2012年2月巴黎倫敦11日 - 超華麗聖禮拜堂

 

12 FEVRIER 2012 (DAY 2 - PART 2)


繼續兩邊寫........停左半年，又係時候寫返呢個英法遊記，我要的起心肝好積極咁寫，因為想快d 寫完再寫德國trip 呀!!

上次講到逛完聖母院內部，本來一心諗住要走上鐘樓頂層欣賞尖塔同鐘樓怪人嘅巨鐘，仲有好出名嘅怪獸像，點知當日因為勁大風所以個鐘樓closed 左唔開放，好失望呀!! 好想睇嗰d 長相怪異嘅鳥獸雕像......難得一場黎到，下次都唔知要等到幾時，不過天意嘅野都無得好講，本來前幾日都仲擔心緊大風雪連聖母院都close，今日可以參觀聖母院已經好感恩啦

無得上鐘樓咁就響教堂外圍逛下影下相啦.......

愈來愈多遊客，好在我地今朝一早入左去聖母院參觀~

巴黎市內周圍都有白鴿~




入聖母院係免費，但如果想登上鐘樓頂就要俾入場費，本來我地嗰張Museum Pass 係包左上聖母院鐘樓，而家無得上，為左想用盡張Pass 唔駛蝕，咁就順便去埋附近嘅聖母院廣場地下考古遺跡，如果買票都要5e 嫁......
 

呢個地下遺跡係響六、七十年代考古發掘過程中發現，之後就開放俾人參觀......

有個遺跡模型.......唔睇過就咁行真係唔知成個地底遺跡原來係咁樣~

有個模型展示以前聖母院同周邊d buildings 係點樣.......而家睇返張相我忽然諗返起早排睇 "Les Miserables" 有一幕講羅素高爾飾演嘅Javert 咪企左響巴黎市某building 個屋頂，隱約可以見到附近嘅聖母院，成個巴黎市嘅佈景就好似呢個模型咁款呀!

成個遺跡都係呢d 一堆堆古舊而又殘缺不全嘅石頭同建築構件，據講已經超過二千年歷史........


不過我地呢d 平民百姓，既唔係法國人，又唔係考古學家，真係無乜特別感覺，純粹係唔想蝕錢所以到此一遊咁啦

而且因為呢度係響地底，硬係覺得好陰冷咁，逛左一個圈我地就閃人lu~

上返地面個感覺舒服好多.......見仲有時間我地就諗住圍住聖母院慢慢逛一圈欣賞一下成座教堂嘅外形~

呢個叫「原點」(Point Zero)，法國各地同巴黎市中心嘅距離就係由呢一個零公里嘅「原點」開始量度~

 

兩隻bear bear 都要走出黎影下到此一遊相留念，話晒係世界知名嘅巴黎聖母院喎

藍天襯托下嘅聖母院好靚

聖母院位處西堤島上面，圍繞西堤島就係塞納河，呢度嘅景色真係唔錯~~
 

 

另一個角度，由Pont au Double 雙重橋嗰邊影返過去.......

 

呢種咁特別嘅設計叫飛扶壁，作用係用黎承擔屋頂嘅重量，使到窗嘅面積可以擴大，而d 彩繪玻璃亦可以引入大量戶外光線入教堂入面~

上唔到鐘樓頂唔能夠近距離欣賞尖塔，唯有響呢個角度影返張相啦~

教堂南北兩邊都各有一個大玫瑰窗，雖然響教堂入面可以睇到兩個面窗嘅構圖都唔同，但如果由外面睇其實睇唔出個分別，不過以環境黎講我覺得南面呢個靚d，因為佢面向塞納河，同埋有樹木草地襯托，感覺上較優雅~

 

d 樹修剪到齊輯輯，好得意~




呢度係聖母院嘅後面，設計一樣好靚

留返個倩影先

繼續行埋教堂嘅另一邊........




忽然見到有賣crepe，響香港間唔中都有買呢隻nutella 搽麵包嫁，好好味，即刻整返件先.......






