仲好得意咁幫呢幅畫改左個名叫「o趙完鬆」.......天! 究竟我前世做錯左d乜野? 點解今世要同個咁低檔次嘅人一齊???

(如果真係有咁湊巧，閣下係呢幅畫嘅粉絲，又咁湊巧路過呢度，請原諒我地嘅膚淺同粗俗，謝謝!)

下面呢個係拿破崙，我地研究左好耐，佢隻手響度做咩呢?.....Sorry，唔係隻右手，I mean 隻左手，佢老兄好似響度搞緊自己咁呀 (同得老爺一齊，我當然都唔慌會幾有修養，哈哈!!)

跟住呢幅「拿破崙的加冕」主題係1804年12月某日拿玻崙響聖母院宣佈自己成為法國皇帝後，就幫佢嘅皇后Josephine加冕，中間坐響度嗰個就係當時嘅教宗，聽講佢老人家係俾拿破崙強迫走嚟幫佢加冕嫁~


Josephine好靚呀~

呢幅畫個size好大，據講畫中一共有二百幾個人，同埋係真人比例.....d人個個都栩栩如生，好立體呀~

下面呢個裸女係「大宮女」(Une Odalisque).....大家望落去係咪覺得個女人有d K 怪感覺呢? 係呀，畫家係刻意將佢嘅脊柱部份拉長，背部多左三節脊椎骨，佢話咁樣可以表現女性優美嘅線條喎


「戴斯泰官邸的公主肖像」......Well，呢個公主個頭形真係好古怪.......


離開Grand Gallery，跟住去到阿波羅畫廊 (Galerie d'Apollon)，呢度本來有法王時代嘅皇冠同寶石玉器，最重要係成個畫廊都修飾得金碧輝煌，浮誇程度拍得住凡爾賽宮，點知我地去呢一日竟然close左無得入，頂!


無計，唯有響個閘門望入去睇下啦，唔知係咪做緊維修?.....個閘門嘅雕花都好靚!

Level 1 Denon Wing 基本上已經叫做行晒，我地下一個目標係響Richelieu Wing 嘅拿破崙三世套房，不過要去Richelieu Wing 先要通過Sully Wing.....


Sully Wing Level 1 基本上都係古希臘陶瓷同一d古埃及文物.....講真我地嘅興趣唔大，所以都係諗住順路快速咁掃一掃就算~

唔係只係我地對古希臘陶瓷無乜興趣嫁，好多個展覽室都無咩人停留響度慢慢研究，同Mona Lisa Room真係有天淵之別~

個 ceiling 整到咁靚咁細緻，其實幾無聊，講真以前住響度d人有幾多真係會成日抬高頭欣賞呢?

逛完古希臘陶瓷，去到古埃及文物區嘞......

Sully Wing level 1 嘅展覽品並唔係獅身人面像，d 藝術品基本上我地都唔知係乜東東，所以仍然係快速掃過~

呢個雕像好似係法老王，唔知有咩特別? 但好多旅遊書都有介紹......其實佢個樣有d怪囉，當時我地只係覺得d燈光打落去個影幾得意~


呢一座 Seated Scribe 係館方嘅selected item，所以專登睇下，係公元前2500年嘅古埃及文物......佢個樣好兇喎，做書記官要咁兇惡咩? 講真，點睇我都真係唔覺得有乜野咁特別要被選為重點推介，除左佢夠晒年代久遠之外啦

呢三個係真金，而且係實心

我最初以為呢度係墳墓，哈哈......不過其實個實景係幾靚~


館內除左久不久就有d人響度繪畫，好多時都見到有d教師帶住一大班學生響度講解......

法國d學生好幸福呀，可以去羅浮宮field trip! 細細個就可以見到達文西嘅真跡.....睇下d學生有d真係好細個只係得嗰幾歲咁樣，係咪真係明白老師講乜嫁? 唔好話幾歲豆丁，我十幾歲時都仲係成舊飯咁 (其實而家都係)


好宏偉嘅感覺~

雖然話係快速咁行，但地方真係好大，行到成隻狗咁，真係好攰呀!! 最攞命係響Sully Wing行左一大半路，幾經辛苦掃完古埃及文物區，差不多終點在望之際，條路竟然block左做維修!! 仲要唔單只係呢一層係block左，係成棟block晒，想上一層或落一層通過去都唔得 (xyz&^*%&!!).....

