2011年2月北海道道東道北12日 - 雪之大地．美瑛

2月28日 - DAY 10 (PART 2)
美瑛

離開 Pension Jacatra，正式開始我地期待已久嘅美瑛photo tour 啦!!

個tour 開始之前，Pension 主人先俾左張map 我地睇，又同我地講解一下條路線同將會帶我地去睇邊d 名木，佢仲問我地有無邊度係想去，可以話俾佢知佢盡可能車我地去咁話~

仲記得09年夏天我地都黎過美瑛，當時係第一次響日本自駕遊，一來仲未好習慣自駕，二來又要掛住搵嗰d 咩名木，心理壓力好大，最終都無好好咁細心欣賞美瑛嘅風景，再加上嗰次天氣唔好，d 景點影出黎灰濛濛，絕對係一個唔能夠稱得上enjoy 嘅體驗囉......今次有專人車我地去每個景點，可以好輕鬆咁影下相慢慢欣賞每一個角落啦!




Pension 主人話如果中途我地見到有邊d 地方係想停低影相即管話俾佢知，佢隨時都可以停嫁，總之take your time 咁話啦......既然佢咁講我地就唔同佢客氣啦，話晒呢個photo tour 要成2500円一個人，梗係盡量去多d 地方影多d 靚相啦


美瑛最出名嘅觀光路線係Patchwork Road & Panorama Road，Patchwork Road 顧名思義係因為連綿嘅山丘上，各種唔同嘅麥田大大小小一塊一塊咁拼湊成花布一樣，好有特色，至於Panorama Road 則係指國道237號東南邊嘅景觀道路， 一望無際嘅田園被十勝岳連峰所包圍.......冬天到訪雖然睇唔見呢兩條觀光路線嘅特色，但遍地白雪嘅山丘，加上形態獨特嘅零星樹木，更有碧藍天幕做背景，我覺得冬天嘅美瑛絕不失色!


冬日下嘅美瑛，觸目所及都係連綿嘅雪山，大片大片嘅雪地，最正嘅係今日天氣清朗，走在其中心情自不然都會暢快起來


 心情好連普普通通一棵樹嘅影子都覺得靚d




遠遠見到摩天輪，唔知係咪就係我地上次住嗰間Pension Woody Life 附近嘅魔幻美術館旁嘅摩天輪呢?




唔好以為Pension 主人住響呢頭就一定好熟路，原來佢都要用GPS 嫁~


車行左無耐好快就見到第一個名木，The Tree of Ken & Mary.......

 

Ken & Mary 嘅典故今次唔多講啦，如果大家想知都可以去返呢度睇睇我上次係點講，唔睇都無所謂，因為個典故對於我地香港人黎講係無乜共嗚......


遼闊嘅雪地上就只有呢一棵巨大嘅白楊木，又的確係幾型嘅

睇睇我地09年夏天嘅相，大家覺得冬天嘅雪景靚d 定夏天嘅花草景靚d 呢?


兩隻bear bear 又出動，天氣咁好，當然唔好將佢地收埋，點都要帶佢地出黎見下世面啦


上次趕頭趕命，今次終於可以細心欣賞下呢d 名木，影幾多玉照都no problem 呀


個雪地俾d 陽光照射，閃閃生光，眼仔都睜唔開呀!


影完一輪相繼續上路~


Next stop，聖誕之木.....

真係好似一棵聖誕樹呀!

 

忍唔住幫兩隻bears 狂影造形照

除左d 名木，沿途嘅風景都好正

 

途經美馬牛小學~




有無一種想跳落去打筋斗嘅衝動呢?


呢個位雖然唔係咩知名景點，但經過時覺得d 樹影密密打落個雪地上好靚，所以又停一停影兩張相~~

 



遠處嘅群山就係十勝岳連峰.......


 

好靚!!

有小小覺得去左瑞士嘅飄零燕feel 呀

 

兩隻bear bear 咁專注響度睇咩呢?


Oh! 極目一片白茫茫，好軟綿綿嘅感覺........如果唔係有外人響度，真係想走落去同老爺打番場雪戰




真心覺得連一株小草都好靚


第三棵名木，哲學之木......大家覺唔覺得似一位響度沉思緊嘅哲學家呢?