冷冷嘅天氣之下整返件熱辣辣嘅crepe 暖下個胃，正!

北面呢度因為面向內街，雖然環境無南面嗰邊咁靚，但附近就有d souvenir shops，又可以乘機shopping 一下!......唔駛講我當然有進帳啦

北面嘅玫瑰窗......呢邊嘅外牆亦比南面嗰邊灰暗......

 

呢d 怪獸形雕像除左係裝飾，其實係排水口~

好溫馨.....如果將來老左都可以同老爺坐響度睇巴黎嘅風景就好啦

 

圍住聖母院好悠閒咁逛左一圈，行返到去Cite Metro Station，睇下錶接近十二點半，原來我地響聖母院呢度不經不覺已經消磨左一個上午，嚴重behind schedule!


下一個景點係St. Chapelle 聖禮拜堂，就響Cite Metro Station 出口嘅另一邊.......


去到見到超多人排隊，我地有Museum Pass 喎，係咪唔需要排呢? 走上前望下，原來呢度個入口唔係買票只係security check，就算有Pass 都要跟住排......排排下去到近入口附近，忽然見到牆上掛左個notice 話唔俾帶刀仔等物品入去參觀......老爺哎呀一聲原來條友仔今朝放左個十字牌萬用刀響背包，佢話之前聽見話巴黎治安唔好咪帶定利器響身囉......於是我就走去前面入口望下，搵左一陣都唔見有locker 放背包喎，咁點算呢? 無理由掉左把刀仔啫，把十字刀係老豆老媽子以前響歐洲旅行買俾老爺嘅手信，我地點都唔肯掉左佢嫁!! 排下排下諗下諗下就快排到去入口，唔知點解嗰一刻忽然有d 緊張，同老爺你眼望我眼我地就決定放棄唔入去啦......其實當時都唔知緊張乜，就算真係check 到有刀仔至多咪唔入去囉，都排左咁耐都唔爭在排埋入去試下啦~
 

跟住我地就走去隔離嘅La Conciergerie 法院古監獄，持Museum Pass 一樣係免費參觀嫁.......呢度唔駛排隊呀~




不過一樣又係要過security check 呀，當時條氣真係好唔順，無理由又過門不入啫.......唔知點解嗰一剎那我即刻叫老爺將把刀仔交俾我，我快快手將佢袋左落件羽絨嘅暗袋然後就若無其事咁俾個手袋d 職員check.......其實佢地都係係咁意翻兩翻袋入面d 野咋，嗰一刻都有d 後悔早知頭先響St. Chapelle 繼續排埋入去啦~

入到去首先經過係一個樓底好高嘅大堂........行左一陣老爺就問我地係咪去錯左地方.......


因為全部都係一d 裝置展覽.......最初我仲同佢講或者係一d 雕塑藝術品要表現當時古監獄入面嘅囚犯要受幾大折磨........(自己講完都想笑)


但睇多一陣實在連自己都覺得自己嘅解釋太牽強.......請問下面呢件野同古監獄有乜關係?


呢件又點睇? 莫非係暗示d 囚犯要做牛做馬


最後我地發覺原來呢度做緊一個關於動物嘅展覽......真係九唔搭八


至於監獄入面嘅囚房、行刑室、囚犯蠟像係響另一邊.......

據講呢個古監獄曾經監禁過瑪麗皇后，即係好奢侈嗰位路易十六嘅皇后......不過呢個古監獄真係好 "流"，得嗰幾間牢房、行刑室同廚房，相比之前響北海道嗰個網走監獄，呢度真係好小兒科同簡陋囉.......我連相都無點影 

 

反而成個古監獄building 仲有可觀性.......






歌德式嘅拱頂結構，配合柔和嘅燈光，好有古典氣息~


呢度都有souvenier shop，不過我咁鍾意shopping 嘅人都無咩啱買，唉!