攞命! 又要原路行返去Denon Wng 嗰邊先再兜去Richelieu Wing，真係行到好沮喪......

行到返去Denon Wing，老爺就話要改變策略都係唔好去Richelie Wing 嗰邊住，反正 Denon Wing 嘅 Ground Floor 都未逛，費事一陣又要行返過嚟，不如先睇埋放響Ground Floor嘅另一鎮館之寶維納斯女神先......


好快就搵到羅浮宮第三寶「米羅的維納斯」(Venus de Milo).....


大家都應該大約知道維納斯係乜誰? 佢係希臘神話入面掌管 love & beauty 嘅女神，Venus其實係羅馬神話中嘅稱呼，希臘神話係叫Aphrodite，而羅浮宮呢個維納斯女神雕像就係響希臘愛琴海嘅米羅小島上被發現，所以就叫米羅的維納斯.....呢個雕像被發現嘅時候已經斷左雙臂，不過d專家覺得佢身材比例勻稱，甚至被視為最完美嘅身段比例，有S形嘅曲線身材咁話喎，而且體態優雅高貴，所以公認為女性美嘅象徵.......

有人聽完我嘅講解即刻話︰「有幾完美?? 都無乜胸!!」唉，d 男人!


佢個胸算唔算大我 no comment，我只係覺得佢個樣好似男人囉，而且條腰都幾粗......仲有佢個髮型!! 今時今日睇真係幾攞命......


大家唔好誤會，我唔係想叫大家睇女神嘅股罅，而係想指出佢響歲月摧殘飽受風霜之下，除左無左對手，其實好多地方都甩皮甩骨~

 

欣賞完阿維納斯姐姐後，我地就順手逛埋呢一個 level 嘅Denon Wing......呢一層基本上都係sculptures，雖然我地對西方古代雕塑無咩認識，但我真係幾鍾意睇人體雕塑，因為真係幾有趣味性......


有人一見到呢個雕像就大聲笑 (真失禮 =_="')，話如果我再咁樣食落去又唔做運動，好快就會變成呢個雕像咁款......(其實而家都已經好接近，唉.....)

呢位女士! 大庭廣眾，瞓到咁樣.....有無人同我一樣，好想一野打落去佢個 pat pat......

背部咁誘人，睇埋前面先.....OMG!! 你你你.....原來係人妖!!


呢個小朋友同隻鵝玩得好開心呀!


呢幾個女人點解咁淒慘，要用個頭頂住個canopy.....

唔怪得成日話做女人難~


大家睇下呢位先生擺嘅pose幾有型! 香港先生都要行埋一邊啦


嘩! 一個字，正!


兩個字，好正!!


三個字，very 正!!!  哈哈!!

 

其實呢個身材咁鬼正嘅雕像係Michelangelo 嘅「垂死的奴隸」，不過點解我覺得佢一d都唔似就快死，個樣好似好enjoy咁喎......


唔知點解d旅遊書將Michelangelo下面另一個雕像譯為「被綑綁的奴隸」，因為官方嘅名稱係The Rebellious Slave，即係反叛、反抗嘅意思，佢係就係俾條繩綁住，算係一種束縛嘅象徵，佢成個姿態都好似好痛苦咁掙扎嘅樣，相信Michelangelo 想要表達嘅係，所謂束縛其實係精神上，精神上、心靈上被束縛嘅奴隸，渴望得到解脫.....佢d肌肉凸起晒，好有力量嘅感覺呀!