日本人真係感性，我地點諗都唔覺呢棵野響度思考緊囉，不過無可否認呢棵樹嘅形態確係幾優美~

又再黎一個對比，夏天個look 都 OK 喎.......

其實如果只係以樹本身嘅形態黎講，我覺得呢個哲學之木係眾多名木之中最靚嘅

 

附近個view 亦好正!




嘩! 呢一排銀白樹林好靚呀!!






好鍾意呢一張相，覺得個構圖好鬼浪漫




兩隻bear bear 實在太cute，Pension 主人後來都忍唔住同佢地影左好多相，仲問我地介唔介意將佢地d 相放上Pension 嘅web site.......嗯，今次真係俾兩隻野搶晒鏡啦






呢三棵樹唔係咩名木，但我地覺得形態都好美，所以又停一停影一影~


呢度係紅屋頂之丘........

偌大嘅雪地上，零零星星幾棵樹，好有趣


有個公仔指示去紅屋頂之丘嘅方向~

 

唔覺唔覺又去到The Tree of Ken & Mary，頭先係遠遠zoom 過去影相，今次黎過近距離接觸......

Ken & Mary 係白楊樹，夏天枝葉茂盛.......


冬天好似一把掃帚


Pension Ken & Mary......如果有時間真係好想入去整返個tea~


又繼續響雪地上奔馳......

 

遠遠已經見到第四棵名木，The Tree of Seven Star.......

 

Tree of Seven Star 係因為香煙廣告而出名.........But 再一次睇我依然唔覺佢有乜咁特別喎........


夏天嘅Seven Star 其實都係一樣，都係一棵樹啫.......


加埋兩個可愛嘅model，有無加左dd 分呢


夏天時四周嘅景色其實唔錯嫁，不過我仲記得當時呢度真係好大陣肥田料味好臭


冬天嘅雪景.......無異味嫁!!


而且景色亦唔比夏天弱

   

附近一排白樺樹嘅view 都好靚~


景色依舊，but 真係物是人非.......我意思係我又老左幾年身形大左幾個碼啦

 

Next, 親子之木.......


對比一下.......

中間嘅小朋友有無長大左小小呢?


Pension 主人仲叫我地同bear bear 大手牽小手齊齊手拖手企響前面扮親子之木

長長嘅雪路，好似了無盡頭........


就這樣一起走下去吧!!.......


The last but not the least, Hill of Mild Seven........


上次黎我地搵左好耐都搵唔到，今日終於可以睇下呢d 防風林啦.......

個view 真係好靚呀!!

Mild Seven 之丘亦係因為香煙廣告而成為遊客必遊景點，其實佢本身係有機農場........


成個山頭忽然有一大排樹一字排開又真係幾得意~

本來平滑嘅雪地俾我地蹂躪完一輪之後留低無數腳印......well, 個構圖都幾靚吖


雪牆!

 

住響呢度你話幾好，四季都可以有唔同嘅景色......如果我地可以每隔一兩年都過黎玩就好啦

 

唔經唔覺好快趣兩個多鐘頭就過左去，我地呢個美瑛photo tour 亦要結束........ 

離開Hill of Mild Seven，Pension 主人按原定計畫將我地送到美瑛JR Station......雖然呢個photo tour 收費要成2500円一個人，不過係好值得嫁，有專人帶我地去晒d 著名景點唔駛自己花時間搵路，沿途見到靚靚景又可以隨意停低hea 一陣，美瑛嘅雪景真係超靚，而我地又好好彩今日個天氣好正，我地同兩隻bears 影左勁多相呀! 好開心喔!!

同Pension 主人say bye-bye 後我地就要告別美瑛，離開咁靚嘅大自然固然有dd 不捨之情，不過由Day 2 離開札幌去層雲峽開始，去到今日我地響道北道東地區都已經玩左8日啦，d 雪景都睇得好夠，係時候要暫別大自然........下一站......

我．要．去．SHOPPING 呀!!!!

(...待續)