 

 

參觀完古監獄我地決定行返去St. Chapelle，即管試下睇過唔過到個security check 啦，一場黎到無理由過門不入嘛，而且唔去我地張Museum Pass 咪好嘥......返到去St. Chapelle，發覺條人龍已經無晒，同埋佢地都只係咁意望下個手袋就俾我地入去啦~

 

左邊嗰d 一張張圖片係介紹St. Chapelle 入面d 彩繪玻璃窗係點做~ 

未行到去入口已經見到長長嘅人龍.......

條人龍係排隊買入場票嫁，好彩我地有Museum Pass 在手，可以直接入內.......

呢位男士見我地手揸住Museum Pass 就同我地講直接由中間度門入去就得啦，真係唔該晒呀~

呢個抱住 baby Jesus 嘅雕像當然就係聖母瑪利亞啦~

一走入室內視線去就俾藍色嘅拱頂吸引住，好似聚滿左好多星星嘅夜空.......

成個禮堂都係金漆嘅圓柱，好華麗嘅感覺....... 

d 彩繪玻璃好靚

牆上有12個呢種徽章，分別象徵12門徒~

 

近入口處有個souvenier counter，有賣書籍同紀念品........


下面呢d 彩繪玻璃吊飾用黎掛玻璃窗好別緻，不過因為N年前遊巴黎時我已經買過，同埋響呢度搵唔到好啱心水嘅圖案，所以無買，一心諗住而家先第二日啫，仲有大把時間，遲d 總會仲有d 更合心意嘅.......當然最後返香港都無買到啦，諗返轉頭，當時我竟然連購物狂最基本嘅手則都唔記得，即係唔好猶豫，蘇州過後無艇搭呢個最basic guideline 我竟然無去遵守，睇黎我敗家嘅道行都仲未算高

呢個St. Chapelle 唔係好大，就係咁一眼睇晒，but 之前睇旅遊書講到好金碧輝煌喎，雖然呢度嘅裝潢都好纖細精緻，但都未至於用金碧輝煌黎形容囉，而且個教堂真係比想像中細.........

 

  正當我地打算離開，響近出口處發覺原來有條樓梯通向上面嫁，好在無走漏眼


又係呢種又窄又細級嘅旋轉樓梯，點解歐洲d 教堂咁鬼多呢d 樓梯嫁，想行死人咩!!

 

一上到上層，眼前一亮，我地即刻忍唔住嘩左出黎!! 原來上層好鬼靚呀!! 

呢度幾乎四面嘅牆全部都係彩繪玻璃，尤其右邊有陽光透過玻璃窗映照，真係好靚好耀眼

彩繪玻璃基本上以紅、藍為主要色調，千多幅嘅彩繪圖案都係新約同舊約嘅聖經故事........


每一組玻璃窗都描繪一個聖經故事，由上帝造人以至耶穌救世嘅歷史，好似創世紀、出埃及記、耶穌受難等等~




好靚嘅歌德式建築，瑰麗明亮而又宏偉開闊，即使成個禮堂都係好絢麗嘅裝飾，但置身其中仍然好有神聖嘅感覺


個ceiling 真係好鬼型

用巧奪天工黎形容真係絕不為過!


點解呢個聖禮拜堂會分上下兩層呢? 原來當時建造呢個教堂時係以階級制度分級，下層係 for 平民同皇室僕役做禮拜，而上層唔駛講梗係 for 貴族同皇室專用啦~


耶誕12使徒雕像，全部都沿住牆壁背靠支柱，每一個都好似披住金袍咁~


好金




呢度都有一大幅玫瑰窗，據旅遊書介紹係描繪匯約翰受到啟示嘅故事~




因為樓底太高，要欣賞華麗嘅彩繪玻璃個個都要仰高頭......兩旁放置左好多凳，可以坐響度慢慢細心欣賞~~

參觀完華麗嘅 St. Chapelle 一點半，係時候離開.......

 

沿路會經過司法大樓.......


呢個司法大樓係巴黎最高法院，當然順手影返幾張相啦~






呢度金色大門原來係司法大樓嘅閘門，今朝一出Metra Station 就見到~


響西堤島逛左一個早上，對腳實在有d 攰，係時候去搵地方食lunch 同休息一下啦~~

(...待續)