「被愛神吻醒的賽姬」(Cupid & Psyche)


大家鍾意睇希臘神話嗎? 自細已經對西洋神話入迷嘅我，尤其鍾意Psyche嘅故事，所以一見到呢個雕像就好有feel，故事其實好無聊︰愛神Venus因為妒忌人類Psyche嘅美貌，於是就叫左佢個仔Cupid用佢嘅愛情之箭射向Psyche，令佢愛上一個好ugly嘅男人 (真係陰毒，都有個咁大嘅仔啦幾十歲人都唔化!)，點知Cupid一見Psyche咁靚女就嗒晒糖，意亂情迷之下竟然將箭射到自己，於是佢就將Psyche帶到去一座古堡據為己有，晚晚同佢相會，不過就唔俾佢見到自己個樣....原本好地地，點知Psyche嘅家姐又妒忌佢嘅幸福，就呃佢話Cupid係一個妖怪，suggest佢夜晚等Cupid瞓左之後就殺左佢 (我成日諗個個都唔妥呢個Psyche，其實佢真係要自我檢討下).....到左夜晚，低智嘅Psyche果然點起蠟燭走去睇Cupid個真面目，一照之下先發覺原來係一個美少年，當然開心到飛起，點知唔小心蠟燭d油滴醒左Cupid，Cupid見Psyche唔守信用一氣之下就飛走左嘞，Psyche傷心之餘周圍搵人幫手，最後搵到Venus (明知佢唔妥你都仲要搵人，呢d咪叫死蠢囉!)，Venus當然乘機要玩殘佢，提出好多mission impossible，好在最後Psyche響其他天神嘅幫助下都完成晒，於是Venus就叫Psyche去冥界攞一個裝住 "美貌" 嘅盒返嚟，但就講明唔可以打開個盒嚟睇，當然白痴嘅Psyche又打開左個盒，原來盒入面係昏睡嘅幽靈，Psyche當場就昏睡過去，咁啱呢個時候Cupid經過，於是就吻醒Psyche，之後當然就係happy ending兩人快快樂樂咁生活落去啦.....大家覺唔覺得呢個神話雖然好無聊但其實好有啟發性呢? 咁低智嘅Psyche絕對係天下女性引以為戒嘅借鏡啦!!

 

呢個雕像就係以Cupid吻醒Psyche嗰一刻為主題.....能夠將咁堅硬嘅大理石處理得咁光滑同細緻，真係好勁呀，而且個構圖好優雅，兩人嘅姿態亦好柔美.....我想叫老爺搵次同我一齊試下擺呢個pose浪漫一下，點知佢話我咁笨重，只會好似攬住舊五花腩咁....


下面呢個真係超讚，明明大理石係咁堅硬，但個面紗整到好似好薄好輕柔，d 眼耳口鼻隱隱約約咁，好似真嘅一樣，勁呀!!

Wow!! 下面呢個雕像對腳有翼嫁，行行下覺得攰一個唔該就可以飛走唔駛行，我好想問佢借嚟用下......不過呢個都唔係令我wow 嘅主因，最主要係個雕像嘅名叫 Hermes......Hermes! 愛瑪士呀!! 名牌喎，一聽見個心都即刻由八十跳到百五啦

古代浴缸?

呢幾位先生，請問你地響度做咩呢?? 鬥大....?!

咳咳......呢pair男女，有d色情嘅感覺......
 

    逛晒 Denon Wing 嘅 Ground Floor，望下錶已經一點幾，係時候去食個lunch，同埋最主要係行到好攰好辛苦呀，要搵個地方hea下.....原本打算去拿破崙三世套房附近有d餐廳，但我實在頂唔順，對腳攰到好似唔係自己咁，要我再行埋去 Richelieu Wing 我真係無能為力，所以就求其搵間food court算，最緊要係有凳坐......出到返去金字塔，周圍人頭湧湧，好擔心連food court都無位呀，好在逛左一陣見到有張枱有人走，老爺第一時間衝埋去成功搵到兩個位

或者係jet lag 開始發作，再加上行到想死咁款，一坐低我成個人好似呆左吽下吽下咁，乜胃口都無，於是老爺就係咁意走去買左小小野食返嚟......

唉，只係幾樣野都要百五蚊，好貴!! 同埋唔好食囉


食完hea左一陣，又係時候要起行繼續遊盪餘下嘅羅浮宮之旅......

(...待續)